Modimo o na le Taba le Wena
BEIBELE e re nea dikeletšo tše dibotse kudu ka gobane e tšwa go Modimo. Ga se puku ya tša kalafo eupša e ka re thuša ge re sa nagane gabotse, ge re nyamile le ge re na le mathata a tša monagano le go lebeletšana le maemo ao a bakago stress.
Sa bohlokwa kudu ke gore Beibele e re kgonthišetša gore Mmopi wa rena Jehofa a o kwešiša tsela yeo re naganago le go ikwa ka yona go feta motho le ge e le ofe. O ikemišeditše go re thuša go lebeletšana le mathata a rena. Ka mohlala bona mangwalo a a mabedi ao a homotšago:
“Jehofa o kgauswi le ba dipelo tše di robegilego, O phološa ba meoya e nyamilego o šoro.”—PSALME 34:18.
“Nna Jehofa Modimo wa gago ke go swere ka seatla sa ka sa le letona, Yena yo a rego go wena: ‘O se ke wa boifa. Ke tla go thuša.’”—JESAYA 41:13.
Jehofa o re thuša bjang go lebeletšana le malwetši ao a amago monagano? Dihlogong tše di latelago o tlo bona gore Jehofa o re bontšha gore o na le taba le rena ka ditsela tše di fapafapanego.
a Jehofa ke leina la Modimo.—Psalme 83:18.
