Жахаба берилгендикти жакшы көрүшүбүздү талап кылат (Забур 18:25). Өмүрлүк жарыбызга берилгендик сактаганыбыз абдан маанилүү. Анткени берилгендик жок болсо, жубайлардын бири-бирине ишениши кыйын болот. Ал эми алар бири-бирине ишенбесе, сүйүүсү муздап калары анык.

Бүгүнкү күндө нике түйүнүнө туш тараптан сокку урулууда. Андыктан никеңерди коргош үчүн төмөнкү эки нерсени кылганыңар маанилүү.

ЫЙЫК КИТЕПТЕ ЭМНЕ ДЕЛЕТ? «Эмне маанилүүрөөк экенин баамдагыла» (Филипиликтер 1:10). Никеңер — жашооңордогу эң маанилүү нерселердин бири. Ага өзгөчө көңүл бурганыңар абзел.

Жахаба жарыңарга дайыма көңүл бөлүп, аны менен чогуу «жашоонун ырахатын көрүшүңөрдү» каалайт (Насаатчы 9:9). Анын Сөзүнөн жубайыңардын камын ойлоп, ага кубаныч тартуулоонун жолдорун издешиңер керектиги айкын көрүнүп турат (1 Корунттуктар 10:24). Кылган мамилеңерден жубайыңар өзүн керектүү, баалуу сезиши керек.

ЭМНЕ КЫЛСАҢАР БОЛОТ?

• Жарыңар менен дайыма чогуу убакыт өткөрүп, ага толугу менен көңүл бургула

• «Мен» дебей, «биз» деп ой жүгүрткүлө

ЫЙЫК КИТЕПТЕ ЭМНЕ ДЕЛЕТ? «Аялды кумарлануу менен карай берген ар бир адам жүрөгүндө аны менен ойноштук кылган болот» (Матай 5:28). Эгер кимдир бирөө адеп-ахлаксыз ойлорго бата берсе, кандайдыр бир мааниде өмүрлүк жарына ишенимсиздик кылган болот.

Жахаба жүрөгүбүздү сакташыбыз керектигин айтат (Накыл сөздөр 4:23; Жеремия 17:9). Ан үчүн көзүбүздү эмнеге багыттап жатканыбызга көңүл бурушубуз керек (Матай 5:29, 30). Бул жагынан башка аялды кумарлануу менен карабаш үчүн көзү менен «келишим түзгөн» Аюп пайгамбардан үлгү алсаңар болот (Аюп 31:1). Порнографиядан жаа бою качкыла жана жубайыңардан башка бирөөгө махабат сезимин өрчүтүп алуудан сак болгула.

ЭМНЕ КЫЛСАҢАР БОЛОТ?

• Жубайыңарга гана таандык экениңерди башкаларга айкын көрсөткүлө

• Жарыңардын сезимдерине маани бергиле. Кимдир бирөө менен болгон мамилеңер анын тынчын алып жатса, дароо токтоткула