“Ndamwaambila zintu eezyi kutegwa kwiinda mulindime mube aluumuno. Munyika munoojisi mapenzi, pele amube basicamba! Mebo ndaizunda nyika.”—Johane 16:33, Bbaibbele lya Busanduluzi Bwanyika Mpya.

 “Ncendamwaambila zintu ezi kuti mulindime mube aluumuno. Munyika mulaba amapenzi, pele amulimbe myoyo, ndakiizunda nyika.”—Johane 16:33, The Bible in Tonga Lyamu 1963.

 Kwiinda mumajwi aaya, Jesu wakasyomezya basikumutobela kuti abalo bakali kukonzya kuzwidilila kukkomanisya Leza nokuba kuti balasunkwa akukazyigwa.

 “Ndamwaambila zintu eezyi kutegwa kwiinda mulindime a mube aluumuno.” Majwi aasyaala mukapango atondezya kuti kuba aluumuno oolu tacaambi kuti muntu tanoojisi mapenzi mubuumi bwakwe. Pele, aamba luumuno lwamumoyo alimwi alwamumizeezo. Luumuno oolu lulakonzyeka “kwiinda” muli Jesu, iwakasyomezya kutuma muuya uusalala. “Mugwasyi” ooyu uujisi nguzu wakali kuyoogwasya basikwiiya ba Jesu kuzwidilila ciindi nobakali mubuyumuyumu.—Johane 14:16, 26, 27.

 “Munyika munoojisi mapenzi, pele amube basicamba!” Cakutabainda mumbali, Jesu wakabaambila basikwiiya bakwe kuti bakali kuyoojana mapenzi, mbuli kucitilwa cakutalulama alimwi akupenzyegwa. (Matayo 24:9; 2 Timoteyo 3:12) Nokuba boobo, bakalijisi kaambo ncobakeelede kuba “basicamba,” naa ‘kulimba myoyo.’—Johane 16:33, The Bible in Tonga Lyamu 1963.

 “Mebo ndaizunda nyika.” Aawa bbala lyakuti “nyika,” lyaamba bantu bataluleme, ibatali balongwe ba Leza. b Lugwalo lwa 1 Johane 5:19 lwaamba kuti: “Nyika yoonse ili mumaanza aamubi,” naa Saatani. Aboobo bantu ‘bamunyika’ eeyi balayeeya alimwi akucita zintu ziteendelani akuyanda kwa Leza.—1 Johane 2:15-17.

 Saatani anyika yakwe bakasola kulesya Jesu kucita kuyanda kwa Leza, calo cakali kubikkilizya kuyiisya bamwi kujatikizya Leza alimwi akupa buumi bwakwe bulondokede kabuli cinunuzyo. (Matayo 20:28; Luka 4:13; Johane 18:37) Pele Jesu tanaakazumizya nyika kunyonganya mizeezo yakwe alimwi akupa kuti amukake Leza. Wakazumanana kusyomeka kusikila naakafwa. Aboobo, Jesu wakali kukonzya kwaamba kuti wakaizunda nyika alimwi akuti Saatani, “mweendelezi wanyika,” ‘tanaakajisi nguzu’ zyakumuzunda.—Johane 14:30.

 Jesu wakabelesya cikozyanyo cakwe kutondezya basikwiiya bakwe kuti, abalo bakali kukonzya kuzumanana kusyomeka kuli Leza nokuba kuti Saatani abantu bakwe bakali kuyoosola kubalesya kusyomeka. Munzila imwi, Jesu wakali kwaamba kuti: “Ikuti naa ndacikonzya kwiizunda nyika, andinywe inga mwacikonzya.”

 Jesu wakaamba majwi aaya ibusiku katanafwa. Kazyi kuti wakali afwaafwi kufwa, wakabelesya coolwe eeci kubaambila lulayo lwamamanino baapostolo bakwe basyomeka. Wakabikkilizya amakani aamwi ngobakali kuyandika kubikkila maano: Tiibakali kuyoomubona kabili, akuti bakali kuyoopenzyegwa, mane buya akujaigwa. (Johane 15:20; 16:2, 10) Akaambo kakuti makani aaya akali kukonzya kubayoosya baapostolo bakwe, Jesu wakamanizya amajwi aali kulugwalo lwa Johane 16:33 kubakulwaizya alimwi akubayumya-yumya.

 Majwi aa Jesu alimwi acikozyanyo cakwe zilakonzya kubakulwaizya basikumutobela amazuba aano. Banakristo boonse balakonzya kuzumanana kusyomeka kuli Leza nokuba kuti kuli mapenzi.