Ӕз райгуырдтӕн Польшӕйы, иу гыццыл горӕты Германийы арӕнмӕ ’ввахс. Нӕ алыварс уыд фермӕтӕ ӕмӕ хъӕдтӕ, ӕмӕ мӕ сабибонтӕй хорз йеддӕмӕ ӕвзӕрӕй ницы хъуыды кӕнын. Мӕ ныййарджыты фӕндыд, цӕмӕй мӕ хорз адӕймаг рауадаид, скъолайы хорз ахуыр кодтаин ӕмӕ фидӕны стыр бынаты куыстаин.

Мӕ бӕллӕхтӕ райдыдтой, горӕт Вроцлавы университеты юристыл куы ахуыр кодтон, уӕд. Мӕ ныййарджытӕй уыдтӕн дард ӕмӕ мын ӕвзӕр ӕмбӕлттӕ фӕзынд. Уӕдмӕ дӕр футбол уарзтон, фӕлӕ мӕ ног ӕмбӕлттӕм гӕсгӕ футболыл ӕрратӕ кӕнын райдыдтон. Мӕ уарзон командӕ уыд Варшавӕйӕ, ӕмӕ-иу улӕфгӕ бонты кӕм хъазыд, ӕз дӕр-иу уырдӕм ацыдтӕн. Уыцы рӕстӕг-иу ме ’мбӕлттимӕ нозтӕй бӕрц нал зыдтам, наркотиктӕ-иу кодтам ӕмӕ-иу ӕндӕр командӕйы фарс чи уыд, уыдонимӕ-иу кӕрӕдзи сау дӕрӕн ныккодтам. Цы мӕ тыхсын кодта, уыдӕттӕ-иу мӕ афтӕмӕй айрох сты. Хорз ӕй ӕмбӕрстон, ӕмӕ пъӕлицӕйы къухтӕм куы бахауон, уӕд юристы куыст мӕ цӕсты кӕронӕй дӕр нал фендзынӕн, фӕлӕ мӕ уый дӕр нӕ урӕдта.

Ме ’мбӕлттимӕ уарзтам клубтӕм ӕмӕ дискотекӕтӕм цӕуын. Ахӕм рӕтты-иу куы уыдыстӕм, уӕд-иу арӕх кӕимӕдӕрты фӕхыл стӕм. Цалдӕр хатты мӕ пъӕлицӕ ахсгӕ дӕр ӕркодта, фӕлӕ-иу уӕлӕнгӕйтты аирвӕзтӕн – хатт гӕртӕмтты фӕрцы. Афтӕ мӕм каст, ӕмӕ кӕд исчи цӕры, уӕд – ӕз. Фӕлӕ йӕ уӕддӕр кӕмдӕр ӕмбӕрстон, цы аразын, уый раст кӕй нӕ уыд. Алы хуыцаубоны дӕр-иу аргъуанмӕ бацыдтӕн, цӕмӕй-иу ме ’фсарм ӕрсабыр кодтаин.

2004 азы мын дыууӕ Йегъовӕйы Ӕвдисӕны мӕ дуар ӕрбахостой. Ӕз сразы дӕн семӕ Библи ахуыр кӕныныл. Ӕцӕг чырыстон адӕймаг цыхуызӕн хъуамӕ уа, уый куы базыдтон, уӕд мӕ зӕрдӕ мӕхиуыл худын райдыдта. Зыдтон ӕй, нозт ӕмӕ наркотиктӕ хъуамӕ ныууадзон ӕмӕ, Библийы уагӕвӕрдтӕм гӕсгӕ чи нӕ цӕры, уыцы адӕмимӕ мӕ рӕстӕг мауал ӕрвитон. Уымӕй уӕлдай ма мӕ хъуыди мӕ удыхъӕд аивын: хъуамӕ ӕгъатыр ӕмӕ хылмондаг мауал уыдаин. Ӕмбӕрстон ӕй, ивын мӕ кӕй хъӕуы, фӕлӕ уӕддӕр мӕ хъуыддӕгтӕ нӕ уагътон.

Мӕ цард цӕхгӕр фӕивта, иухатт аст адӕймагимӕ куы фӕхыл дӕн, уӕд. Хъуыды кӕнын, уынджы астӕу куыд ахаудтӕн, къахӕй мӕ куыд цавтой ӕмӕ мын мӕ сӕр куыд хостой. Ӕнхъӕлдтон, ӕмӕ удӕгасӕй нал баззайдзынӕн, ӕмӕ скуывтон: «Йегъовӕ, ныххатыр мын кӕн, дӕ Ныхасӕн дын фаг кӕй нӕ аргъ кодтон, уый тыххӕй.  Дзырд дын дӕттын: куы фервӕзон, уӕд Библи Йегъовӕйы Ӕвдисӕнтимӕ ахуыр кӕндзынӕн ӕмӕ мӕ цард аивдзынӕн». Диссаг, фӕлӕ аирвӕзтӕн. Ӕз мӕ ныхас сӕххӕст кодтон, ӕмӕ Библи ахуыр кӕнын райдыдтон.

Англимӕ ацыдтӕн 2006 азы. Фӕндыд мӕ фаг ӕхца бакусын, цӕмӕй фӕстӕмӕ Польшӕмӕ ӕрцыдаин ӕмӕ уӕлдӕр юридикон ахуырад райстаин. Библи куы ахуыр кодтон, уӕд мын дзы иу стих мӕ зондахаст цӕхгӕр фӕивта. Апостол Павел ныффыста: «Ӕз ӕппӕт дӕр банымадтон ницӕуыл, уымӕн ӕмӕ ссардтон, ӕппӕтӕй зынаргъдӕр цы у, уый – ӕз базыдтон мӕ Хицау Йесо Чырыстийы. Уый тыххӕй ӕз алцыдӕр ныууагътон ӕмӕ сӕ нымайын быроныл, цӕмӕй ссарон Чырыстийы» (Филиппӕгтӕм 3:8). Апостол Павел дӕр мӕнау закъӕттӕ ахуыр кодта, ӕмӕ уый дӕр уыд тынг ӕгъатыр адӕймаг (Хъуыддӕгтӕ 8:3). Фӕлӕ хуыздӕр цард цы у, уый бамбӕрста: Хуыцауӕн лӕггад кӕнын ӕмӕ, Чырысти куыд цард, афтӕ цӕрыныл архайын. Павелы цардыл хъуыды кӕнгӕйӕ мӕм бахъардта, стыр бынат ӕмӕ мын тыхми амонд кӕй не ’рхӕсдзысты. Ӕз ӕрцыдтӕн ахӕм хъуыдымӕ, ӕмӕ кӕд Павелӕн йӕ бон аивын баци, уӕд мӕнӕн дӕр бауыдзӕн. Ӕмӕ уӕд сфӕнд кодтон Английы баззайын, мӕ дарддӕры ахуыр та ферох кӕнын.

Йегъовӕйы тыххӕй мӕ зонындзинӕдтӕ цас фылдӕр кодтой, уыйас мӕ тынгдӕр фӕндыд, цӕмӕй йӕм баввахс уыдаин. Мӕ зӕрдӕ мын тынг бацагайдта, аивын кӕй фӕнды, уыдонӕн сӕ тӕригъӕдтӕ кӕй ныххатыр кӕндзӕн, уый (Хъуыддӕгтӕ 2:38). 1 Иоанны 4:16 стихы та фыст ис, Хуыцау у уарзондзинад, зӕгъгӕ. Ӕмӕ уыцы стихыл куы хъуыды кодтон, уӕд мӕм хъарын райдыдта, Хуыцау фыддзинадӕй йе сӕфт цӕмӕн уыны, уый.

Йегъовӕйы Ӕвдисӕнтӕ сӕхи куыд дардтой, уый дӕр мӕ зӕрдӕмӕ тынг фӕцыд. Библийы уагӕвӕрдтӕм гӕсгӕ цӕрыныл кӕй архайынц, уый уыдтон ӕмӕ мӕн дӕр фӕндыд, цӕмӕй ӕз дӕр уыцы уарзӕгой ӕмӕ зӕрдӕхӕлар адӕмӕй уыдаин. Цавӕрдӕр хъуыддӕгты мӕ бахъуыди бирӕ тыхтӕ ӕрӕвӕрын, стӕй мӕ царды цыдӕртӕ аивтон, ӕмӕ 2008 азы донаргъуыд райстон ӕмӕ Йегъовӕйы Ӕвдисӕн сдӕн.

Ӕз кадмӕ бӕллыдтӕн ӕмӕ уыдтӕн хылмондаг адӕймаг, кодтон наркотиктӕ, нозтӕй бӕрц нӕ зыдтон ӕмӕ футболыл ӕрратӕ кодтон. Фӕлӕ Библийы фӕрцы Хуыцауӕн лӕггад кӕнын райдыдтон ӕмӕ ныр цингӕнгӕйӕ иннӕтӕн Библийы ахуырӕдтӕ амонын. Футболмӕ кӕсын ныр дӕр уарзын. Фӕлӕ мын раздӕр цы бынаты уыд, уыцы бынаты мын нал ис.

Ӕз мӕ цард баиу кодтон иу дзӕбӕх чызгимӕ, Йегъовӕйы Ӕвдисӕнимӕ, Эстеримӕ, ӕмӕ амондджын стӕм. Мах бирӕ уарзӕм ам, Английӕн йӕ цӕгат-ныгуылӕн хайы, польшӕйаг ӕвзагыл дзурӕг адӕмӕн Библийы рӕстдзинад амонын. Мӕ цардӕй афтӕ райгонд никуыма уыдтӕн. Мӕ цӕсгом Хуыцауы раз у сыгъдӕг, цӕмӕн цӕрын, уый зонын, ӕмӕ мӕ цард ӕнӕпайда хъуыддӕгтыл нал цӕуы.