Mtoto wako lazima akae nyumbani na hana lolote la kufanya. Anasema, “Nimechoshwa!” Fikiria mambo machache kabla ya kumwashia televisheni au kumpendekezea kwamba acheze mchezo wa video anaoupenda.

•   Mtoto anaweza kuchoshwa na kiasi na aina ya burudani. Baba anayeitwa Robert anasema hivi: “Kwa watoto fulani, maisha ya kila siku yanachosha yanapolinganishwa na kutazama TV au kucheza michezo ya video. Utendaji wa kawaida hausisimui kama mambo hayo.”

   Barbara, mke wake, anakubaliana naye. Anasema hivi: “Maisha halisi yanadai kwamba mtu afikiri na atie jitihada, na mara nyingi matokeo huja polepole. Hilo linachosha sana kwa watoto wanaotumia muda mwingi kutazama TV au kucheza michezo ya video.”

•   Kutumia muda mwingi kwenye mitandao ya kijamii kunaweza kukufanya ujilinganishe kwa njia isiyofaa. Kijana anapotazama utendaji wa rafiki zake anaweza kufikiri maisha yake hayana msisimko. Msichana anayeitwa Beth anasema hivi: “Ni rahisi kuanza kufikiri, ‘Kila mtu anafurahia maisha, lakini mimi nimeketi tu nyumbani.’”

   Mbali na hilo, saa ambazo mtu anatumia kwenye mitandao ya kijamii inaweza kumfanya ajihisi amepoteza muda—na bado amechoshwa. Kijana anayeitwa Chris anasema hivi: “Akili inaweza kuhisi inafanya jambo fulani unapotumia mitandao ya kijamii, lakini unapomaliza unagundua hujatimiza lolote.”

•   Kuchoshwa kunaweza kuwa nafasi. Mama anayeitwa Katherine anasema kwamba kuchoshwa kunawapa watoto nafasi ya kuwa wabunifu. Kwa mfano, anasema hivi: “Mtoto anaweza kuchukua boksi la kawaida na kuwazia yuko ndani ya gari, mashua, au roketi. Anaweza kufunika viti kwa blanketi na kuwazia yuko ndani ya hema.”

   Inapatana na akili kwamba mwanasaikolojia Sherry Turkle anasema kuchoshwa ndiyo “njia ambayo uwezo wako wa kufikiri unakuambia uwe mbunifu.” a Kwa hiyo, kuchoshwa si jambo baya. Kitabu Disconnected kinasema hivi: “Unapohisi umechoshwa unatumia nguvu zako za kuwazia na hivyo kunufaisha ubongo wako, kama tu kuinua vyuma kunavyoimarisha misuli yako.”

 Jambo kuu: Usifikiri kwamba kuchoshwa kwa watoto wako ni tatizo bali ni nafasi ya kuwasaidia kuwa wabunifu.

•   Hali zikiruhusu, waache watoto wacheze nje. Barbara, aliyenukuliwa awali anasema hivi: “Ni ajabu jinsi jua na hewa safi inavyoweza kumfanya mtoto aache kujihisi amechoshwa. Mara tu watoto wetu walipoanza kucheza nje, walianza kutumia uwezo wao wa kuwaza zaidi!”

   Kanuni ya Biblia: “Kuna wakati uliowekwa wa kila jambo, . . . wakati wa kucheka [na] wakati wa kurukaruka.”—Mhubiri 3:1, 4, maelezo ya chini.

   Jambo la kufikiria: Ninaweza kuwapa watoto wangu nafasi zipi za kucheza nje mara nyingi zaidi? Ikiwa hali haziruhusu kwao kucheza nje, ni utendaji gani wenye ubunifu wanaoweza kufanyia ndani ya nyumba?

•   Wasaidie watoto wako kuwafikiria wengine. Mama anayeitwa Lilian anapendekeza hivi: “Mtembelee rafiki mwenye umri mkubwa na ufyeke nyasi au ukusanye majani yaliyoanguka au umpikie kitu au upitie tu kumsalimu. Kuwafanyia wengine mambo huleta shangwe ya kweli.”

   Kanuni ya Biblia: “Mtu mkarimu atapata ufanisi, na yule anayewaburudisha wengine yeye mwenyewe ataburudishwa.”—Methali 11:25.

   Jambo la kufikiria: Unaweza kuwasaidiaje watoto wako kupata shangwe ya kuwafanyia wengine mambo?

•   Weka mfano. Jinsi unavyozungumza kuhusu utendaji wa kila siku kunaweza kuwaathiri watoto wako. Mama anayeitwa Sarah anasema hivi: “Tukizungumza kana kwamba maisha hayasisimui, tunawafundisha watoto maisha yanachosha. Lakini tunapozungumza kwa njia inayoonyesha tunafurahia utendaji wa kila siku, tunawasaidia watoto wetu kuwa na mtazamo huo.”

   Kanuni ya Biblia: “Mtu aliye na moyo mchangamfu huwa na karamu daima.”—Methali 15:15.

   Jambo la kufikiria: Je, watoto wangu hunisikia nikizungumza kuhusu shughuli zangu za kila siku? Wanaona nikishughulikaje na pindi zinazochosha?

 Dokezo: Wasaidie watoto wako kuandika orodha ya utendaji wenye ubunifu. Mama mmoja anayeitwa Allison alisema hivi: “Tuna sanduku ya kutoka mapendekezo na kila mtu anaweza kuandika pendekezo lake na kulitumbukiza katika sanduku hilo.”