LUGWASYO KUMUKWASYI
Mbomukonzya Kumugwasya Mwanaanu Kutegwa Kacita Kabotu Kucikolo
Mwanaanu ulibonya kuti tabikkili maanu kucikolo, tayandi kulemba homuweki alimwi akubala. Akaambo kaceeci, waleka kucita kabotu kucikolo alimwi cilengwa eeci ciyaabwiindila. Ino mbuti mbomukonzya kumugwasya mwanaanu kutegwa kacita kabotu kucikolo?
Ncomweelede kuzyiba
Kumusungilizya mwanaanu kuyungizya buyo mapenzi. Kumusungilizya mwanaanu kupa kuti kalibilika nali kucikolo alimwi aaŋanda! Kutegwa aleke kulibilika, ulakonzya kubeja, kwaacinca malizauti, kulilembela siginecca yanu acipepa camalizauti, naa kulovwa kucikolo. Eeci cipa buyo kuti penzi liindile.
Kumupa bulumbu lyoonse cileta mapenzi. Muzyali umwi wazina lya Andrew wakaamba kuti: “Kutegwa tumukulwaizye mwaneesu musimbi, twakali kumupa zipego acita kabotu, pele eeci cakaile kupa kuti lyoonse kabikkila buyo maano kubulumbu. Atacita kabotu, wakali kuusa kapati akaambo kakutapegwa bulumbu, muciindi cakuusa akaambo kakutacita kabotu.”
Kutongooka bamayi kunyina nokuyoomugwasya mwanaanu. Eeci inga capa kuti mwanaanu abone kuti kucita kabotu kucikolo takuyandiki kubeleka canguzu. Alimwi inga watalika kutongooka bamwi kukulubizya kwakwe akulangila kuti bamwi baamane mapenzi aakwe. Mubufwaafwi, mwanaanu takonzyi kwiiya cintu ciyandika kapati aakukomena, nkokuti kuzumina kulubizya kwakwe.
Ncomukonzya kucita
Amulijate nomwanyema. Kuti mwanyema, mutabandiki makani aali woonse aajatikizya malizauti. Muzyali umwi wazina lya Brett wakaamba kuti: “Mebo abakaintu bangu twabagwasya bana besu akaambo kakukkazika moyo alimwi akuba aluyando notubandika ambabo.”
Njiisyo yamu Bbaibbele: ‘Amufwambaane kuswiilila, kumuka kwaambaula, kumuka kukalala.’—Jakobo 1:19.
Amulizyibe penzi lipa kuti cibe boobo. Kanji-kanji, twaambo tupa kutacita kabotu kucikolo nkutundululwa, kucinca zikolo, kulibilika musunko, mapenzi aamumukwasyi, kutoona, kutalibikkila mulongo naa kutabikkila maano. Mutayeeyeli kuti mwanaanu mutolo.
Njiisyo yamu Bbaibbele: “Ooyo uumvwisya makani ulazwidilila.”—Tusimpi 16:20.
Amusale busena bubotu bwakuyiila. Amumupangile mulongo wakucita homuweki alimwi awakubala. Amumujanine busena nkwakonzya kucitila homuweki kutakwe zinyonganya (mbuli TV alimwi afooni). Kutegwa mwanaanu kabikkila maano nzyabala, amumugwasye kutabala ciindi cilamfwu mbwaatalikila, pele kabala muzibeela-beela. Ba Hector, muzyali waku Germany, bakaamba kuti, “Kuti musunko ulaafwaafwi tulainduluka antoomwe cibeela cisyoonto abuzuba muciindi cakulindila kuyoozibalila antoomwe zyoonse musunko wasika.”
Njiisyo yamu Bbaibbele: “Zintu zyoonse zilijisi ciindi canzizyo.”—Mukambausi 3:1.
Amumukulwaizye kwiiya. Kuti mwanaanu wamvwisya lino bubotu mbwakonzya kujana akaambo kacikolo, ciyoomukulwaizya kwiiya. Mucikozyanyo kwiiya namba kulakonzya kumugwasya mbwayelede kwaabelesya mali ngomumupa kuti abelesye.
Njiisyo yamu Bbaibbele: “Kolijanina busongo, kolijanina maano. . . . Kobulemeka kapati.”—Tusimpi 4:5, 8.
Muzeezo: Amumugwasye kucita homuweki mwanaanu, pele kutali kumucitila buya. Ba Andrew bakaamba kuti, “Mwaneesu uyanda kuti katumucitila homuweki muciindi cakuti walo alicitile.” Amumuyiisye mwanaanu mbwakonzya kulicitila homuweki.