ماں پیو دی عزت کرن چ کیہہ کجھ شامل اے؟
پاک کلام دا جواب
پاک کلام چ کئی واری ایہہ حکم آیا اے کہ سانوں اپنے ماں پیو دی عزت کرنی چاہی دی اے۔ (خروج 20:12؛ اِستثنا 5:16؛ متی 15:4؛ اِفسیوں 6:2، 3) ماں پیو دی عزت کرن چ ایہہ چار اہم کم شامل نیں:
اوہناں دی قدر کرو۔ جدوں تُسی اپنے ماں پیو دے اوہناں سارے کماں لئی شکرگزاری ظاہر کردے او جیہڑے اوہناں نے تواڈے لئی کیتے نیں تے اِنج تُسی اوہناں لئی عزت ظاہر کردے او۔ اپنے ماں پیو دی رہنمائی لئی قدر ظاہر کرن نال وی تُسی اوہناں لئی عزت ظاہر کردے او۔ (امثال 7:1، 2؛ 23:26) پاک کلام چ دَسیا گیا اے کہ سانوں اپنے ماں پیو تے فخر ہونا چاہی دا اے۔—امثال 17:6۔
اوہناں دے اِختیار نُوں منو۔ خاص کر چھوٹی عمر چ اپنے ماں پیو لئی عزت ظاہر کرن دا اِک طریقہ ایہہ وے کہ تُسی اوہناں دے اِختیار نُوں منو جیہڑا خدا نے اوہناں نُوں دِتا اے۔ کُلسّیوں 3:20 چ بچیاں نُوں ایہہ نصیحت کیتی گئی اے: ہر معاملے چ اپنے ماں پیو دے فرمانبردار ہووو کیونکہ ایہہ مالک نُوں پسند اے۔ یسوع نے وی چھوٹی عمر چ خوشی نال اپنے ماں پیو دی فرمانبرداری کیتی۔—لُوقا 2:51۔
اوہناں دا احترام کرو۔ (احبار 19:3؛ عبرانیوں 12:9) ماں پیو دا احترام کرن چ ایہہ شامل اے کہ تُسی اوہناں نُوں کیہو جہیاں گلاں کہندے او تے کیس انداز یاں لہجے چ کہندے او۔ ایہہ سچ اے کہ کجھ ماں پیو کدی کدار ایہو جیہا رویہ ظاہر کردے نیں جدی وجہ توں بچیاں نُوں اوہناں دا احترام کرنا مشکل لگدا اے۔ پر فیر وی بچیاں نُوں اپنے ماں پیو نال بدتمیزی نئیں کرنی چاہی دی تے ایہو جہے کم نئیں کرنے چاہی دے جنہاں توں ظاہر ہوئے کہ اوہ اوہناں دا احترام نئیں کردے۔ (امثال 30:17) پاک کلام چ دَسیا گیا اے کہ ماں پیو دی بےعزتی کرنا اِک وڈا گُناہ اے۔—متی 15:4۔
اوہناں دِیاں ضرورتاں دا خیال رکھو۔ جدوں ماں پیو وڈیرے ہو جاندے نیں تے اوہناں نُوں ساڈی مدد دی لوڑ ہوندی اے۔ ماں پیو دا احترام کرن چ ایہہ وی شامل اے کہ اَسی اوہناں دی ہر ضرورت دا خیال رکھیے۔ (1-تیمُتھیُس 5:4، 8) مثال لئی، یسوع نے اپنی جان قربان کرن توں تھوڑی دیر پہلاں اپنی ماں دی دیکھبھال دا بندوبست کیتا۔—یوحنا 19:25-27۔
ماں پیو دی عزت کرن بارے کجھ غلطفہمیاں
غلطفہمی: ماں پیو دی عزت کرن دا مطلب ایہہ وے کہ تُسی اپنی شادیشُدہ زندگی دے فیصلے کرن دا اِختیار اوہناں نُوں دے دَوو۔
حقیقت: پاک کلام چ دَسیا گیا اے کہ شادی دا بندھن باقی سارے رشتیاں نالوں زیادہ اہم اے۔ پیدائش 2:24 چ لکھیا اے: مرد اپنے ماں پیو نُوں چھڈ کے اپنی بیوی نال رہوے گا۔ (متی 19:4، 5) ایہہ گل سچ اے کہ شادیشُدہ جوڑے اپنے ماں پیو یاں سس سوہرے دے مشوریاں تے عمل کر کے فائدہ حاصل کر سکدے نیں۔ (امثال 23:22) پر میاں بیوی نُوں ایہہ فیصلہ کرن دا حق اے کہ اوہ اپنے رشتے داراں نُوں اپنی شادیشُدہ زندگی چ کیس حد تک بولن دی اجازت دین گے۔—متی 19:6۔
غلطفہمی: ہر گل دا اِختیار تواڈے ماں پیو کول اے۔
حقیقت: ایہہ سچ اے کہ خدا نے ماں پیو نُوں خاندان دا اِختیار دِتا اے۔ پر انساناں کول جیہڑا اِختیار اے، اوہدی اِک حد اے تے کدی وی اوہ اِختیار خدا دے اِختیار نالوں ودھ کے نئیں ہو سکدا۔ مثال لئی، جدوں وڈی عدالت نے یسوع دے شاگرداں نُوں خدا دی نافرمانی کرن دا حکم دِتا تے اوہناں نے جواب دِتا: ساڈے لئی خدا دا کہنا مننا انساناں دا کہنا منن نالوں زیادہ ضروری اے۔ (اعمال 5:27-29) ایسے طرحاں بچے مالک دی مرضی دے مطابق اوہناں ساریاں گلاں چ اپنے ماں پیو دے فرمانبردار رہندے نیں جیہڑیاں خدا دے معیاراں دے خلاف نئیں نیں۔—اِفسیوں 6:1۔
غلطفہمی: ماں پیو دی عزت کرن لئی ضروری اے کہ تُسی اوہناں دے مذہبی عقیدیاں نُوں منو۔
حقیقت: پاک کلام چ حوصلہافزائی کیتی گئی اے کہ اَسی جیہڑیاں گلاں سکھنے آں، اوہناں نُوں اَزمائیے کہ کیہہ اوہ سچیاں ہے نیں یاں نئیں۔ (اعمال 17:11؛ 1-یوحنا 4:1) جیہڑا بندہ اِنج کردا اے، ہو سکدا اے کہ اوہ اِک ایہو جہے مذہب نُوں اپنان دا فیصلہ کرے جیہڑا اوہدے ماں پیو دے مذہب توں فرق ہووے۔ پاک کلام چ خدا دے کئی ایہو جہے وفادار بندیاں دا ذکر اے جنہاں نے اپنے ماں پیو دے مذہب نُوں نئیں اپنایا، جیویں کہ ابراہام، رُوت تے پولُس رسول۔—یشوع 24:2، 14، 15؛ رُوت 1:15، 16؛ گلتیوں 1:14-16، 22-24۔
غلطفہمی: ماں پیو دی عزت کرن چ ایہہ شامل اے کہ تُسی اوہناں ریتاں رواجاں چ حصہ لوو جنہاں چ اوہ پیو دادیاں دی پرستش کردے نیں۔
حقیقت: پاک کلام چ لکھیا اے: صرف یہوواہ اپنے خدا دی پرستش کرو تے صرف اوہدی عبادت کرو۔ (لُوقا 4:8) جیہڑا بندہ اپنے پیو دادیاں دی پرستش کردا اے، اوہ خدا نُوں ناراض کردا اے۔ ایہدے علاوہ پاک کلام چ دَسیا گیا اے کہ مُردے کجھ وی نئیں جان دے۔ اوہناں لئی جیہڑا احترام وکھایا جاندا اے، اوہناں نُوں اوہدے بارے کجھ نئیں پتہ۔ اوہ نہ تے ساڈی کوئی مدد کر سکدے نیں تے نہ ای سانوں نقصان پونچا سکدے نیں۔—واعظ 9:5، 10؛ یسعیاہ 8:19۔
ایہہ وی ویکھو
پاک کلام چوں سوال جواب
پاک کلام چ وڈیرے ماں پیو دی دیکھبھال کرن بارے کیہہ دَسیا گیا اے؟
بائبل چ خدا دے ایہو جہے بندیاں دِیاں مثالاں نیں جنہاں نے اپنے وڈے ڈیریاں دی بڑی چنگی طرحاں دیکھبھال کیتی سی۔
ساڈے بارے معلومات
ساڈی کسے عبادت تے جاؤ۔
ساڈیاں عبادتاں بارے ہور جانو۔ اپنے علاقے چ عبادت دا پتہ لبھو۔