1. Qolasiyaasi Sokka 2:4, 8 yitanno garinni, Sheexaanu surrenke woshshaadate woˈnaalannohu hiittoonniiti?

SHEEXAANU Yihowara badhe wodhinammora hasiˈranno. Hakko daafira, isi hedonke daafate yaano surrenke woshshaade isira hajajammeemmo gede assate sharramanno. Sheexaanu baxisannonke coyira doogamme, isi hedo harunsineemmo gede assate woˈnaalanno.—Qolasiyaasi Sokka 2:4, 8 nabbawi.

2-3. (a) Qolasiyaasi Sokka 2:8 noo qorowishsha lashshi assa hasiissannonkekkihu mayiraati? (b) Konni birxichira maa ronseemmo?

² Sheexaanu ninkeno soˈrisiisara dandaanno? Ee dandaanno! Phaawuloosi Qolasiyaasi Sokka 2:8 noo qorowishsha borreessinohu ammaninokki mannira diˈˈikkino. Isi tenne sokka borreessinohu qullaawu ayyaaninni buuramino Kiristaaniraati. (Qol. 1:2, 5) Hakkawari Kiristaana Sheexaanu soˈrisiisansara dandaanno; xaa yannara isi ninke hakkawarinni roore soˈrisiisankera dandaanno. (1 Qor. 10:12) Togo yineemmohu mayiraati? Korkaatuno Sheexaane uullara tungoonni; hattono isi Maganunnita ammanantino soqqamaasine soˈrisiisate qodhe kaino. (Aju. 12:9, 12, 17) Qoleno heeˈnoommohu bushunna awaawuranno manni ‘bunshete aana bunshe ledanni’ noo yannaraati.—2 Xim. 3:1, 13.

³ Konni birxichira, Sheexaanu hedonke daafate ‘awaawursha’ horoonsiˈrannohu hiittoonniitiro ronseemmo. Qoleno, isi horoonsiˈranno “xagarro” woy gano giddo sase laˈneemmo. (Efe. 6:11) Aananno birxichira kayinni, Sheexaanu xagarro hedonke daaffinoha ikkiro, tenne qeeˈla dandiineemmohu hiittoonniitiro  ronseemmo. Xa hanni balanxe Israeele Hexxote Gobba eˈu gedensaanni Sheexaanu soˈrisiisinonsa garanna tennenni ninke maa ronseemmoro laˈno.

4-6. Marro 11:10-15 kultanno garinni, Israeele Hexxote Gobba eˈu yannara, Gibirinnu looso lainohunni maa assa hasiissinonsa?

⁴ Sheexaanu Israeele kaphu maganna magansidhanno gede asse soˈrisiisino. Isi togo assinohu hiittoonniiti? Sheexaanu Israeele sagale hasidhannota afino; konnira insa soˈrisiisate tenne hasattonsa horoonsiˈrino. Israeele Hexxote Gobba eˈu yannara, irsha loosidhannota haaro doogo rosa hasiissinonsa. Insa Gibitsete noo yannara, Abbayi lagi waa darte gatira eessidhe loosidhanno. Hexxote Gobbara kayinni gaware irsha loosidhannohu lagu waa horoonsidhe ikkikkinni wogga agare gananno xeeninna lojunniiti. (Marro 11:10-15 nabbawi; Isa. 18:4, 5) Hakko daafira, Israeele haaro gibirinnu hayyo rosa hasiissinonsa. Gibirinnu daafira egenno noonsahu batinyu manni halalla reyino daafira, loosiˈnanni gara rosa shota diˈˈikkitinonsa.

⁵ Yihowa Israeele Hexxote Gobba eˈanno woyite coyi bashsho gede ikkannokkita balaxe kulinonsa. Hakkiinni, “Kaaliiqiwiinni faffine wole gobba maganna magansidhinannikki gedenna insara kumbuultinannikki gede agadhe” yee qorowisiisinonsa. (Mar. 11:16, 17) Tini hedo iimi adda laˈniro gibirinnu loosi ledo xaadooshshe afidhinota lawa hooggara dandiitanno. Ikkina Yihowa haaro gibirinnu hayyo daafira kulanni heeˈre, kaphu maganna magansidhannokki gede qorowisiisinohu mayiraati?

⁶ Yihowa, Israeele qooxeessinsara heeˈrannohu iso magansiˈrannokki mannita gibirinnu hayyo rosate doogantannota afino. Qoleno qooxeessinsara heeˈranno manni Gibirinnu  loosinni Israeele roorannotinna Maganu manni insawiinni rosa dandaannoti egennantinote; ikkirono tini lamenta afidhino. Kanaani gobba gaware Baˈˈaali magansidhannore ikkansa hedonsa daaffino. Insa gordu anninna xeena ganannohu Baˈˈaaliiti yite ammantanno. Yihowa, mannisi tenne kaphu ammananni dogamara dihasiˈrino. Israeele kayinni duucha higge Baˈˈaali magansiˈra doodhitino. (Kir. 25:3, 5; Eje. 2:13; 1 Mot. 18:18) Hanni Sheexaanu Israeele woshshaadinohu hiittoonniitiro laˈno.

7. Israeele Hexxote Gobba eˈu yannara ammanansa fonqolantinohu hiittoonniiti?

⁷ Umihunni Sheexaanu, Israeele xeena hasidhannota afino daafira, tenne kalaqamu hasattonsa horoonsiˈre soˈrisiisinonsa. Diru kiiro Hexxote Gobbara Dotteessu agani jeefonni kayise Wocawaaru agani geeshsha xeena digananno yaa didandaanno. Israeele heeshshote hasiissannonsa sagalenna lowo laalcho afiˈra dandiitannohu Birru aganinni hanafe gananno xeeninniiti. Sheexaanu, Israeele lowo laalcho afiˈrate qooxeessinsara heedhannoti Yihowa magansidhannokki daga harunsitanno bude harunsa hasiissannonke yite heddanno gede asse soˈrisiisinonsa. Tini Yihowa magansidhannokki daga, magannansa xeena gantannonsa gede mito ammaˈnote bude harunsa hasiissannonke yite heddanno. Mitu Yihowa ammanannokkihu Israeelete manni moollete yanna seeddannokki gede assa dandiinannihu kaphu magannara mitore assiniro callaati yite heddino; hakko daafira insa kaphu magano ikkinoha Baˈˈaali magansiˈra hanaffino.

8. Sheexaanu horoonsiˈrinoti layinki hayyo hiittenneeti? Xawisi.

⁸ Layinkihunni Sheexaanu, Israeele amanyoote bainore assitanno gede fonqolinonsa. Yihowa magansidhannokki daga, magansidhanno woyite maaeela coye assitanno. Tenne mancaˈˈa magansiˈra magansiˈnanni woyite, labballuno meentuno qullaawu mini fotaano ledo fooranno. Yihowa magansidhannokki daga, labbaahu labbaahu woy meyati meyate ledo assannoha siimu xaadooshshenna wolu gari foorre lashshi assite agurtino; hattono togoo assooti qarra afiˈrinokkihu gede assite laˈanno. (Mar. 23:17, 18; 1 Mot. 14:24) Tini daga, magansidhanno woyite togoo coye assituro, magannansa uulla shaqqado ikkitanno gede assitanno yite ammantanno. Lowohu Israeelete manni tini daga harunsitannohu foorre woˈmitinohu magansiˈrate budinni doogamino daafira, kaphu maganna magansiˈra hanafino. Konni garinni, Sheexaanu woshshaadinonsa.

9. Hoosei 2:16, 17 kultanno garinni, Sheexaanu Israeele Yihowa habbanno gede assinohu hiittoonniiti?

⁹ Sayikkihunni Sheexaanu, Israeelete Yihowa ayimma dahaabbannonsa gede asse soˈrisiisinonsa. Masaalaanchu Ermiyaasi waro, Yihowa kaphaano masaalaano Baˈˈaalinni kainohunni mannisi Isi suˈma hawanno gede assate woˈnaaltinota coyiˈrino. (Erm. 23:27) Maganu daga Yihowa suˈma woshsha agurte, suˈmasi Baˈˈaali (“Anna” woy “Mooticha” yaate) yaanno suˈminni riqibbukki digattino. Konninni kainohunni Israeelete Yihowanna Baˈˈaali mereero noo badooshshi dahaawinonsa daafira, Baˈˈaali magansiˈra Yihowa magansiˈra ledo karsiissino.—Hoosei 2:16, 17 nabbawi.

10. Sheexaanu xaa yannara hiittenne woshshaado horoonsiˈranno?

¹⁰ Sheexaanu hunda horoonsiˈri hayyo xaa yannarano horoonsiˈranno. Isi mannu oosota kalaqamu hasatto horoonsiˈre, foorre batise, hattono Yihowa ayimma dahaabbannonsa gede asse manna woshshaadate woˈnaalanno. Hanni balanxe Sheexaanu mannu Magano deanno  gede assate woˈnaalannohu hiittoonniitiro laˈno.

11. Sheexaanu mannaho Yihowa ayimma dahaabbanno gede assinohu hiittoonniiti?

¹¹ Sheexaanu Yihowa ayimma dahaabbanno gede assanno. Yesuusi soqqamaasine reyitu gedensaanni, ninke Kiristaanaho yaannohu batinyu manni kaphu roso tuqisa hanafino. (Soq. 20:29, 30; 2 Tes. 2:3) Kuri kaadaasine halaalaanchu Magani ayimma dahaabbanno gede assitino. Lawishshaho, insa Qullaawu Maxaafi tironsa giddonni Maganu suˈma fushshite hunte “Mooticha” yaanno suˈminni riqibbino. Maganu suˈmi bayicho Mooticha yaannoha riqiwansa, Qullaawa Maxaafa nabbawanno mannira Yihowanna Qullaawa Borro giddo kulloonniri wole “mootoolla” mereero noo badooshshi dahaawannonsa gede assitino. (1 Qor. 8:5) Insa Yihowarano Yesuusirano “Mooticha” yaanno suˈma horoonsidhino; tini Yihowanna Beettisi babbaxxitinore ikkitinoti dahaabbanno gede assitino. (Yoh. 17:3) Qoleno kuni halaali dahaawasi, Sillaase yinannihu Maganu Qaali giddo nookki rosi xintamanno gede assitino. Konninni kainohunni batinyu manni Maganu fojo ikkino daafira iso afa didandiinanni yee ammananno. Ikkollana kuni waajjo kaphooti!—Soq. 17:27.

12. Kaphu ammaˈno mayi halaˈlanno gede assitino? Roomu Sokka 1:28-31 kultanno garinni tini ikkito mayi qarra abbitino?

¹² Sheexaanu mannu amanyoote bainore assanno gede fonqolanno. Hundi Israeele waro Sheexaanu kaphu ammaˈno horoonsiˈre amanyoote bainori halaˈlanno gede assino. Xaa yannarano isi hatto assanno. Kaphu ammaˈno mancaˈˈa amanyoote laˈanni sammi yitino; hattono mannu togoo assooti qarra diafiˈrino yee hedanno gede assitino. Konninni kainohunni, Magano magansiˈnanni heeˈnoommo yaannohu batinyu manni dahaawinokkiha Maganunniha amanyootu seera harunsa agurino. Soqqamaasinchu Phaawuloosi Roomu Kiristaanira borreessino sokkara, tini ikkito mayi qarra abbitannoro xawisino. (Roomu Sokka 1:28-31 nabbawi.) “Saalsiisanno coye” yiniri giddo mittu, labbaahu labbaahu ledo woy meyati meyate ledo assannoho siimu xaadooshsheetinna woˈmunku gari foorreeti. (Rom. 1:24-27, 32; Aju. 2:20) Ninke kayinni Qullaawu Maxaafi roso seekkine cuˈmira hasiissannonke!

13. Sheexaanu horoonsiˈrannoti wole hayyo hiittenneeti?

 ¹³ Sheexaanu kalaqamu hasattonke horoonsiˈre woshshaadankera woˈnaalanno. Ninkerano ikko maatenkera hasiisannore wonshiˈrate kaaˈlannonke roso rosate hasiˈranke bunshe diafidhino. (1 Xim. 5:8) Loosoho kaaˈlitanno egenno afiˈrate, rosu minira eˈne diinaggaambe rosa hasiissannonkeha ikkara dandaanno. Ikkollana qoropha hasiissannonke. Duucha gobbara rosaano rossannohu kaaˈlitanno ogimma calla ikkikkinni alamete hayyooti. Rosaanote Maganu noota huluullantanno gedenna Maganu Qaale ayirrissannokki gede assanno roso rosiinsanninsa. Qoleno egennaammu baalu heeshsho dagginohu suutu soorronniiti yite ammantanno yine kullanninsa. (Rom. 1:21-23) Togoo rosi, Maganu hayyo ledo sumuu diyaanno.—1 Qor. 1:19-21; 3:18-20.

14. Alamete hayyo maa jawaachishshanno?

¹⁴ Alamete hayyo Maganunniha xalala seera lashshi assinanni gede jawaachishshanno, hattono konni seeri ledo sumuu diyitanno. Alamete hayyo Maganu ayyaani guma laala agurre ‘maalu looso’ harunsineemmo gede jawaachishshanno. (Gal. 5:19-23) Tini hayyo mannu naaxxaleessanna booˈnaleessa ikkanno gede assitanno; tinino, ‘umonsa calla baxanno’ manni batiˈranno gede assitino. (2 Xim. 3:2-4) Maganu soqqamaasinesi jooguullenna umonsa heeshshi assitannore ikkitara hasiˈranno; naaxxa, booˈnanna meessaneeto calla baxa kayinni tenne akatta ledo sumuu diyitanno. (2 Sam. 22:28) Mitu yuniversite eˈˈe rosino Kiristaani, Maganu hedanno garinni heda agure alame heddanno garinni heda hanafino. Hanni tini abbitanno qarra leellishannoha mitto lawishsha laˈno.

15-16. Mitte rodoo woˈnaalshinni maa rosootto?

¹⁵ Mitte 15 saˈˈanno diro woˈma yanna soqqansho  soqqantino rodoo togo yitino: “Yihowa Farciˈraasincho ikkoommahura, yuniversite eˈˈe rosa gawajjitanno gara nabbawoomma, hattono macciishshoomma; ikkirono tenne amaale lashshi asse aguroomma. Tini amaale anera kaaˈlitannota diˈˈikkitino yee hedoomma.” Ikkina isera mayi qarri iillinose? Ise togo yite xawisse coyidhino: “Rosoho lowo yanna hasiissanno daafira, albi gede seeda yanna gaaˈme huuccatto assiˈra didandoomma; hattono lowo geeshsha daafursannoe daafira soqqameemma woyite manna danchu garinni hasaawisanna gambooshsheho seekke qixxaawa qarra ikkitinoe. Ikkollana, yuniversitete roso illachishaˈya Yihowa ledo nooe jaalooma huntanni noota huwatummati, agure fulate murciˈrumma. Qoleno hatto assoomma.”

¹⁶ Tini rodoo yuniversite ease hedose gawajjitinohu hiittoonniiti? Ise togo yitino: “Yuniversitete rosoomma rosi, wole manna hakko iso ammanate roduuwaˈya misheemma gede, dhukinsara aleenni ikkinore assaera hasiˈreemma gede, hattono insawa gambo giweemma gede assinoeta hedeemma woyite saaleemma. Tenne hedo qeeˈlate lowo yanna hasiissinoe. Tini, Maganu dirijjite qorowisiissannonkere lashshi assa, mageeshshi geeshsha gawajjitannoro huwateemma gede assitinoe. Yihowa ani umoˈya afoommahunni roore afinoe. Uyinoe amaale macciishshoommaro ma danchi baino!”

17. (a) Maa assate murciˈra hasiissannonke? (b) Aananno birxichira maa ronseemmo?

¹⁷ Ninkeno Sheexaanu alame tuqissannoti ‘mannu hayyonna awaawurshi woshshaadannonkekki gede agadhino.’ Sheexaanu soˈrisiisannonkekki gede woˈmante yannara qorophino. (1 Qor. 3:18; 2 Qor. 2:11) Isi, Yihowa dahaawannonke gede assankera wodhinoonke. Taalle nookkiha Yihowaha amanyootu seera harunsino. Sheexaanu dogeennanke, Yihowa amaale lashshi assineemmokki gede qorophino. Ikkollana alamete hedo gawajjitanni noonketa huwantummoro maa assa hasiissannonke? Aananno birxichira, Maganu Qaali ‘qiishote’ gede ikkitino hedonna rosicho qeelleemmo gede kaaˈlannonke gara ronseemmo.—2 Qor. 10:4, 5.