NA O kile wa nyaka selo se sengwe kudu?— * Ge e ba go le bjalo, gona o swana le batho ba bantši. Eupša na o swanetše go hwetša seo o se nyakago ka go bolela maaka?— Aowa, ga se wa swanela go dira bjalo. Motho yo a dirago bjalo o na le megabaru. Anke re boneng gore monna yo a bitšwago Gehasi o ile a senywa bjang ke megabaru. E be e le mohlanka wa Elisha, yo e bego e le moporofeta wa Modimo wa therešo, Jehofa.

Elisha le Gehasi ba phetše mehleng ya bogologolo, mo e ka bago nywaga e sekete pele ga ge Morwa wa Modimo, Jesu, a belegwa mo lefaseng. Jehofa o ile a diriša Elisha go dira dilo tšeo di kgahlišago kudu—go dira mehlolo! Ka mohlala, Beibele e re botša ka monna yo mongwe yo bohlokwa mašoleng a Siria yo a ilego a ba le bolwetši bjo bo šiišago bja lephera. Go be go se na yo a kgonago go mo fodiša, eupša Elisha o ile a mo fodiša.

Ge Elisha a be a dirišwa ke Modimo go thuša batho gore ba fole, ga se a ka a amogela tšhelete le ka mohla. Na o tseba lebaka?— Ka gobane Elisha o be a tseba gore mehlolo yeo e be e etšwa go Jehofa—e sego go yena. Ge Naamane a fodišitšwe, o ile a thaba kudu moo a ilego a nyaka le go nea Elisha dimpho tša gauta, silifera le diaparo tše dibotse. Elisha o be a ka se amogele dimpho tšeo, eupša Gehasi o be a tloga a di nyaka.

Ka morago ga gore Naamane a sepele, Gehasi o ile a šala Naamane morago a se a botša Elisha. Ge a fihlile go Naamane, na o tseba seo Gehasi a ilego a mmotša sona?— O itše: ‘Elisha o nthomile go wena go go botša gore go sa tšwa go tla baeng ba babedi. A ka thabela go hwetša diaparo tšela tše pedi e le gore a di nee banna bao.’

 Eupša ao e be e le maaka! Gehasi o ile a ithomela taba ka baeng ba babedi. O bolela taba yeo ka gobane o nyaka gore diaparo tšeo Naamane a bego a re o di nea Elisha e be tša gagwe. Therešo ke gore Naamane o be a sa tsebe ka taba yeo. Naamane o ile a thabela go nea Gehasi dimpho tšeo. Naamane o ile a ba a nea Gehasi dilo tše dingwe tšeo Gehasi a bego a se a di kgopela. Na o tseba seo se diregilego ka morago?—

Ge Gehasi a boa gae, Elisha a mmotšiša gore: ‘O be o ile kae?’

Gehasi o araba ka gore: ‘Ga ke tšwe felo.’ Lega go le bjalo, Jehofa o ile a dira gore Elisha a tsebe seo Gehasi a se dirilego. Ka gona Elisha a re: ‘Ye ga se nako ya go amogela tšhelete le diaparo!’

Gehasi o tšere tšhelete le diaparo tšeo e bego e se tša gagwe. Ka gona Modimo o ile a dira gore lephera la Naamane le fetele Gehasi. O nagana gore re ka ithuta eng go se?— Selo se sengwe seo re ithutago sona ke gore ga se ra swanela go ithomela ditaba tša maaka le go di bolela.

Ke ka baka la’ng Gehasi a ile a thoma taba yeo ge e le gabotse e bego e le maaka?— Ke ka gobane Gehasi o be a na le megabaru. O be a nyaka go tšea dilo tšeo e bego e se tša gagwe, gomme a leka go hwetša dilo tšeo ka go bolela maaka. Ka baka la seo o ile a swarwa ke bolwetši bjo bošoro bophelo bja gagwe ka moka.

Ruri Gehasi o ile a welwa ke selo se sešoro go feta lephera. Na o tseba gore seo e be e le eng?— Modimo o ile a se sa hlwa a mo amogela le go mo rata. Anke le ka mohla re se ke ra dira selo seo se ka dirago gore Modimo a se sa hlwa a re amogela le go re rata! Go e na le moo, anke re beng le botho le go ikemišetša go abelana le ba bangwe dilo tšeo re nago le tšona.