ИУӔЙ-ИУТӔ ЗӔГЪЫНЦ «НӔ». Иу дохтыр афтӕ загъта, зӕгъгӕ, адӕймаг нӕ рӕстӕджы Библийы уынаффӕтӕм гӕсгӕ цӕра, уый абарӕн ис, ахуыргӕнӕг химийы урокты 1920-ӕм азты уагъд чиныгӕй куыд пайда кӕна, уыимӕ. Чидӕр та ма афтӕ дӕр зӕгъид, зӕгъгӕ, кӕй нал уадзынц, ахӕм зӕронд компьютеры инструкцимӕ гӕсгӕ ног уагъд компьютерыл куыд хъуамӕ кусай. Иудзырдӕй, иуӕй-иутӕ Библи нымайынц, абон пайда ӕппындӕр кӕмӕй нал ис, ахӕм зӕронд чиныгыл.

Абон наукӕ ӕмӕ техникӕ размӕ тынг ацыдысты, ӕмӕ адӕймаг ахӕм рагон чиныджы уынаффӕтӕм гӕсгӕ цӕмӕн хъуамӕ цӕра? Интернеты ис дуне алыхуызон сайттӕ ӕмӕ блогтӕ, ӕмӕ дзы вӕййы ногӕй ногдӕр уынаффӕтӕ. Телевизоры цы передачӕтӕ вӕййы, уым алыхуызон ахуыргӕндтӕ, психологтӕ, фысджытӕ ӕмӕ, зондджын адӕм кӕй хонынц, уыдон ӕппынӕдзух адӕмӕн амонынц, куыд цӕрой, уый. Дуканитӕ йедзаг сты, алы хъуыддаджы фӕдыл дӕр уынаффӕтӕ кӕм ис ссарӕн, ахӕм чингуытӕй. Уыцы чингуытӕй мыхуыры уыйбӕрц уадзынц, ӕмӕ дзы миллиардгай доллӕртӕ бакусынц.

Уӕдӕ кӕд алы минут дӕр утӕппӕт ног информаци фӕзыны, уӕд ма Библи,– фыст куы ’рцыди, уымӕй 2 000 азы бӕрц кӕуыл рацыд, уыцы чиныг,– цӕмӕн хъӕуы кӕсын? Афтӕ чи зӕгъы, ӕмӕ ахӕм рагон чиныджы уынаффӕтӕм хъусын зӕронд химийы чиныгӕй кӕнӕ зӕронд компьютеры инструкцийӕ пайда кӕнынӕй уӕлдай нӕу, уыдон, мыййаг, раст сты? Зӕгъын хъӕуы уый, ӕмӕ уыцы абарстытӕ сӕхӕдӕг не сты раст. Наукӕ ӕмӕ технологи бонӕй бонмӕ ивынц, фӕлӕ адӕймаджы конд нӕ ивы. Адӕмы раздӕрау фӕнды зонын, цӕмӕн цӕрынц, уый, фӕнды сӕ, цӕмӕй амондджынӕй ӕмӕ ӕдасӕй цӕрой, цӕмӕй сӕ бинонтӕ ӕнгом уой ӕмӕ сын хорз хӕлӕрттӕ уа.

Кӕд Библи рагон чиныг у, уӕддӕр дзы ӕппӕт уыдӕтты фӕдыл ӕмӕ ма ноджы бирӕ ӕндӕр хъуыддӕгты фӕдыл ис хорз уынаффӕтӕ. Стӕй ма дзы афтӕ дӕр ис фыст, Хуыцауы фӕндӕй фыст кӕй у. Библийы фыст ис, йӕ уынаффӕтӕ нын царды алы фӕзилӕны дӕр ӕмӕ цыфӕнды зын уавӕры дӕр стыр ӕххуыс кӕй уыдзысты (2 Тимофеймӕ 3:16, 17). Уымӕй уӕлдай, Библи зӕгъы, йӕ уынаффӕтыл рӕстӕджы бар кӕй нӕ цӕуы – афтӕ зӕгъӕн никуы уыдзӕн, ӕмӕ базӕронд сты! Библи йӕхӕдӕг зӕгъы: «Хуыцауы ныхас у удӕгас» (Дзуттӕгтӕм 4:12).

Цымӕ хабар ӕцӕгдӕр афтӕ у? Библийы уынаффӕтӕ абон царды нал ахадынц ӕви ӕцӕгдӕр ӕппӕты хуыздӕр уынаффӕтӕ сты? Ӕцӕгдӕр ӕй «удӕгас» чиныг схонӕн ис? Ацы брошюрӕ уыцы фарстатӕн дзуапп дӕтты.