Tusimpi 11:1-31
11 Cikkelo cabumpelenge* ncisesemyo kuli Jehova,Pele cipimyo ciluzi* cilamukkomanisya.+
2 Ikuti kuliinganya kwaboola, aalo masampu alatobela,+Pele aabo balibombya mbabajisi busongo.+
3 Ikubula kampenda kwabalulami nkokubasololela,+Pele bucenjezu bwabantu bampelenge buyoobanyonyoona beni.+
4 Lubono talukagwasyi mubuzuba bwabukali,+Pele bululami mbobuyoovwuna kulufwu.+
5 Bululami bwamuntu uunyina kampenda mbobululamika nzila yakwe,Pele mubi uyakuwa akaambo kabubi bwakwe mwini.+
6 Bululami bwabantu baluleme mbobuyoobavwuna,+Pele bantu bampelenge bayoojatwa azisusi zyabo beni.+
7 Mubi nafwa, bulangizi bwakwe bulaloba;Abwalo bulangizi bwakwe ibuyeeme anguzu zyakwe bulaloba.+
8 Mululami ulavwunwa kumapenzi,Mpoonya mubi ulanjila mumapenzi mubusena bwamululami.+
9 Siluleyo* ulanyonyoona mweenzinyina amulomo wakwe,Pele luzyibo lulabafwutula balulami.+
10 Bubotu bwabalulami bupa kuti munzi usekelele,+Pele bantu baloongolola cakukondwa ciindi babi nobaloba.
11 Munzi ulasumpuka akaambo kacileleko cabalulami,+Pele mulomo wababi ulajaya munzi.+
12 Kufwumbwa muntu uutakwe maano* ulamunyansya* mweenzinyina,Pele muntu musongo ncobeni uumuna buyo.+
13 Sibunjaka uleendeenda kayaabuyubununa makani aamaseseke,+Pele muntu uusyomeka* ulasisa makani aamaseseke.
14 Eelyo nokubula busolozi bwamaano,* bantu balawa,Pele kulaba kuzwidilila* ikuti kakuli basikulaya banji.+
15 Masimpe, kufwumbwa muntu uuzumina kuba amukuli wacikwelete camweenzu tazikamweendeli kabotu zintu,+Pele kufwumbwa uukaka kunjila mucizuminano kwiinda mukusukana mumaanza unooliibide.
16 Mukaintu uulaamoyo mubotu* ulalijanina bulemu,+Pele basankwa basilunya balabweza buvwubi canguzu.
17 Muntu siluzyalo*+ ulaliletela mpindu,Pele silunya uliletela mapenzi.*+
18 Mubi uvwola zintu zyalweeno,+Pele ooyo uusyanga bululami, upegwa bulumbu bwancobeni.+
19 Muntu uutazungaani kwiiminina bululami uyoojana buumi,+Pele ooyo uutandila bubi uli munzila iimutola kulufwu.
20 Ibampelenge mumoyo ncisesemyo kuli Jehova,+Pele aabo banyina kampenda mumilimo yabo balamukonda.+
21 Nolilampa buti:* Muntu mubi kunyina nayoolekwa buyo kakunyina kusubulwa pe,+Pele bana babalulami bayoofwutuka.
22 Mbuli ninga yangolida iibikkidwe kumpemo yangulube,Mbwabede mukaintu mubotu uukaka kulaigwa.
23 Ncobalombozya baluleme cisololela kububotu,+Pele bulangizi bwababi busololela kubukali.
24 Kuli muntu uupa bamwi cakuvwuzya,* nokuba boobo lubono lwakwe lulavwuzyigwa;+Pele kuli muntu uukaka kupa bamwi, nokuba boobo ulacetaala.+
25 Mwaabi uyoozwidilila,*+Alimwi kufwumbwa uukatalusya bamwi* alakwe uyookatalusyigwa.+
26 Bantu bayoomusinganya ooyo uukasya maila aakwe,Pele bayoomuleleka ooyo waasambala.
27 Ooyo uusoleka canguzu kucita zibotu, uyanda kukkomaninwa,+Pele ooyo uuyandaula bubi, ncobeni bubi mbobuyoomusikila.+
28 Ooyo uusyoma buvwubi bwakwe uyakuwa,+Pele balulami bayoozwidilila mbuli busyuuka matuvwu.+
29 Muntu uuli woonse uuleta mapenzi* kuli bamuŋanda yakwe, uyookona buyo muwo,+Alimwi mufwubafwuba uyooba mubelesi wamuntu musongo.
30 Micelo yamululami ncisamu cabuumi,+Alimwi ooyo uukwelelezya bantu musongo.+
31 Mbokunga mululami ulalumbulwa munyika,Nkokuti imubi alimwi asizibi bayakwiindila buya kupegwa bulumbu bubeelede!+
Bupanduluzi buyungizyidwe
^ Naa “bbwe likkwene lyakupimya.”
^ Naa “cakubeja.”
^ Naa “Muntu uutayoowi Leza.”
^ Mu Chihebrayo, “uutakwe moyo.”
^ Naa “ulamusampaula.”
^ Mu Chihebrayo, “uujisi muuya wakusyomeka.”
^ Naa “busolozi bwabusongo.”
^ Naa “lufwutuko.”
^ Naa “uulomene.”
^ Naa “uulaaluyando lutamani.”
^ Naa “masampu.”
^ Mu Chihebrayo, “Janza kujanza.”
^ Mu Chihebrayo, “uumwaya.”
^ Mu Chihebrayo, “uyooneneesyegwa.”
^ Mu Chihebrayo, “uutilaila bamwi camoyo omwe.”
^ Naa “masampu.”
