Tusimpi 16:1-33
16 Muntu ulalibambila nzyayeeya mumoyo wakwe,*Pele bwiinguzi mbwapa* buzwa kuli Jehova.+
2 Inzila zyoonse zyamuntu zilibonya kuti zililuzi* kulinguwe,+Pele Jehova ulalingula makanze aali mumoyo.*+
3 Kobikka milimo yako yoonse mumaanza aa Jehova,*+Eelyo makanze aako ayoozwidilila.
4 Jehova wakabamba zintu zyoonse kuti azuzikizye makanze aakwe,Nebaba babi ubabambilide buzuba bwamapenzi.+
5 Muntu uulisumpula mumoyo ncisesemyo kuli Jehova.+Nolilampa buti* muntu ooyu takalekwi buyo kakunyina kusubulwa.
6 Kwiinda muluyando lutamani akusyomeka mulandu ulavwumbwa akumanizyigwa,+Alimwi akaambo kakuyoowa Jehova, muntu ulacitantamuka cibi.+
7 Ikuti Jehova wakkomanina nzila zyamuntu,Upa kuti nobaba basinkondonyina bakkale muluumuno anguwe.+
8 Cilainda kubota kuba azintu zisyoonto mubululami+Ikwiinda kuba amali manji pele kakunyina bululami.+
9 Mumoyo wakwe muntu ulakonzya kuyeeya nzila yakwe,Pele Jehova nguuyendelezya ntaamu zyakwe.+
10 Eeco ncaasala Leza ceelede kuba amilomo yamwami;+Teelede kusalulula mulubeta.+
11 Cipimyo acikkelo ciluzi zyoonse buyo nzizya Jehova;Zipimyo zyoonse izili mukabbeeke milimo yakwe.+
12 Micito mibi ncisesemyo kubami,+Nkaambo bululami mbobukkazikizya cuuno cabwami.+
13 Majwi aabululami alababotela bami.Balamuyanda muntu uusyomeka muzintu nzyaamba.+
14 Bukali bwamwami buli mbuli muntu uutumwa kuti akajaye,+Pele muntu musongo ulabutontozya.*+
15 Mumumuni wabusyu bwamwami muli buumi;Kukkomaninwa anguwe kuli mbuli kkumbi lyamvwula yakumamanino.+
16 Eelo kaka cilainda kubota kujana busongo kwiinda kujana ngolida!+Kumvwisya zintu nkokweelede kusalwa kwiinda nsiliva.+
17 Mugwagwa wabalulami ulacileya cintu cibi.Kufwumbwa muntu uukwabilila nzila yakwe ubamba buumi bwakwe.+
18 Kulisumpula kusololela kulunyonyooko,Alimwi muuya wakulitukumuna nguupa kuwa.+
19 Ncibotu kulicesya* akati kabantu babombe myoyo+Kwiinda kwaabana zisaalo abantu balisumpula.
20 Ooyo uumvwisya makani ulazwidilila,*Alimwi ulikkomene ooyo uusyoma muli Jehova.
21 Muntu musongo mumoyo unakwaambwa kuti ulaamaano,+Alimwi ooyo waamba majwi mabotu* ulakwelelezya.+
22 Bupampu nkasensa kabuumi kuli baabo babujisi;Pele bafwubafwuba balasubulwa abufwubafwuba bwabo.
23 Moyo wamusongo upa kuti aambe zyamaano amulomo wakwe+Alimwi zintu nzyaamba zilakwelelezya.
24 Majwi mabotu ncimbulwe cabuci,Alanoneezya kumvwa alimwi alaponya mafwuwa.+
25 Kuli nzila iilibonya kuti ililuleme mumeso aamuntu,Pele kumamanino itola buyo kulufwu.+
26 Ikuyanda kulya kupa mubelesi kubeleka canguzuNkaambo nzala* ilamutuma kubeleka.+
27 Muntu wabuyo uyandaula zintu zibi;+Majwi aakwe alaumpa mbuli mulilo.+
28 Simanjaka* ulabusya mazwanga,+Alimwi sikubejelezya ulabaandaanya balongwe beni-beni.+
29 Muntu uuyandisya nkondo uloongelezya mweenzinyinaAlimwi ulamutola munzila mbyaabi.
30 Ulatyanka meso aakwe nakanza kucita zintu zibyaabi.Ulafwundumika milomo yakwe nacita zintu zibi.
31 Imvwi musini wabweebesi*+Ikuti zyajanika munzila yabululami.+
32 Muntu uumuka kunyema+ uli kabotu kwiinda muntu singuzu,Alimwi ooyo uujata moyo wakwe* uli kabotu kwiinda yooyo uuzunda munzi.+
33 Cisolo cilawaalwa amabelo,+Pele Jehova nguukosola makani oonse.+
Bupanduluzi buyungizyidwe
^ Naa “bwiinguzi buluzi.” Mu Chihebrayo, “bwiinguzi bwamulaka.”
^ Mu Chihebrayo, “Bubambe bwamumoyo mbwamuntu.”
^ Mu Chihebrayo, “zilasalala.”
^ Mu Chihebrayo, “ulalingula myuuya.”
^ Mu Chihebrayo, “Tola milimo yako kuli Jehova.”
^ Mu Chihebrayo, “Janza kujanza.”
^ Naa “ulabuleya.”
^ Mu Chihebrayo, “kuba amuuya wakulicesya.”
^ Mu Chihebrayo, “ulajana bubotu.”
^ Naa “majwi aakondelezya.” Mu Chihebrayo, “Alimwi kulweela kwamilomo.”
^ Mu Chihebrayo, “mulomo.”
^ Naa “Sikulipangila twaambo.”
^ Naa “wabulemu.”
^ Mu Chihebrayo, “weendelezya muuya wakwe.”