1. Baxannonke Anninke Yihowa faale haˈra dandiineemmohu hiittoonniiti?

YIHOWA lowo geeshsha baxannonke. (Yoh. 3:16) Ninkeno baxannonke Anninke faale haˈra hasiˈneemmo. Konni daafira, ‘wolu manni qarra uminkehu gede assine heda, rodiimmate baxillinni baxama, hattono shaqqaddanna jooguulle ikka’ hasiissannonke; qoleno baalunku mannira roorenkanni ‘ammanate’ roduuwinkera togoo akatta leellinsheemmo. (1 Phe. 3:8; Gal. 6:10) Ammanate roduuwinkera yaachishanno coyi iillannonsa woyite kaaˈlineemmonsa.

2. Konni birxichira maa ronseemmo?

² Yihowa jaalla ikka hasidhannorira baalaho yaachishanno coyi iillannonsa. (Maq. 10:29, 30) Tini alame baˈanno yanna gambissanno woyite albinni roore qarru iillankera dandaanno. Ikkina mimmitonke kaaˈla dandiineemmohu hiittoonniiti? Hanni Looxi, Iyyoobinna Naaoomi daafira kultannote Qullaawu Maxaafi xaggenni maa ronseemmoro laˈno. Qoleno xaa yannara mitu ammanate roduuwinkera iillannonsa qarranna insa qarransa dandiite heedhanno gede kaaˈla dandiineemmo gara ronseemmo.

3. Layinki Pheexiroosi 2:7, 8 kultanno garinni Looxi hiikkonne gara ikkinokki doorsha doodhino? Tini mayi qarra abbitino?

³ Looxi Soddoomu katamira heeˈrannohu mancau manni ledo heeˈrate doodhasi gara diˈˈikkitino. (2 Pheexiroosi 2:7, 8 nabbawi.) Hatti gobba dureette ikkiturono, Looxi hakka haˈrasinni lowo qarri iillinosi. (Kal. 13:8-13; 14:12) Galtesi hakko  katama baasa baxxinoha woy hakko heeˈranno manniwa aante batissinoha ikkara dandaanno; tini Yihowara hajajama qarra ikkitannose gede assitinose. Maganu hakko qooxeessira giiranna ruqano xeenimma dirrisi yannara, ise heeshshose hooggino. Lamenti Looxi seennina? Insa adhate coyiˈramino wedelli Soddoomu katamira reyino. Looxi qaesinna jajjasi hoogino; roore busha kayinni isi galtesi hoogasiiti. (Kal. 19:12-14, 17, 26) Tenne xissote yannara Yihowa Looxi tuge agurinoni? Diagurino.

4. Yihowa Looxi cince kaaˈlinohu hiittoonniiti? (Aaniidi qoolira noo misile lai.)

⁴ Soddoomu katamira heeˈrate doodhinohu Looxi ikkirono, Yihowa mararinosi daafira sokkaasine soye isonna maatesi gatisino. Sokkaasine, Looxi katamu giddonni rahe fulanno gede mudditusi yannara, isi kayinni fula ‘keeshshino.’ Hakko daafira, sokkaasine Looxinna maatesi anga amadde katamu giddonni fushshitinonsa. (Kal. 19:15, 16) Hakkiinni sokkaasine Looxi ilaala xooqanno gede kultinosi. Looxi kayinni Yihowa yiinore agure mule noo katama haˈrara xaˈmiˈrino. (Kal. 19:17-20) Yihowa cince macciishshino, hattono Looxi xaˈmiˈrino katama haˈranno gede fajjinosi. Looxi gedensaanni hakkiicho heeˈra waajjino daafira, ilaala haˈre heeˈra hanafino; Yihowa umonni haˈri yiinosihu hakkiraati. (Kal. 19:30) Yihowa cincino gari dhaggete! Ninke isi faale haˈra dandiineemmohu hiittoonniiti?

5-6. Umi Teselonqe 5:14 noo amaale harunsine Maganu faale haˈra dandiineemmohu hiittoonniiti?

⁵ Looxinte gede mitu ammanate roduuwinkeno gara ikkinokki doorsha doodhite buutote qarri giddo ubbara dandiitanno. Ikkina togoori kalaqamiro maa assineemmo? Gara ikkinokkire assino manchi wixiˈrinoha mixxanni no yee heda rakkannonkeha ikkara dandaanno; qoleno mittu manchi wixiˈrinoha mixxasi digattanno. (Gal. 6:7) Ikkollana Yihowa Looxi kaaˈlihu gede ninkeno rodoonke kaaˈlinummosiro woyyanno. Hatto assa dandiineemmohu hiittoonniiti?

⁶ Yihowa sokkaasine soyinohu Looxi qorowisiissanno gede calla ikkikkinni, Soddoomu katamira abbanno baonni gatanno gede kaaˈlitasiraati. Ninkeno ammanate rodiinke gara ikkitinokki doogo haˈranni nooti leeltunkero qorowisiisa hasiissannonkeha ikkara dandaanno. Ikkollana hakkiinni sainore assa hasiissannonke. Uyinoonnisita Qullaawu Maxaafi amaale harunsa keeshshiro nafa cinca hasiissannonke. Looxinna maatesi kaaˈlitute lame sokkaasine lawishsha harunsino. Hexxo mudhine rodiinkewiinni xeertiˈrantenni, iso kaaˈla dandiineemmo doogga hasiˈra hasiissannonke. (1 Yoh. 3:18) Lawishshu yaattonni angasi amande kaaˈla yaano uyinoonnisita dancha amaale harunsanno gede jawaachisha hasiissannonke.—1 Teselonqe 5:14 nabbawi.

7. Manna Yihowa Looxi kaaˈlino garinni kaaˈla dandiineemmohu hiittoonniiti?

⁷ Yihowa Looxi laanfe diˈˈillachishino. Hatteentenni, Isi yannate gedensaanni soqqamaasinchu Pheexiroosi qullaawu ayyaaninni Looxi keeraanchoho yee borreessanno gede assino. Yihowa soˈronke xinqisiisiˈranno Magano ikkinokkita afanke tashshi assitannonke! (Far. 130:3) Ikkina ninkeno manna Yihowa Looxi kaaˈlino garinni kaaˈla dandiineemmohu hiittoonniiti? Roduuwinkera noonsata dancha akatta illachinsheemmoha ikkiro, insa cincine kaaˈla dandiineemmo. Hatto assinummoro, insano kaaˈlineemmonsa kaaˈlo adhitara dandiitanno.

8. Mararro maa assineemmo gede kakkayissannonke?

⁸ Iyyoobira qarru iillinosihu, Looxi gede  gara ikkinokkire asseenna diˈˈikkino. Iyyoobira buutote qarri iillinosi; isi jirosi, dagoomu mereero noosi ayirrinye, hattono ordu fayyimmasi hoogino. Kawiinni saˈino busha kayinni isinna minaamasira oosonsa reyo xoqoltino. Qoleno sase suˈmira jaallasi Iyyoobi boroortinosi. Iyyoobiti sase jaalla iso marara hoogginohu mayiraati? Mittu korkaati, insa Iyyoobira iillinosi qarra huwatate diwoˈnaaltino. Konninni kainohunni insa Iyyoobi bushiishate muddantino, hattono boroorshunni aalle haadhinosi. Ninke togoo soˈro loonseemmokki gede mayi kaaˈlannonke? Mittu manchira iillinosi qarra woˈmunni woˈma huwata dandaannohu Yihowa calla ikkinota deˈnoonke. Qarramino manchi hasaaphannore seekkine macciishshino. Isi coyiˈrannore calla ikkikkinni, xissosino huwatate woˈnaallo. Roduuwinke qarra uminkehu gede assine laˈˈa dandiineemmohu hatto assinummoro callaati.

9. Manna mararreemmoha ikkiro maa diassineemmo? Mayira?

⁹ Manna mararreemmoha ikkiro, insara iillinonsa qarra kayinse diheˈmineemmo. Heme songote mittimma huntanno ikkinnina dikaajjishshanno. (Law. 20:19; Rom. 14:19) Heˈmanno manchi shaqqillenna mararro leellisha didandaanno; qoleno coyiˈranno coyi wonanni xissiisiˈre noo mancho madiissara dandaanno. (Law. 12:18; Efe. 4:31, 32) Mannu soˈro xinqisiisiˈrantenni dancha akattansa illachishanna insa kaaˈla dandiineemmo gara heda woyyitanno!

10. Iyyoobi 6:2, 3 noo hedonni maa ronseemmo?

¹⁰ Iyyoobi 6:2, 3 nabbawi. Iyyoobi gara garimmo laikki coyiˈrino woyiti no. Ikkollana isi yannate gedensaanni coyiˈrinorira gaabbino.  (Iyo. 42:6) Iyyoobinte gede xaa yannarano mittu qarru giddo noo manchi gara garimmo laikki ganaanni gaabbisannosi coye coyiˈrara dandaanno. Togoo yannara ninke maa assa hasiissannonke? Soˈrosi xinqisiisiranteni, iso marara hasiissannonke. Yihowa kalaqinonkehu, xaa gede qarrunna yaaddo woˈmitino heeshsho heeˈnammora diˈˈikkino. Konni daafira, mittu ammanaminohu Yihowa soqqamaasinchi buutote qarri iillannosi woyite gura qiniite laikki coyiˈrara dandaanno. Kuni manchi Yihowa daafira woy ninke daafira gara ikkinokkire coyiˈriro nafa, hanqoho muddama woy iso bushiisha dihasiissannonke.—Law. 19:11.

11. Cimeeyye amaaltanno woyite Eelihu lawishsha harunsa dandiitannohu hiittoonniiti?

¹¹ Yaachishanno coyi iillinosi manchira amaale woy seejjo hasiissannosi woyiti heeˈrara dandaanno. (Gal. 6:1) Cimeeyye togoo roduuwa kaaˈla dandiitannohu hiittoonniiti? Insa Eelihu lawishsha harunsa hasidhanno; isi Iyyoobi hasaaphanna cince macciishshino. (Iyo. 33:6, 7) Eelihu Iyyoobi amaalinohu, xissosi huwatihu gedensaanniiti. Eelihu lawishsha harunsitanno cimeeyye, amaaltanno manchi hasaaphanno woyite seekkite macciishshitanno, hattono iillinosire huwatate woˈnaaltanno. Hatto assitu gedensaanni amaaltannoha ikkiro, konni manchira amaale adha diqarrissannosi.

12. Naaoomi minaannasenna lame oosose shiiˈrasenni mayi macciishshaminose?

¹² Naaoomi Yihowa baxxannote ammanantino manchooti. Ikkollana ise minaannasenna lame labballi oosose shiidhu gedensaanni suˈmase Naaoomi yaa agurre “Maara” (“Maara” yaa “Qaraaro” yaate) yinara hasidhino. (Rut. 1:3, 5, 20) Naaoomira qarru iillise yanna baalantera beettise minaama Ruuti isewiinni dibaxxitino. Ruuti Naaoomira hasiisannosere assite kaaˈlitinose, hattono sheshifachishshinose. Ruuti, Naaoomi baxxannosetanna kaaˈlitannoseta shaqqillunni xawisse kultinose.—Rut. 1:16, 17.

13. Galte shiiˈrino manchira kaaˈlo hasiissannosihu mayiraati?

¹³ Ammanate roduuwinke galte shiidhanno woyite kaaˈlo hasiissannonsa. Minaanninna minaama mule mule kayinsoonnite lame haqqicho gedeeti. Yanna saˈanni hadhanno woyite lamente haqqicho rumudda tiˈi teˈee ledo sarraaqantanno. Mitte haqqicho ubbanno woyite, gattinoti baasa gawajjantanno. Hatteente gede, mittu manchi galtesi shiiˈranno woyite, lowo yanna manchitara dandaanno. Paawula * yinanniti minaannase hedeweelcho shiidhino mancho togo yitino: “Boosaallu boono ikkie; hattono kade amadeemmari bainoe. Lubbote jaalaˈya hooge aguroomma. Minaanniˈya noo yannara isi ledo baalanka coye hasaambeemmo. Hagiidheemma woyite ledoˈya hagiidhannohu hattono qarru yannara kaaˈlannoehu isooti. Dhiwinoere hasaapheemma woyite, cince macciishshannoe. Iso shiiˈrummata kayinni gama wido reyoommaha lawinoe.”

14-15. Galte shiidhinore sheshifachisha dandiineemmohu hiittoonniiti?

¹⁴ Galte shiidhinore sheshifachisha dandiineemmohu hiittoonniiti? Shiiˈrino mancho ma garinni hasaawinseemmoro afa hoongummoro nafa, hasaawisate woˈnaala hasiissannonke. Aleenni kulliti Paawula togo yitino: “Shiiˈrino mancho hasaawisa shota ikkitinokkita afoomma. Mannu shiiˈrinoha koffi assannore coyiˈneemmo yee waajjanno. Ikkollana roore busha sammi yee giwa labbannoe.” Shiiˈrino manchira shiimare  nafa coyiˈra sheshifachishshasira dandiitanno. Paawula “Jaallaˈya ‘Xisso anera!’ yaansa calla baasa jawaachishshinoe” yitino.

¹⁵ Boodu diri albaanni minaamasi shiiˈrinohu Wiliyaami togo yiino: “Wolootu galteˈya assitinoha dancha coye coyidhanno woyite tashshi yaannoe; tini insa ise baxxannosetanna ayirrissannoseta wodancheemmo gede assitannoe. Hatto assansa baasa kaaˈlitinoe. Minaamaˈya lowo geeshsha baxeemmo daafira, mannu ise daafira coyiˈranno woyite baasa sheshifateemmo.” Biyanka yinanniti minaannase shiidhino mancho togo yitino: “Wolootu ledoˈya heedhe huuccatto assitannonna qummeeshshuwa nabbabbannoe woyite lowo geeshsha sheshifateemma. Minaanniˈya daafira hasaawansa hattono ani isi daafira coyiˈranna macciishshansa baasa kaaˈlitinoe.”

16. (a) Shiidhinore sheshifachishate maa assa hasiissannonke? (b) Yaiqoobi 1:27 kultanno garinni maa assate qoosso noonke?

¹⁶ Ruuti Naaoomiwiinni baxxa gibbunte gede, ninkeno shiidhinore agurrummokkinni kaaˈla hasiissannonke. Paawula togo yitino: “Minaanniˈya reyi taaera, lowo manni sheshifachishinoe. Yanna saˈanni hadhuta kayinni baalunku agure raga raga higino. Anera kayinni ragu baalu tunsinoe. Lowo aganna woy dirra gedensaanni nafa shiiˈrino manchira kaaˈlo hasiissannosita huwata danchate.” Mannu mannu gari babbaxxara dandaannoti egennantinote. Mitootu mulenni xissonsanni shesho afidhara dandiitanno. Wolootu kayinni alba shiidhino manchi ledo assitinore qaaggu kiiro xissiisidhanno. Qoleno mannu xissonsa xawisanno gari babbaxxinoho. Yihowa  shiidhinore kaaˈlate qoossonna qeecha uyinonketa qaaga hasiissannonke.—Yaiqoobi 1:27 nabbawi.

17. Minaanninsa woy minaamansa hunte hadhinonsarira kaaˈlo hasiissannonsahu mayiraati?

¹⁷ Mitu manni, minaanninsa woy minaamansa hunte hadhannonsa woyite baasa yaadanno. Wole galte adhate yee minaannise hune haˈrinoseti Joyisi togo yitino: “Adhamanke diigaˈya xissiissinoe gara hedeemma woyite, minaanniˈya shiiˈroommaro hatto xissiisiˈreemmaha dilawannoe. Isi danotenni woy dhiwame reyinoha ikkoommero, assine anfanniri dino. Hune harinoehu kayinni baxeeti. Konni daafira isi mishinoe, hattono shollishinoe yee hedoomma.”

18. Galtensa hoogginore kaaˈlate maa assa dandiineemmo?

¹⁸ Babbaxxino korkaatinni galtensa hoogginore shiimaadda coye assine kaaˈlineemmonsaha ikkiro banxeemmonsata huwattanno. Togoo mannira albinni roore danchu jaali hasiisannonsa. (Law. 17:17) Ikkina insara jaala ikka dandiineemmohu hiittoonniiti? Sagale koyinsammonsara dandiineemmo. Qoleno ledonke boohaartanno gede woy soqqantanno gede koyinsammonsara dandiineemmo. Mito woyite maatete magansiˈra ledonke assidhanno gede koyisano danchate. Hatto assineemmoha ikkiro, ‘dadillunni hiiqqaqqantinorira mule noohunna’ ‘gunnootaho malanno’ Magani hagiidhanno.—Far. 34:18; 68:5.

19. Umi Pheexiroosi 3:8 kultanno garinni maa assate murciˈra hasiissannonke?

¹⁹ Maganu Mangiste muli yannara uulla gashsha hanaffanno woyite “saino qarri baalu hawamanno” hattono “sainore baala hambanni; horonta diqaanganni”; tenne yanna quqquxamme agadhineemmo. (Isa. 65:16, 17) Hakka geeshsha kayinni mimmito irkisanna ammanate roduuwanke banxeemmota coyiˈneemmorinnino ikko assineemmorinni leellishanke agurroonke.—1 Pheexiroosi 3:8 nabbawi.