Serbí Jeová ho laran tomak!
“Oh Jeová, favór ida hanoin-hetan kona-ba oinsá haʼu laʼo ho laran-metin iha Ita-nia oin no serbí Ita ho laran tomak.”—2 REIS (RAJA-RAJA) 20:3.
KNANANUK: 52, 32
1-3. Serbí Jeová ho laran tomak katak sá? Fó toʼok ezemplu ida.
ITA hotu la perfeitu no halo sala. Maibé ita agradese tebes ba Jeová tanba nia uza Jesus nia sakrifísiu atu fó perdua ba ita-nia sala. Tan neʼe, se ita mak haraik an no arrepende an, ita bele husu perdua husi nia. Ita bele fiar katak Jeová sei la haree ita “tuir ita-nia sala”. (Salmo [Mazmur] 103:10) Maski nuneʼe, ita tenke “serbí nia ho laran tomak”. (1 Crônicas [Tawarikh] 28:9) Oinsá mak ita bele halo nuneʼe?
2 Atu ajuda ita, mai ita kompara Liurai Asa ho Liurai Amazias nia moris. Liurai naʼin-rua neʼe halo buat barak neʼebé diʼak, maibé tanba la perfeitu, sira mós halo sala. Maski nuneʼe, Bíblia hatete katak iha Asa nia moris, nia serbí Jeová ho laran tomak. (2 Crônicas [Tawarikh] 15:16, 17; 25:1, 2; Provérbios [Amsal] 17:3) Nia sempre koko atu halo Jeová kontente no fó ninia an tomak ba Jeová. (1 Crônicas [Tawarikh] 28:9) Maibé Amazias la serbí Jeová “ho laran tomak”. Bainhira nia funu manán tiha Maromak nia inimigu, nia lori inimigu nia estátua sira no komesa adora fali estátua sira-neʼe.
3 Ema neʼebé serbí Jeová “ho laran tomak” hadomi tebes nia no hakarak adora nia ba nafatin. Bainhira Bíblia temi kona-ba ema nia “laran”, baibain neʼe koʼalia kona-ba nia mak ema oinsá loos, inklui ninia hakarak, hanoin, hahalok, matenek, no planu hotu. Maski ita ema la perfeitu, ita bele adora Jeová ho laran tomak. Ita serbí nia tanba neʼe mak ita-nia hakarak, laʼós tan deʼit responsabilidade ka tanba neʼe mak ita-nia toman deʼit.
4. Ita sei koʼalia kona-ba saida?
4 Atu komprende liután oinsá mak ita bele serbí Jeová ho laran tomak, mai ita koʼalia kona-ba liurai Asa no liurai naʼin-tolu tan husi Judá neʼebé laran-metin. Liurai sira-neʼe mak Jeosafát, Ezekias, no Josias. Maski liurai sira-neʼe halo sala, maibé Jeová simu nafatin sira, tanba Jeová hatene katak sira serbí nia ho laran tomak. Saida mak halo Jeová sente katak sira serbí nia ho laran tomak, no oinsá mak ita bele banati-tuir sira?
ASA SERBÍ JEOVÁ HO LARAN TOMAK
5. Bainhira Asa sai liurai, nia halo saida deʼit?
5 Asa mak liurai Judá terseiru husi tempu neʼebé nasaun Izraél fahe ba rua. Bainhira nia sai liurai, nia hakaʼas an tebes hodi hamoos rai-Judá husi adorasaun neʼebé falsu no hahalok aat seksuál husi rai neʼe. Nia harahun hotu estátua sira neʼebé povu uza nuʼudar adorasaun no nia duni sai mane sira neʼebé faʼan an iha templu. Asa mós hatún ninia avó-feto husi ninia pozisaun nuʼudar liurai-feto, tanba nia harii estátua ida. (1 Reis [Raja-Raja] 15:11-13) Asa fó laran-manas ba povu “atu buka Jeová . . . hodi halo tuir ukun-fuan no mandamentu sira”. Asa hakaʼas an tebes hodi ajuda ema seluk atu adora Jeová.
6. Asa halo saida bainhira ema Etiópia ataka Judá?
6 Bainhira Asa sai liurai, ba tinan sanulu la iha funu akontese iha rai-Judá. Maibé liutiha neʼe, Zera, ema Etiópia mai ho soldadu 1.000.000 no kuda-karreta 300 atu ataka Judá. (2 Crônicas [Tawarikh] 14:1, 6, 9, 10) Asa halo saida kona-ba situasaun neʼe? Nia fiar katak Jeová sei ajuda ninia povu. Tan neʼe nia halo orasaun ba Jeová atu ajuda nia manán funu neʼe. (Lee 2 Crônicas [Tawarikh] 14:11. *) Jeová hatán ba ninia orasaun. Jeová halo nia manán funu neʼe no halakon hotu ema Etiópia nia tropa. (2 Crônicas [Tawarikh] 14:12, 13) Dala ruma Jeová ajuda ninia povu manán funu maski sira-nia liurai la hatudu laran-metin ba nia. Jeová halo nuneʼe tanba atu hatudu katak nia mak Maromak neʼebé loos. (1 Reis [Raja-Raja] 20:13, 26-30) Ikusmai Asa mós halo buat ida neʼebé sala. Nia bá buka ajuda husi liurai Síria duké buka ajuda husi Jeová. (1 Reis [Raja-Raja] 15:16-22) Maski nuneʼe, Jeová bele haree katak Asa hadomi nia. Tanba iha Asa nia moris nia serbí Jeová ho laran tomak. Oinsá mak ita bele banati-tuir Asa nia ezemplu diʼak?
7, 8. Iha dalan saida deʼit mak Ita bele banati-tuir Asa?
7 Oinsá mak ita bele hatene se ita fó ita-nia laran tomak ba Jeová ka lae? Ita bele husu ba ita-nia an: ‘Maski susar mós, haʼu hakarak halo tuir Jeová ka lae? Haʼu hakaʼas an atu proteje Jeová nia kongregasaun hodi moos nafatin ka lae?’ Asa presiza duni aten-brani atu bele hasai ninia avó-feto husi ninia pozisaun nuʼudar liurai-feto. Dala ruma ita mós presiza hatudu aten-brani hanesan Asa. Porezemplu, se ita-nia família ka belun ida monu ba sala no nia la arrepende an, depois presiza hasai husi kongregasaun, ita sei hakaʼas an atu la ransu tan ho nia ka lae? Ita-nia laran sei book Ita atu halo saida?
8 Dala ruma ita mós bele sente hanesan Asa tanba ema hotu la gosta ita. Karik Ita-nia kolega eskola ka profesora sira goza Ita tan deʼit Ita mak Testemuña ba Jeová. Ka iha serbisu-fatin kolega sira hanoin katak Ita beik tanba Ita hakarak foti feriadu atu bá tuir reuniaun boot sira, ka tanba Ita lakohi aumenta oras serbisu atu manán osan barak. Iha situasaun sira-neʼe, diʼak atu halo tuir Asa nia ezemplu hodi sadere ba Jeová. Halo orasaun, hatudu aten-brani, no kontinua halo buat neʼebé loos. Hanoin-hetan katak se Maromak mak fó forsa ba Asa, nia mós sei fó forsa ba Ita.
9. Tanbasá mak Jeová sente kontente bainhira nia haree ita haklaken?
9 Asa la hanoin an deʼit, nia fó laran-manas ba ema seluk “atu buka Jeová”. Ita mós ajuda daudauk ema seluk atu adora Jeová. Bainhira Jeová haree ita koʼalia ba ema seluk kona-ba nia, neʼe halo nia kontente tebes tanba nia haree katak ita halo nuneʼe tanba ita hadomi nia no ita hanoin kona-ba ema seluk nia futuru!
JEOSAFÁT BUKA JEOVÁ
10, 11. Iha dalan saida deʼit mak ita bele banati-tuir Jeosafát?
10 Asa nia oan Jeosafát mós “kontinua laʼo iha ninia aman Asa nia dalan”. (2 Crônicas [Tawarikh] 20:31, 32) Oinsá? Nia halo hanesan ninia aman hodi fó laran-manas ba povu atu adora Jeová. Nia haruka ema ba sidade hotu iha rai-Judá hodi hanorin povu husi “livru kona-ba Jeová nia Ukun-Fuan”. (2 Crônicas [Tawarikh] 17:7-10) Nia mós bá toʼo área iha rai-Izraél parte norte, bá ema iha Efraim “hodi lori sira fila fali ba Jeová”. (2 Crônicas [Tawarikh] 19:4) Jeosafát mak liurai neʼebé “buka Jeová ho ninia laran tomak”.
11 Ohin loron, Jeová hakarak ema hotu iha mundu tomak atu aprende kona-ba nia, no ita bele hola parte iha serbisu neʼe. Ita hakarak estuda Bíblia beibeik ho ema seluk hodi sira mós bele komesa adora Jeová ka lae? Ita halo orasaun kona-ba neʼe ka lae? Se Ita mak hakaʼas an, Jeová sei fó bensaun ba Ita atu hahú estuda Bíblia ho ema. Ita bele uza Ita-nia tempu deskansa hodi estuda Bíblia ho ema ka lae? Jeosafát hakaʼas an tebes hodi ajuda ema seluk atu adora fali Jeová, ita mós bele halo tuir nia hodi ajuda fali sira neʼebé sai malirin iha lia-loos atu adora fali Jeová. Diʼak atu hatene katak katuas kongregasaun sira mós halo arranju atu vizita no ajuda sira neʼebé uluk hasai husi kongregasaun neʼebé karik husik ona sala uluk nian.
12, 13. (a) Bainhira Jeosafát sente taʼuk, nia halo saida? (b) Tanbasá mak Jeosafát nia ezemplu diʼak ba ita?
12 Jeosafát mós sadere ba Jeová hanesan ninia aman Asa halo bainhira inimigu nia tropa boot mai funu hasoru Judá. (Lee 2 Crônicas [Tawarikh] 20:2-4. *) Iha tempu neʼebá Jeosafát sai taʼuk, tan neʼe nia buka ajuda husi Jeová. Iha ninia orasaun, nia rekoñese katak nia la iha kbiit atu manán inimigu sira-neʼe. Nia mós hatete katak nia no ninia povu la hatene atu halo saida iha tempu neʼebá. Maski nuneʼe, nia la iha duvida katak Jeová sei ajuda sira. Nia dehan: “Ami-nia matan hateke ba Ita.”
13 Hanesan Jeosafát, dala ruma ita hasoru susar balu neʼebé halo ita la hatene atu halo saida ho problema neʼe, no karik ita mós bele sai taʼuk. (2 Korinto 4:8, 9) Maibé, saida mak Jeosafát halo? Nia halo orasaun iha ema barak nia oin hodi hatete ba Jeová katak sira sente fraku tebes iha tempu neʼebá. (2 Crônicas [Tawarikh] 20:5) Diʼak ba família nia ulun atu halo tuir Jeosafát nia ezemplu. Husu Jeová atu ajuda Ita no Ita-nia família tahan hasoru problema neʼebé Ita hasoru daudauk no husu nia atu fó matadalan ba Ita. Keta sente moe atu halo orasaun hanesan neʼe iha família nia oin. Tanba neʼe bele ajuda sira hatene katak Ita tau duni fiar ba Jeová. Jeová fó duni ajuda ba Jeosafát no nia mós sei fó ajuda ba Ita.
EZEKIAS KONTINUA HALO BUAT NEʼEBÉ LOOS
14, 15. Iha dalan saida mak Ezekias tau fiar tomak ba Jeová?
14 Ezekias mak liurai ida tan neʼebé “kaer metin ba Jeová”. Maski ninia aman hatudu ezemplu neʼebé aat no adora estátua sira, maibé nia la halo tuir. Ezekias “hasai hotu fatin aas sira, baku rahun fatuk lulik hotu, no tesi ai-riin lulik sira. Nia mós harahun samea riti neʼebé Moisés halo”, tanba povu Izraél adora fali samea neʼe. Ezekias fó duni ninia laran tomak ba Jeová. “Nia kontinua halo tuir ukun-fuan neʼebé Jeová fó ba Moisés.”
15 Bainhira Ezekias serbí nuʼudar liurai, tropa Asíria neʼebé ho forsa boot mai ataka Judá no ameasa atu harahun Jeruzalein. Liurai Senaquerib husi Asíria koko atu hamoe Jeová no haruka Ezekias atu rende an. Iha tempu susar neʼe, Ezekias tau fiar tomak ba Jeová hodi husu ninia ajuda. Nia hatene katak Jeová iha forsa boot liu fali ema Asíria no nia sei salva ninia povu. (Lee Isaías [Yesaya] 37:15-20. *) Maromak hatán ba ninia orasaun hodi haruka anju ida oho ema Asíria nia soldadu hamutuk naʼin–185.000.
16, 17. Iha dalan saida deʼit mak Ita bele banati-tuir Ezekias?
16 Ikusmai Ezekias sai moras toʼo besik atu mate. Iha tempu susar neʼe, nia husu makaʼas ba Jeová atu hanoin-hetan ninia laran-metin ba Jeová hodi fó ajuda ba nia. (Lee 2 Reis [Raja-Raja] 20:1-3. *) Jeová hatán ba ninia orasaun hodi kura fali nia. Bíblia hatete katak, ohin loron, Maromak la halo tan milagre atu kura ita-nia moras ka hanaruk ita-nia moris. Maibé ita bele halo tuir Ezekias nia ezemplu hodi sadere ba Jeová. Ita bele husu nuneʼe ba Jeová: “Haʼu husu Ita-Boot, oh Jeová, favór ida hanoin-hetan kona-ba oinsá haʼu laʼo ho laran-metin iha Ita-nia oin no serbí Ita ho laran tomak.” Ita fiar ka lae katak Jeová sei tau matan ba Ita, maski iha tempu neʼebé Ita moras daudauk?
17 Iha dalan saida tan mak ita bele banati-tuir Ezekias nia ezemplu? Karik iha buat balu neʼebé hanetik ita atu hametin ita-nia relasaun ho Jeová ka buat ruma preokupa hela ita hodi ita la bele tau fokus atu adora Jeová. Porezemplu, ema barak ohin loron fó atensaun demais ba artista no ema seluk tan neʼebé sira la koñese toʼo adora fali ema sira-neʼe. Karik sira gasta tempu barak hodi lee kona-ba ema sira-neʼe no haree sira-nia foto iha sítiu belun nian ka buat seluk liuhusi internét. Tuir loloos, ita balu gosta uza buat sira-neʼe atu koʼalia ho ita-nia família ka belun diʼak sira. Maibé ita mós bele soe tempu barak liuhusi sítiu belun. Se ema seluk mak gosta haree foto neʼebé ita tau ka liafuan neʼebé ita tau iha internét, dala ruma neʼe bele halo ita sai foti an. Ka se ita mak hatene katak ema la gosta tan atu tuir ita iha sítiu belun, karik neʼe bele halo ita sai hirus. Diʼak atu halo tuir apóstolu Paulo, Ákuila no Prisila nia ezemplu. Tuir Ita-nia hanoin, loron-loron sira gasta tempu atu buka-hatene ema nia moris kona-ba saida mak ema sira-neʼe halo ka lae, liuliu kona-ba ema neʼebé la adora Jeová? Bíblia hatete katak Paulo “fó nia tempu tomak hodi haklaken Maromak nia liafuan”. No Prisila ho Ákuila uza sira-nia tempu hodi esplika didiʼak Maromak nia Liafuan ba ema seluk. (Apóstolu 18:4, 5, 26) Husu ba Ita-nia an: ‘Haʼu hasees an husi adora ema ka lae? Haʼu kuidadu atu la gasta tempu barak hodi halo buat neʼebé la importante ka lae?’
JOSIAS HALO TUIR JEOVÁ NIA MANDAMENTU SIRA
18, 19. Iha dalan saida deʼit mak Ita bele banati-tuir Josias?
18 Ezekias nia bei-oan nia oan, Liurai Josias mós halo tuir Jeová nia mandamentu sira “ho ninia laran tomak”. (2 Crônicas [Tawarikh] 34:31) Antes nia tinan 20, “nia komesa ona atu buka David nia Maromak”. No bainhira nia tinan 20, nia hahú halakon hotu estátua sira husi Judá. (Lee 2 Crônicas [Tawarikh] 34:1-3. *) Josias hakaʼas an hodi halo buat neʼebé Jeová simu, no nia halo buat barak liu fali liurai Judá seluk. Loron ida amlulik boot buka-hetan Maromak nia Ukun-Fuan husi templu. Karik Ukun-Fuan neʼe Moisés rasik mak hakerek. Bainhira Josias nia sekretáriu lee Ukun-Fuan neʼe ba Josias, nia foin hatene katak, afinál nia presiza halo tan buat barak atu bele serbí Jeová ho laran tomak. Nia mós fó laran-manas ba ema seluk atu halo hanesan nia. Rezultadu mak povu sempre halo tuir Jeová iha tempu neʼebé Josias sei moris hela.
19 Se Ita mak joven, Ita bele halo tuir Josias nia ezemplu hodi aprende liután kona-ba Jeová. Karik Josias aprende husi ninia avó-mane Liurai Manase neʼebé arrepende an katak Jeová sempre prontu atu fó perdua. Ita mós bele aprende husi irmaun-irmán idade sira husi Ita-nia kongregasaun ka husi Ita-nia família rasik. Sira bele konta ba Ita kona-ba buat diʼak barak neʼebé Jeová halo ona ba sira. No mós, bainhira Josias lee tiha Jeová nia Ukun-Fuan, neʼe book ninia laran atu halo buat neʼebé Jeová simu no nia halo kedas mudansa. Liuhusi lee Bíblia mós bele book Ita atu halo tuir Jeová. Halo nuneʼe bele hametin Ita-nia relasaun ho Jeová no Ita sei sai kontente liután. Ikusmai, neʼe sei book Ita atu fó-hatene ema seluk kona-ba Jeová. (Lee 2 Crônicas [Tawarikh] 34:18, 19. *) Bainhira Ita estuda Bíblia, karik Ita mós sei haree iha dalan seluk tan atu hadiʼa Ita-nia serbisu ba Jeová. Se nuneʼe, hakaʼas an atu halo mudansa hanesan buat neʼebé Josias halo.
SERBÍ JEOVÁ HO LARAN TOMAK BÁ!
20, 21. (a) Buat saida deʼit mak liurai Judá naʼin-haat neʼe halo? (b) Ita sei koʼalia kona-ba saida iha lisaun tuirmai?
20 Saida mak ita bele aprende husi liurai Judá naʼin-haat neʼebé serbí Jeová ho laran tomak? Liurai sira-neʼe hakaʼas an atu halo buat neʼebé Jeová simu no adora nia iha sira-nia moris tomak. Sira sadere ba nia hodi kontra hasoru inimigu neʼebé forsa boot liu fali sira. Maibé importante liu mak sira serbí Jeová tanba sira hadomi nia.
21 Maski liurai sira-neʼe mak ema neʼebé la perfeitu no halo sala, maibé Jeová kontente ho sira. Nia haree sira-nia laran no nia hatene katak sira hadomi tebes nia. Ita mós ema la perfeitu no halo sala. Maibé, Jeová sei sente kontente tebes ho ita se nia haree katak ita mós serbí nia ho laran tomak. Iha lisaun tuirmai ita sei koʼalia kona-ba saida mak ita bele aprende husi sala neʼebé liurai naʼin-haat neʼe halo.
^ par. 6 2 Crônicas 14:11 Tuirmai Asa bolu ba Jeová, ninia Maromak, no hatete: “Oh, Jeová, Ita la haree ba ema neʼebé Ita atu fó ajuda mak ema barak ka la iha forsa. Ajuda ami bá, oh Jeová, ami-nia Maromak, tanba ba Ita mak ami sadere, no ho Ita-nia naran mak ami mai atu kontra hasoru ema barak neʼe. Oh Jeová, Ita mak ami-nia Maromak. Keta husik ema neʼebé kbiit-laek atu manán Ita.”
^ par. 12 2 Crônicas 20:2-4 2 Entaun ema sira mai no fó-hatene Jeosafát: “Ema-lubun boot husi parte tasi nian, husi Edom, mai atu ataka Ita-Boot; no agora sira iha Hazazon-tamar, katak En-gedi.” 3 Rona tiha ida-neʼe, Jeosafát sai taʼuk no nia fila oin hodi buka Jeová. Tuirmai nia fó sai ba Judeia tomak atu halo jejún. 4 Depois neʼe ema husi Judeia halibur hodi husu matadalan ba Jeová, sira mai husi sidade hotu iha Judeia, sira mai atu husu matadalan husi Jeová.
^ par. 15 Isaías 37:15-20 15 No Ezekias komesa harohan ba Jeová hodi dehan: 16 “Oh Jeová, ukun-naʼin ba tropa lalehan nian, Maromak Izraél nian, Ita tuur iha kadunan iha kerubín nia leten; husi ukun sira hotu iha rai neʼe, Ita deʼit mak Maromak neʼebé loos. Ita mak halo lalehan no rai. 17 Oh Jeová, see tilun mai, no rona bá! Oh Jeová, loke Ita-nia matan, no haree bá! Rona bá liafuan hotu neʼebé Senaquerib haruka mai atu sadik Maromak neʼebé moris. 18 Oh Jeová, ema hotu hatene ona katak liurai sira husi Asíria halakon rai sira hotu, inklui mós sira-nia rai rasik. 19 Sira soe tiha nasaun sira-neʼe nia maromak sira ba ahi, tanba neʼe laʼós maromak loloos maibé ema nia liman mak halo husi ai no fatuk. Tan neʼe mak sira bele halakon maromak sira-neʼe. 20 Maibé agora, oh Jeová, ami-nia Maromak, salva ami husi ninia liman, atu nuneʼe ukun hotu iha rai neʼe bele hatene katak Ita deʼit mak Maromak, oh Jeová.”
^ par. 16 2 Reis 20:1-3 1 Iha tempu neʼebá, Ezekias sai moras toʼo besik atu mate. Tan neʼe profeta Isaías, Amoz nia oan-mane, mai no hatete ba nia, “Neʼe mak Jeová nia liafuan: ‘Fó mandamentu ba ó-nia umakain, tanba ó sei mate no sei la moris.’” 2 Rona tiha ida-neʼe, nia fila ninia oin ba didin no halo orasaun ba Jeová, hodi dehan: 3 “Haʼu husu Ita-Boot, oh Jeová, favór ida hanoin-hetan kona-ba oinsá haʼu laʼo ho laran-metin iha Ita-nia oin no serbí Ita ho laran tomak, no haʼu halo buat neʼebé diʼak iha Ita-nia oin.” No Ezekias komesa tanis makaʼas.
^ par. 18 2 Crônicas 34:1-3 1 Josias tinan ualu bainhira nia sai liurai, no nia ukun husi Jeruzalein ba tinan 31. 2 Nia halo buat neʼebé loos iha Jeová nia matan no laʼo tuir ninia beiʼala David nia dalan sira, no nia la laʼo sees ba liman-loos ka liman-karuk. 3 Iha ninia ukun ba tinan ualu, bainhira nia labarik hela, nia komesa buka ninia beiʼala David nia Maromak, no iha ninia ukun ba tinan 12, nia hahú halakon husi Judá no Jeruzalein, fatin aas sira no ai-riin lulik sira, estátua sira neʼebé bahat ona, no estátua husi besi.
^ par. 19 2 Crônicas 34:18, 19 18 Sekretáriu Safan mós hatete ba liurai: “Iha mós livru neʼebé amlulik Hilquias fó ba haʼu.” Tuirmai Safan komesa lee husi livru neʼe ba liurai. 19 Bainhira liurai rona liafuan husi Ukun-Fuan neʼe, nia lees kedas ninia unuk.
