Ахӕм фарста нӕм кӕй сӕвзӕры, адӕм цӕмӕн мӕлынц, зӕгъгӕ, уым диссагӕй ницы ис, уӕлдайдӕр та, нӕ хиуӕттӕй исчи куы амӕлы, уӕд. Библи зӕгъы: «Мӕлӕт чи расайы‚ уыцы маргджын фат у тӕригъӕд» (1 Коринфӕгтӕм 15:56).

Адӕм иууылдӕр тӕригъӕдджын цӕмӕн сты ӕмӕ цӕмӕн мӕлынц?

 Фыццаг дыууӕ адӕймаджы, Адам ӕмӕ Евӕ, Хуыцауы ныхмӕ тӕригъӕд кӕй сарӕзтой, уый тыххӕй ӕппынфӕстаг амардысты (Райдиан 3:17–19). Хуыцауы ныхмӕ кӕй рацыдысты, уый тыххӕй сӕм мӕлӕт йеддӕмӕ ницы ӕнхъӕлмӕ каст, уымӕн ӕмӕ «царды суадон» уымӕ ис (Псалом 36:9; Райдиан 2:17).

 Адамы тыххӕй йӕ байзӕддӕгтӕ иууылдӕр сты ӕнӕххӕст ӕмӕ тӕригъӕдджын. Библийы фыст ис: «Иу адӕймаджы аххосӕй дунемӕ ӕрцыд тӕригъӕд, тӕригъӕды уылты та – мӕлӕт, ӕмӕ афтӕмӕй мӕлӕт ахӕлиу ӕппӕт адӕмыл дӕр, уымӕн ӕмӕ иууылдӕр ракодтой тӕригъӕд» (Ромӕгтӕм 5:12). Адӕм иууылдӕр сӕ туджы тӕригъӕд кӕй рахастой, мӕлгӕ дӕр уый тыххӕй кӕнынц (Ромӕгтӕм 3:23).

Мӕлӕтӕн кӕрон куыд ӕрцӕудзӕн

 Хуыцау зӕрдӕ ӕвӕры, мӕлӕт ӕнустӕм кӕй фесафдзӕн (Исай 25:8). Цӕмӕй мӕлӕт мауал уа, уый тыххӕй Хуыцау хъуамӕ фесафа, адӕм цӕй аххосӕй мӕлынц, уый – тӕригъӕд. Хуыцау уый сараздзӕн Йесо Чырыстийы фӕрцы, «дунейы тӕригъӕдтӕ [чи] ахаста», уый фӕрцы (Иоанны 1:29; 1 Иоанны 1:7).