Тӕригъӕд у, Хуыцауы уагӕвӕрдты ныхмӕ цыдӕриддӕр у, уый – фӕнды хъуыддаг уӕд, фӕнды – ӕнкъарӕн, фӕнды – хъуыды. Тӕригъӕдмӕ ма хауы, Хуыцауы цӕсты ӕвзӕр цы у, ахӕм исты куы саразӕм, ӕмӕ афтӕмӕй Хуыцауы закъон куы фехалӕм, уый дӕр (1 Иоанны 3:4; 5:17). Тӕригъӕд ма у уый дӕр, ӕмӕ адӕймаг, раст цы у, уый куыд кӕнгӕ у, уый куы зона, фӕлӕ йӕ куы нӕ кӕна (Иаковы 4:17).

 Библи фыццаг цы ӕвзӕгтыл фыст ӕрцыд, уым дзырд тӕригъӕдӕн йӕ хъуыды у «нысан нӕ акъахын». Зӕгъӕм, рагон Израилы ӕфсӕддонтӕ дуртӕ ӕхсынмӕ афтӕ арӕхстджын уыдысты, ӕмӕ-иу фыццаг ӕхстӕй дӕр сӕ нысан «акъахтой». Ацы дзырд комкоммӕ куы ратӕлмац кӕнӕм, уӕд уыдзӕн афтӕ: «тӕригъӕд нӕ арӕзтой» (Тӕрхонгӕнджыты 20:16). Уӕдӕ адӕймаг тӕригъӕд куы саразы, уӕд афтӕ уайы, ӕмӕ йын Хуыцау цы «нысан» сӕвӕрдта, уый нӕ акъахта, ома Хуыцауы ӕххӕст закъӕттӕм ӕмӕ уагӕвӕрдтӕм гӕсгӕ раст цы у, уый нӕ сарӕзта.

 Хуыцау Сфӕлдисӕг кӕй у, уымӕ гӕсгӕ йын ис уыцы бар, цӕмӕй адӕмӕн уагӕвӕрдтӕ ӕвӕра (Раргомад 4:11). Нӕ хъуыддӕгты тыххӕй уымӕн дӕттӕм дзуапп (Ромӕгтӕм 14:12).

Уымӕн гӕнӕн ис, ӕмӕ адӕймаг тӕригъӕд ӕппындӕр ма араза?

 Нӕй. Библи дзуры: «Се ’ппӕт дӕр тӕригъӕд ракодтой ӕмӕ сӕ бон нӕу Хуыцауы диссаджы миниуджытӕ ӕвдисын» (Ромӕгтӕм 3:23; 1 Паддзӕхты 8:46; Екклесиаст 7:20; 1 Иоанны 1:8). Афтӕ цӕмӕн рауад?

 Фыццаг дыууӕ адӕймаджы, Адам ӕмӕ Евӕ, райдианы уыдысты ӕнӕтӕригъӕд, уымӕн ӕмӕ сӕ Хуыцау сфӕлдыста ӕххӕст адӕймӕгтӕй, йӕхимӕ гӕсгӕ (Райдиан 1:27). Фӕлӕ Хуыцауы коммӕ кӕй нӕ бакастысты, уый тыххӕй систы тӕригъӕдджын (Райдиан 3:5, 6, 17–19). Сывӕллӕттӕ сын куы райгуырд, уӕд тӕригъӕд ӕмӕ ӕнӕххӕстдзинад рахастой сӕ туджы (Ромӕгтӕм 5:12). Израилы паддзах Давид дӕр уымӕн загъта афтӕ: «Ӕз... райгуырдтӕн тӕригъӕды» (Псалом 51:5).

Цымӕ кӕцыдӕр тӕригъӕдтӕ иннӕ тӕригъӕдтӕй уӕззаудӕр сты?

 О. Зӕгъӕм, Библийы фыст ис, зӕгъгӕ, рагон горӕт Содомы адӕм уыдысты «хӕлд... стыр тӕригъӕдтӕ арӕзтой», сӕ тӕригъӕдтӕ уыдысты «тынг уӕззау» (Райдиан 13:13; 18:20). Ӕркӕсӕм, цавӕр ӕртӕ хъуыддагмӕ гӕсгӕ ис сбӕрӕг кӕнӕн, тӕригъӕд тынг уӕззау у ӕви нӕ.

1.   Тынг ӕвзӕр ми у ӕви нӕ. Библи нӕ фӕдзӕхсы, цӕмӕй нӕхи хизӕм уӕззау тӕригъӕдтӕй, зӕгъӕм, хӕтындзинадӕй, мӕнгхуыцӕуттӕн кувынӕй, давынӕй, фыднозт кӕнынӕй, иннӕты стигъынӕй, марынӕй ӕмӕ хинтӕ-кӕлӕнтӕ кӕнынӕй (1 Коринфӕгтӕм 6:9–11; Раргомад 21:8). Библимӕ гӕсгӕ, ацы тӕригъӕдтӕ тынг хицӕн кӕнынц, адӕймаг ӕнӕрхъуыдыйӕ кӕнӕ ӕнӕбары кӕй саразы, ахӕм тӕригъӕдтӕй, зӕгъӕм, йӕ ныхӕстӕй кӕнӕ йӕ митӕй иннӕты фӕхъыг кӕны (Ӕмбисӕндтӕ 12:18; Ефесӕгтӕм 4:31, 32). Фӕлӕ Библи зӕгъы, цӕмӕй тӕригъӕдмӕ уӕлӕнгай цӕстӕй ма кӕсӕм, уымӕн ӕмӕ гыццыл тӕригъӕд дӕр, гӕнӕн ис, уымӕ ӕркӕна, ӕмӕ Хуыцауы закъон ноджы стырдӕр хъуыддаджы фехалӕм (Матфейы 5:27, 28).

2.   Цӕмӕн бакодта афтӕ. Иуӕй-иутӕ тӕригъӕд саразынц, Хуыцауы уагӕвӕрдтӕ кӕй нӕ фӕзонынц, уый тыххӕй (Хъуыддӕгтӕ 17:30; 1 Тимофеймӕ 1:13). Кӕд Библи ахӕм тӕригъӕдтӕм уӕлӕнгай цӕстӕй нӕ кӕсы, уӕддӕр сӕ, адӕймаг Хуыцауы закъон зонгӕйӕ кӕй саразы, уыцы тӕригъӕдты ӕмрӕнхъ не ’вӕры (Нымӕцтӕ 15:30, 31). Адӕймаг барӕй тӕригъӕд саразы, «ӕвзӕр... зӕрдӕ» йын кӕй вӕййы, уый аххосӕй (Йереми 16:12).

3.   Арӕх бакӕны афтӕ ӕви нӕ. Библимӕ гӕсгӕ, тӕригъӕд иу хатт ракӕнын ӕмӕ тӕригъӕд бирӕ рӕстӕг аразын, иу не сты (1 Иоанны 3:4–8). Раст цы у, уый аразын куыд хъӕуы, уый чи базоны, фӕлӕ ма уый фӕстӕ дӕр «зонгӕ-зонын тӕригъӕдджын хъуыддӕгтӕ [чи] фӕаразы», уыдоны Хуыцауы фыдтӕрхон баййафдзӕн (Дзуттӕгтӕм 10:26, 27).

 Уӕззау тӕригъӕд чи саразы, уымӕн, гӕнӕн ис, ӕмӕ йӕ тӕригъӕд ӕнцой ма дӕтта. Зӕгъӕм, паддзах Давид ныффыста: «Мӕ рӕдыдтытӕ мӕ сӕрӕй уӕлдӕр фесты, уӕззау уаргъау мыл уӕз кӕнынц» (Псалом 38:4). Фӕлӕ Библи ныфс ӕвӕры: «Фыдгӕнӕг ныууадзӕд йӕ фӕндаг, фыдхъуыддӕгтӕ чи аразы, уый ныууадзӕд йӕ фӕндтӕ ӕмӕ Йегъовӕмӕ раздӕхӕд, уымӕн ӕмӕ йӕм уый уыдзӕн фӕлмӕнзӕрдӕ. Раздӕхӕд нӕ Хуыцаумӕ, уымӕн ӕмӕ йын уый зӕрдиагӕй ныххатыр кӕндзӕн» (Исай 55:7).