HAʼU sei hanoin-hetan tinan barak liubá, iha loron ida malirin tebes iha Brookings, Dakota Súl, iha rai-Estadus Unidus. Haʼu hatene katak ami sei hasoru tempu neʼebé malirin tebes. Haʼu ho ema grupu kiʼik ida iha armazein laran, no ami malirin toʼo nakdedar. Ami hamriik besik bee tanke boot ida neʼebé nakonu ho bee malirin. Husik haʼu konta uluk kona-ba haʼu-nia moris atu imi bele hatene tansá mak ami iha armazein neʼe.

Haʼu moris iha 7 Marsu 1936. Ami oan naʼin-haat no haʼu mak oan-ikun. Ami iha toʼos ida iha Dakota Súl. Halo toʼos no hakiak animál sira importante ba ami-nia família, maibé laʼós buat neʼebé importante liu hotu ba ami-nia moris família nian. Haʼu-nia inan-aman hetan batizmu nuʼudar Testemuña ba Jeová iha 1934. Sira dedika ona sira-nia moris ba Jeová, tan neʼe importante tebes ba sira atu halo Jeová nia hakarak. Haʼu-nia apá, Clarence mak serbí nuʼudar koordenadór ba grupu katuas nian iha ami-nia kongregasaun kiʼik iha Conde, Dakota Súl, no ikusmai haʼu-nia tiun, Alfred mak serbí fali nuʼudar koordenadór.

Ami-nia família nia toman mak tuir beibeik reuniaun no haklaken husi uma ba uma hodi fó-hatene ba ema kona-ba futuru furak neʼebé Bíblia promete. Ami-nia inan-aman nia ezemplu diʼak no treinu neʼebé sira fó ba ami ajuda ami atu hadomi Jeová. Haʼu-nia biin Dorothy no haʼu sai haklaken-naʼin kuandu ami tinan neen. Iha 1943, kongregasaun hahú Eskola Serbisu Kristaun nian, no haʼu mós tuir eskola neʼe.

Reuniaun boot sira importante tebes ba ami. Haʼu sei hanoin-hetan reuniaun boot ida neʼebé halaʼo iha Sioux Falls, Dakota Súl, iha tinan 1949. Irmaun Grant Suiter hatoʼo diskursu ida ho títulu “Mundu nia rohan besik ona!” Nia fó-hanoin ba  ema hotu katak ema kristaun neʼebé dedika an ona tenke uza sira-nia moris atu haklaken liafuan diʼak kona-ba Maromak nia Ukun. Tuirmai haʼu dedika haʼu-nia moris ba Jeová. Haʼu hetan batizmu iha reuniaun boot neʼebé halaʼo iha Brookings iha 12 Novembru 1949. Tanba razaun neʼe mak ami tama iha armazein malirin neʼebé haʼu temi ohin. Ami naʼin-haat mak hein atu hetan batizmu iha tanke besi neʼe.

Tuirmai haʼu deside atu foti pioneiru, no haʼu hahú iha 1 Janeiru 1952 ho idade 15. Bíblia dehan: “Ema neʼebé laʼo hamutuk ho ema matenek sei sai matenek.” Haʼu-nia família mak ema neʼebé matenek duni tanba sira hotu apoia haʼu atu foti pioneiru. (Provérbios [Amsal] 13:20) Haʼu haklaken beibeik ho haʼu-nia tiun, Julius neʼebé idade 60 ona. Maski nia idade liu haʼu, maibé ami gosta gasta tempu hamutuk hodi haklaken. Haʼu aprende buat barak husi nia. Lakleur Dorothy mós sai pioneiru ida.

Bainhira haʼu sei joven, haʼu-nia inan-aman sempre konvida katuas área nian ho sira-nia feen hela ho ami. Katuas área ida ho ninia feen neʼebé fó ajuda barak ba haʼu mak Jesse no Lynn Cantwell. Sira hatudu interese ba haʼu no fó laran-manas ba haʼu atu foti pioneiru. Bainhira sira halaʼo vizita ba kongregasaun sira neʼebé besik ami, dala ruma sira konvida haʼu hodi bá haklaken hamutuk ho sira. Haʼu gosta tebes hamutuk ho sira. Haʼu hakarak atu halo serbisu barak ba Jeová hanesan sira no mós foti pioneiru.

Ami-nia katuas área tuirmai mak Bud Miller. Bainhira nia ho ninia feen Joan vizita ami-nia kongregasaun, haʼu foin tinan 18. Iha tempu neʼebá, governu bolu haʼu atu tama militár. Sira haruka haʼu atu halo serbisu neʼebé haʼu sente katak kontra mandamentu neʼebé Jesus fó kona-ba la bele mete buat polítiku nian. Maibé haʼu-nia hakarak mak atu haklaken liafuan diʼak kona-ba Maromak nia Ukun. (João 15:19) Tan neʼe haʼu husu sira atu fó liberdade ba haʼu tanba haʼu mak mestre ba relijiaun ida.

Haʼu kontente tebes bainhira irmaun Miller fó-hatene ba haʼu katak nia sei akompaña haʼu atu bá koʼalia ho governu. Irmaun Miller mak ema neʼebé la moe no la taʼuk ema. Nia mós hatene didiʼak eskritura sira. Tanba hamutuk ho nia, neʼe fó aten-brani  ba haʼu! Husi enkontru neʼe, iha tinan 1954, governu fó duni liberdade ba haʼu atu la tama militár, no haʼu bele halo serbisu barak ba Jeová.

Lakleur haʼu mós hetan konvite atu serbí iha Betel. Haʼu serbisu iha Watchtower Farm, iha Staten Island, Novaiorke. Haʼu serbisu iha neʼebá maizumenus ba tinan tolu. Haʼu haksolok tebes bele serbisu iha neʼebá tanba haʼu bele koñese irmaun-irmán ho esperiénsia barak no serbisu hamutuk ho sira.

Watchtower Farm iha Staten Island mós iha estasaun rádiu WBBR. Testemuña ba Jeová komesa uza estasaun rádiu neʼe husi 1924 toʼo 1957. Ema Betel naʼin-15 toʼo 20 deʼit mak hetan knaar hodi serbisu iha Watchtower Farm. Ami barak mak sei joven no seidauk iha esperiénsia. Iha irmaun kose-mina ida neʼebé idade ona serbisu hamutuk ho ami, nia naran Eldon Woodworth. Ami haree nia hanesan aman ida no nia hanorin buat barak ba ami. Dala ruma kuandu ami la kontente ba malu, irmaun Eldon sempre dehan, “Furak tebes hodi haree Jeová kumpre ninia hakarak maski uza ema neʼebé la perfeitu.”

Irmaun Frederick Franz mós hamutuk ho ami no ami aprende buat barak husi nia. Nia iha esperiénsia barak kona-ba eskritura sira. Nia hatudu interese ba ami ida-idak. Ami-nia koziñeiru mak Harry Peterson. Fasil liu ba ami atu uza ninia naran neʼe tanba ninia naran loos mak Papargyropoulos. Nia mós ema kose-mina ida no nia badinas tebes atu haklaken. Irmaun Peterson sempre halo ninia knaar hotu iha Betel ho didiʼak, maski nuneʼe, nia nunka falta haklaken. Nia fahe revista atus ba atus kada fulan. Nia mós hatene didiʼak eskritura sira no hatán ami-nia pergunta sira.

Iha Watchtower Farm ami serbisu hodi hatama ai-fuan no modo barak tebes ba lata atu fó ba família Betel. Haʼu serbisu hamutuk ho irmán Etta Huth, nia mak irmán neʼebé matenek. Nia mak halo reseita kona-ba oinsá atu prepara ai-fuan ho modo sira-neʼe. Irmán sira neʼebé hela besik neʼebá mós bá ajuda no Etta mak ajuda fahe serbisu ba sira. Maski Etta iha matenek kona-ba oinsá atu hatama hahán ba lata, maibé nia sempre hatudu  respeitu ba irmaun sira neʼebé tau matan ba Watchtower Farm. Nia hatudu ezemplu neʼebé diʼak tebes ba ami hotu kona-ba hakruʼuk ba sira neʼebé mak ita-nia ulun.

Angela (Angie) Romano mak irmán klosan neʼebé bá ajuda iha Watchtower Farm. Etta mak ajuda nia iha tempu neʼebé nia simu lia-loos. Angie ho haʼu kaben iha fulan-Abríl 1958, no ami kontente tebes hodi serbí Jeová hamutuk ba tinan 58 ona. Iha tinan sira-neʼe, Angie hatudu laran-metin ba Jeová no ajuda tebes ami atu iha moris kaben neʼebé metin. Nia matenek, no haʼu konfia tebes nia hodi hasoru problema naran deʼit iha ami-nia moris.

Bainhira irmaun sira faʼan tiha ita-nia estasaun rádiu WBBR iha 1957, haʼu serbí fali iha Betel Brooklyn ba tempu badak. No tanba Angie ho haʼu kaben, tan neʼe haʼu husik Betel. Ami serbí nuʼudar pioneiru iha Staten Island ba tinan tolu. Ba tempu uitoan haʼu serbisu fali ba estasaun rádiu neʼebé uluk WBBR maibé troka fali naran ba WPOW.

Angie no haʼu koko atu halaʼo moris neʼebé simples atu ami bele serbí iha fatin naran deʼit neʼebé presiza ajuda. Tan neʼe, iha 1961 ami simu konvite ida hodi serbí nuʼudar pioneiru tempu-tomak iha Falls City, Nebraska. Maibé bainhira ami toʼo iha neʼebá, lakleur ami hetan konvite atu bá fali Lansing Súl, Novaiorke, atu tuir eskola ida kona-ba Bíblia neʼebé halaʼo ba fulan ida. Ami gosta tebes treinu neʼebé ami simu husi eskola neʼe no ami hanoin katak eskola ramata tiha ami sei fila fali ba Nebraska. Maibé ami simu fali knaar foun. Ami sei bá fali rai-Kamboja atu serbí nuʼudar misionáriu. Iha Kamboja ami haree, rona, no koko buat barak neʼebé foun ba ami. Ami hakarak tebes atu haklaken ba ema iha neʼebá kona-ba Maromak nia Ukun.

Ikusmai situasaun polítiku iha Kamboja troka, tan neʼe ami presiza muda ba Vietname Súl. Tinan rua liutiha, haʼu sai moras makaʼas no ami presiza fila fali ba Estadus Unidus. Haʼu presiza tempu naruk hodi bele sai diʼak fali, maibé bainhira haʼu diʼak ona, ami serbí fali nuʼudar pioneiru.

Iha fulan-Marsu 1965 ami hahú serbisu fali nuʼudar katuas área nian. Haʼu ho Angie gosta tebes ami-nia knaar hodi halo serbisu nuʼudar katuas área no katuas vizitante nian durante tinan 33, no ami mós ajuda iha reuniaun boot sira. Haʼu gosta knaar neʼe tanba tempu halaʼo reuniaun boot mak tempu neʼebé furak ba haʼu. Ami vizita kongregasaun sira iha sidade Novaiorke no mós sidade liʼur husi Novaiorke. Dala barak reuniaun boot halaʼo iha Yankee Stadium.

Iha tinan sira-neʼe, Angie ho haʼu simu knaar foun barak no mós difisil. Iha tinan 1995, haʼu hetan knaar atu hanorin iha Eskola Treinu Atan Kristaun nian. Tinan tolu liutiha, ami hetan fali konvite atu tama Betel. Haʼu kontente hodi serbí fali iha Betel tanba tinan 40 ona haʼu la serbí iha Betel. Ba tempu uitoan haʼu serbí iha Departamentu Serbisu nian no mós hanorin eskola oioin  neʼebé ita-nia organizasaun arranja. Iha tinan 2007, Grupu Administradór forma departamentu ida naran Grupu neʼebé Organiza Eskola Bíblia nian atu tau matan ba eskola oioin neʼebé halaʼo iha Betel, no haʼu tau matan ba departamentu neʼe ba tinan barak.

Iha tinan hirak foin daudauk neʼe, iha mudansa barak kona-ba eskola oioin neʼebé halaʼo iha Betel. Porezemplu, Eskola ba Katuas Kongregasaun nian hahú iha 2008. No iha tinan rua nia laran, eskola neʼe hanorin katuas kongregasaun naʼin–12.000 liu iha Patterson no Betel Brooklyn. Ohin loron, iha fatin oioin mós halaʼo eskola neʼe. Iha 2010, naran ba Eskola Treinu Atan Kristaun troka fali ho naran Eskola Bíblia nian ba Irmaun sira neʼebé Laiha Kaben, no mós forma tan eskola foun ida, naran Eskola Bíblia ba Kaben-Naʼin Kristaun.

Iha Setembru 2014, eskola rua neʼe sai ida deʼit no hanaran fali Eskola ba Haklaken-Naʼin Tempu-Tomak. Estudante husi eskola neʼe bele kaben-naʼin, irmaun klosan, ka irmán klosan. Irmaun-irmán barak iha mundu tomak haksolok tebes bainhira sira rona katak eskola neʼe halaʼo mós iha sira-nia rai. Kontente tebes hodi hatene katak ema barak bele iha oportunidade atu tuir eskola neʼe. Haʼu agradese tebes bele hasoru irmaun-irmán barak neʼebé halo ona mudansa ba sira-nia moris hodi bele simu treinu husi eskola neʼe.

Bainhira haʼu hanoin fali kona-ba haʼu-nia moris husi tempu antes haʼu hetan batizmu iha armazein neʼebé malirin, neʼe halo haʼu agradese tebes ba Jeová tanba haʼu hasoru ona ema barak neʼebé iha esperiénsia. Sira ajuda tebes haʼu hodi hatene no serbí Jeová ho laran-manas. Balu idade kiʼik liu no boot liu haʼu. Barak mak mai husi kultura neʼebé la hanesan. Maibé haʼu bele haree husi sira-nia hahalok no hanoin katak sira hadomi tebes Jeová. Haʼu agradese tebes hodi laʼo ho belun sira husi Jeová nia povu neʼebé matenek no aprende buat barak husi sira.