Kico Bijbel Ta Bisa Tocante Pandemia?
Loke Bijbel ta bisa
Bijbel a profetisa cu durante e ultimo dianan lo tin pest, esta, tur sorto di maleza y pandemia, cu lo plama na hopi luga. (Lucas 21:11) Pero e pandemianan ey no ta castigo di Dios. Al contrario, pronto Dios lo uza su Reino pa caba cu tur problema di salud, incluso pandemia.
Bijbel a profetisa cu lo tin pandemia?
Bijbel no a profetisa tocante niun maleza of pandemia specifico. Por ehempel, Bijbel no ta papia di COVID-19, AIDS of grip Spaño. Pero si el a profetisa cu lo tin “pest” y “maleza mortal.” (Lucas 21:11; Revelacion 6:8) Bijbel ta bisa cu nan lo sosode den “e ultimo dianan”, cu ta ser yama tambe “conclusion di e era aki.”—2 Timoteo 3:1; Mateo 24:3.
Dios a yega di castiga hende cu maleza?
Bijbel ta menciona algun caso caminda Dios a uza maleza pa castiga hende. Por ehempel, el a laga algun hende haya lepra. (Numbernan 12:1-16; 2 Reynan 5:20-27; 2 Cronicanan 26:16-21) Pero eseynan tabata caso isola y e maleza no a plama y afecta hende inocente. Mas bien, e malezanan ey tabata castigo specifico riba cierto hende cu a echt rebeldia contra Dios.
E pandemianan cu tin awe ta castigo di Dios?
No. Tin hende ta bisa cu den e tempo aki Dios ta uza pandemia y otro maleza pa castiga hende. Pero Bijbel no ta siña esey. Dicon nos ta bisa asina?
Pa cuminsa, algun persona fiel na Dios—tanto den tempo biblico como awe—a sufri di maleza. Por ehempel, 1 Timoteo 5:23 ta menciona un cristian fiel cu yama Timoteo cu tabata malo hopi biaha. Pero Bijbel no ta bisa cu esey tabata pasobra Dios tabata rabia cu ne. Awe ta pasa mescos. Tin persona fiel na Dios cu ta bira malo of pega cu maleza. Hopi biaha, e personanan ey a pega cu maleza pasobra nan tabata na e luga robes na e momento robes.—Eclesiastes 9:11, Traduccion di Mundo Nobo.
Ademas, Bijbel ta siña cu ainda no a yega e momento pa Dios castiga hende malbado. Mas bien, nos ta bibando awor den “un dia di salbacion”, es decir, den e tempo cu Dios ta duna tur hende un invitacion caluroso pa siña conoc’e y haya salbacion. (2 Corintionan 6:2) E ta haci esey pa medio di un campaña mundial di predicacion cu ta plama un mensahe masha positivo: ‘e bon noticia di e Reino.’—Mateo 24:14.
Pandemia lo caba un dia?
Si. Bijbel ta profetisa cu pronto lo yega e tempo cu niun hende lo no bira malo mas. Dios lo uza su Reino pa cura tur problema di salud. (Isaias 33:24; 35:5, 6) Lo no tin sufrimento, dolor ni morto mas. (Revelacion 21:4) Dios lo resucita hende cu a muri. E hendenan ey lo gosa di bon salud y lo biba den paradijs aki riba Tera.—Salmo 37:29; Echonan 24:15.
Texto di Bijbel tocante maleza
Mateo 4:23: “[Hesus] a pasa den henter Galilea, mientras cu e tabata siña hende den nan sinagoganan y tabata predica e bon noticia di Reino y cura tur sorto di maleza y tur sorto di enfermedad cu e hendenan tabatin.”
Nificacion: E milagernan di Hesus a demostra na escala chikito loke pronto e Reino di Dios lo haci pa henter humanidad.
Lucas 21:11: “Lo tin pest.”
Nificacion: Parti di e señal cu nos ta den e ultimo dianan ta cu lo tabatin maleza plama na hopi luga.
Revelacion 6:8: “Ata un cabay bleek; y esun sinta riba dje tabatin e nomber Morto. Y Graf tabata sigui djis su tras. Y a duna nan autoridad pa mata . . . cu maleza mortal.”
Nificacion: E profecia na Revelacion tocante e cuater coredornan di cabay ta mustra cu lo tabatin pandemia den nos tempo.
You May Also Like
E TOREN DI VIGILANCIA
Sufrimento Ta un Castigo di Dios?
Dios ta castiga hende cu, entre otro, maleza of desaster natural pa nan picanan?
E TOREN DI VIGILANCIA
Ki Dia e Fin Ta Bin? Loke Hesus A Bisa
Bo ta mira e sucesonan cu Hesus a profetisa?
PREGUNTA CU BIJBEL TA CONTESTA
Kico Ta e Señal di “e Ultimo Dianan”, of di “e Tempo Stipula di e Fin”?
Bijbel ta papia di varios suceso cu lo yuda nos haya sa si nos ta bibando den e ultimo dianan.
PREGUNTA CU BIJBEL TA CONTESTA
Kico e Reino di Dios Lo Haci?
Haya sa ki bendicion bo por spera ora e Reino di Dios ta goberna Tera.
