Sún Mọ́ Ọlọ́run
Bá a ṣe sọ nínú àpilẹ̀kọ àkọ́kọ́, ọ̀pọ̀ èèyàn ló gbà pé ìwé mímọ́ ni Bíbélì. Wọ́n ti rí i pé báwọn ṣe ń kà á, táwọn sì ń fi ohun tó wà nínú rẹ̀ sílò, ńṣe làwọn túbọ̀ ń sún mọ́ Ọlọ́run. Ìyẹn sì ti jẹ́ kí ìgbésí ayé wọn lójú.
Tí Bíbélì bá ń sọ̀rọ̀ nípa àwọn tí kò ní “ẹ̀mí Ọlọ́run,” ńṣe ló ń tọ́ka sí àwọn tí kò fi ìgbésí ayé wọn ṣe ohun tó dáa. (Júùdù 18, 19) Àmọ́ àwọn tó ní ẹ̀mí Ọlọ́run mọyì àwọn ìlànà Ọlọ́run, wọ́n sì máa ń tẹ̀ lé e. Wọn ò dà bí àwọn ẹni tara tó jẹ́ pé bí wọ́n ṣe máa tẹ́ ara wọn lọ́rùn nìkan ni wọ́n máa ń rò.—Éfésù 5:1.
ÌRÈTÍ
ÌLÀNÀ BÍBÉLÌ: “Tí o bá rẹ̀wẹ̀sì ní ọjọ́ wàhálà, agbára rẹ ò ní tó nǹkan.”—Òwe 24:10, àlàyé ìsàlẹ̀.
OHUN TÓ TÚMỌ̀ SÍ: Ìrẹ̀wẹ̀sì kì í jẹ́ ká lókun láti kojú àwọn ìṣòro wa. Àmọ́, tá a bá ní ìrètí, àá ní ìgboyà láti máa fara dà á nìṣó láìbẹ̀rù. Tá a bá ń fi sọ́kàn pé láìròtẹ́lẹ̀ nǹkan lè yí pa dà sí rere, ọkàn wa máa balẹ̀; kódà, ohun rere lè tinú àwọn ìṣòro náà jáde.
OHUN TÓ O LÈ ṢE: Gbà pé ọ̀la ń bọ̀ wá dára. Dípò kó o máa ṣàníyàn nípa ohun tó lè ṣẹlẹ̀, tàbí kó o máa dúró de àkókò tí gbogbo nǹkan máa pé pérépéré kó o tó ṣe nǹkan, á dáa kó o máa gbé ìgbésẹ̀ tó yẹ lórí àwọn àfojúsùn rẹ kọ̀ọ̀kan, torí pé àwọn nǹkan tá ò rò tẹ́lẹ̀ lè ṣẹlẹ̀ nígbàkígbà. (Oníwàásù 9:11) Ká sòótọ́, nǹkan lè pa dà wá dáa ju bá a ṣe rò lọ. Ìdí nìyẹn tí Bíbélì fi sọ pé: “Fún irúgbìn rẹ ní àárọ̀, má sì dẹwọ́ títí di ìrọ̀lẹ́, nítorí o ò mọ èyí tó máa ṣe dáadáa, bóyá èyí tàbí ìyẹn, ó sì lè jẹ́ àwọn méjèèjì ló máa ṣe dáadáa.”—Oníwàásù 11:6.
ÌDÁHÙN ÀWỌN ÌBÉÈRÈ PÀTÀKÌ
ÌLÀNÀ BÍBÉLÌ: ‘Fún mi ní òye, òtítọ́ ni ọ̀rọ̀ rẹ.’—Sáàmù 119:144, 160.
OHUN TÓ TÚMỌ̀ SÍ: Bíbélì dáhùn àwọn ìbéèrè tó fẹ́rẹ̀ẹ́ jẹ́ pé gbogbo èèyàn ló máa ń béèrè. Bí àpẹẹrẹ, ó dáhùn àwọn ìbéèrè bíi:
-
Ibo la ti wá?
-
Kí nìdí tá a fi wà láyé yìí?
-
Kí ló máa ń ṣẹlẹ̀ sáwọn tó ti kú?
-
Ṣé ìgbésí ayé ẹ̀dá ò jù báyìí náà lọ?
Àìmọye èèyàn kárí ayé ni ìgbésí ayé wọn ti dára gan-an, torí pé wọ́n ti mọ ohun tí Bíbélì sọ nípa àwọn ìbéèrè yìí àtàwọn ìbéèrè pàtàkì míì.
OHUN TÓ O LÈ ṢE: Ṣèwádìí fúnra ẹ kó o lè mọ ohun tí Bíbélì fi kọ́ni. Sọ fún ọ̀kan lára àwọn Ẹlẹ́rìí Jèhófà tó o bá mọ̀ pé kó kọ́ ẹ lẹ́kọ̀ọ́ Bíbélì. Lọ sórí ìkànnì wa, ìyẹn jw.org/yo, tàbí kó o wá sí ìpàdé wa. Gbogbo èèyàn la pè, a kì í gbowó ìwọlé.
ÀWỌN ÌLÀNÀ BÍBÉLÌ MÍÌ
Wo fídíò Kí Nìdí Tó Fi Yẹ Kó O Kẹ́kọ̀ọ́ Bíbélì? lórí jw.org/yo. Ó wà ní ohun tó ju 880 èdè lọ
MÁA WÁ ÌTỌ́SỌ́NÀ ỌLỌ́RUN.
“Aláyọ̀ ni àwọn tó ń wá ìtọ́sọ́nà Ọlọ́run.”—MÁTÍÙ 5:3.
MÁA KẸ́KỌ̀Ọ́ SÍ I NÍPA ỌLỌ́RUN NÍNÚ BÍBÉLÌ.
“Wá Ọlọ́run . . . wàá sì rí i ní ti gidi . . . kò jìnnà sí ẹnì kọ̀ọ̀kan wa.”—ÌṢE 17:27.
KA BÍBÉLÌ, KÓ O SÌ RONÚ JINLẸ̀ NÍPA OHUN TÓ WÀ NÍNÚ RẸ̀.
“Òfin Jèhófà * máa ń mú inú rẹ̀ dùn, ó sì ń ṣe àṣàrò lórí òfin Rẹ̀ tọ̀sántòru. . . . Gbogbo ohun tó bá ń ṣe yóò máa yọrí sí rere.”—SÁÀMÙ 1:2, 3, àlàyé ìsàlẹ̀.
^ ìpínrọ̀ 23 Nínú Bíbélì, Jèhófà ni orúkọ Ọlọ́run.
O Tún Lè Wo
OHUN TÍ BÍBÉLÌ SỌ
Kí Ló Túmọ̀ Sí Láti Sún Mọ́ Ọlọ́run? Ṣé Mo Lè Sún Mọ́ Ọlọ́run Bí Mi Ò Bá Ṣe Ẹ̀sìn Kankan?
Wàá rí ohun mẹ́ta tó o lè ṣe láti ní ẹ̀mí Ọlọ́run, wàá sì mọ èrò mẹ́rin tó wọ́pọ̀ tí kò tọ́ nípa rẹ̀.
ILÉ ÌṢỌ́
Báwo Ni Bíbélì Ṣe Lè Tún Ayé Mi Ṣe?
Ìwé tó ti pẹ́ gan-an yìí láwọn ìmọ̀ran tó wúlò fún wa.
