ඔව්. ඔප්පු වෙනවා. “මෙලොවට ගැලවුම්කරු” විදිහට එන “නායකයා වන මෙසියස්” ගැන තිබ්බ අනාවැකි විශාල ප්‍රමාණයක් යේසුස් මේ පොළොවේ ඉද්දීම ඉටු වුණා. (දානියෙල් 9:25; 1 යොහන් 4:14) යේසුස් මිය ගියාට පස්සෙත් මෙසියස්, ඒ කියන්නේ ගැලවුම්කරු ගැන තිබ්බ අනාවැකි යේසුස් තුළින් ඉටු වුණා.—ගීතාවලිය 110:1; ක්‍රියා 2: 34-36.

•  “මෙසියස්” කියන වචනයේ තේරුම මොකක්ද?

•  ගැලවුම්කරු ගැන සඳහන් අනාවැකි කිහිපදෙනෙක් තුළින් ඉටු වෙන්න පුළුවන්ද?

•  ගැලවුම්කරු අනාගතයේදී එන කෙනෙක් වෙන්න බැරිද?

•  බයිබලයේ ගැලවුම්කරු ගැන අනාවැකි කීයක් තියෙනවාද?

•  යේසුස් තුළින් ඉටු වුණ ගැලවුම්කරු ගැන සඳහන් අනාවැකි සමහරක්

 “මෂියා” (මෙසියස්) කියන හෙබ්‍රෙව් වචනයටත් ඒකට ග්‍රීක භාෂාවෙන් කියන “ක්‍රිස්ටොස්” (ක්‍රිස්තුස්) කියන වචනයටත් තියෙන්නේ එකම අදහස. ඒ “විශේෂ පැවරුමක් ඉටු කිරීමට පත් කළ තැනැත්තා” කියන එකයි. ඒ නිසා “යේසුස් ක්‍රිස්තුස්” කියලා කිව්වාම ඒකෙන් අදහස් කරන්නේ “විශේෂ පැවරුමක් ඉටු කිරීමට පත් කළ තැනැත්තා වන යේසුස්,” එහෙමත් නැත්නම් “ගැලවුම්කරු වන යේසුස්” කියන එකයි.

 අතීතයේදී කෙනෙක්ව යම් විශේෂ පැවරුමක් ඉටු කරන්න පත් කරද්දී එයාගේ හිසට තෙල් වත් කරලා එයාව අභිෂේක කළා. (ලෙවී කතාව 8:12; 1 සාමුවෙල් 16:13) ඒත් දෙවියන් යේසුස්ව අභිෂේක කළේ හිසට තෙල් වත් කරලා නෙමෙයි. දෙවියන් ඒක කළේ තමන්ගේ බලය මාර්ගයෙන්. (මතෙව් 3:16) දෙවියන් යේසුස්ව මෙසියස්, ඒ කියන්නේ ගැලවුම්කරු හැටියට අභිෂේක කරලා ඔහුට විශාල බලයක්, අධිකාරියක් දුන්නා.—ක්‍රියා 2:36.

 බැහැ. උදාහරණෙකට මෙහෙම හිතන්න. කිහිපදෙනෙක්ට එකම ඇඟිලි සලකුණ තියෙන්න විදිහක් නැහැ. ඒ හා සමානව බයිබලයේ ගැලවුම්කරු ගැන සඳහන් අනාවැකිවල ඉටුවීම සිද්ධ වෙන්නේ එක් කෙනෙක් තුළින් විතරයි. කිහිපදෙනෙක් තුළින් ඒවා ඉටු වෙන්නේ නැහැ. ඒ අනාවැකි ඉටු වෙන්නේ යේසුස් ක්‍රිස්තුස් තුළින් විතරයි. ඒත් බයිබලයේ මෙහෙම අනතුරු අඟවලා තියෙනවා. “බොරු ක්‍රිස්තුස්වරුන්ද බොරු අනාගතවක්තෘවරුන්ද මතු වී හැකි නම් තෝරාගත් අයව පවා නොමඟ යැවීම සඳහා මහත් ලකුණු හා පුදුම දේ පෙන්වයි.”—මතෙව් 24:24.

 බැහැ. මොකද ගැලවුම්කරු විදිහට දෙවියන් තෝරාගත්ත තැනැත්තා, ඒ කියන්නේ මෙසියස් ඊශ්‍රායෙලයේ හිටිය දාවිත් රජුගේ පෙළපතින් පැවතෙන කෙනෙක් කියලා අනාවැකිවල සඳහන් වෙනවා. (ගීතාවලිය 89:3, 4) අතීත යුදෙව් පෙළපත් වාර්තා යේසුස් මේ පොළොවේ ජීවත් වුණ කාලයේදීත් තිබුණා. තමන් දාවිත්ගේ පෙළපතට අයිතියි කියලා යේසුස් බය නැතුව කිව්වා. ඒක බොරුවක් නම් යේසුස්ගේ සතුරන් අනිවාර්යයෙන්ම ඒ පෙළපත් වාර්තාවල තියෙන තොරතුරු පෙන්වලා යේසුස් කියපු දේ බොරුවක් කියලා ඔප්පු කරනවා. ඒත් එයාලට ඒක කරන්න බැරි වුණා. (මතෙව් 22:41-46) යුදෙව් පෙළපත් වාර්තා දැන් නැති නිසා තමන් දාවිත්ගේ පෙළපතට අයිතියි කියලා කිසිම කෙනෙකුට ඔප්පු කරන්න බැහැ. සමහරවිට ක්‍රිස්තු වර්ෂ 70දී රෝමවරුන් යෙරුසලම යටත් කරගද්දී ඒ පෙළපත් වාර්තා විනාශ වෙන්න ඇති.  a

 මෙසියස්, ඒ කියන්නේ ගැලවුම්කරු ගැන අනාවැකි මෙච්චරක් තියෙනවා කියලා නිශ්චිතවම කියන්න අමාරුයි. මොකද ගැලවුම්කරු ගැන බයිබලයේ පැහැදිලිවම සඳහන් අනාවැකි වුණත් එක් එක් කෙනා ගණන් කරන විදිහ වෙනස් වෙන්න පුළුවන්. උදාහරණෙකට යෙසායා 53:2-7 දක්වා තියෙන කොටසේ පැමිණීමට නියමිත ගැලවුම්කරු ගැන තොරතුරු ගොඩක් සඳහන් වෙනවා. සමහර අය ඒ මුළු කොටසම එක අනාවැකියක් විදිහට සලකන්න පුළුවන්. තවත් අය ඒ හැම අදහසක්ම වෙන වෙනම අනාවැකි විදිහට සලකන්නත් පුළුවන්.