Inkantolo yezempi yaseTajik maduzane * izokhipha isinqumo ecaleni likaMfowethu uRustamjon Norov. Angase agwetshwe iminyaka esukela kwemibili kuya kwemihlanu edonsa ejele ngenxa yokwenqaba ubusosha ngenxa kanembeza. Ubelokhu eboshiwe kusukela ngo-Okthoba 1, 2020.

URustamjon Norov

• Wazalwa: 1998 (eDushanbe)

• Umlando omfushane: Ubenza umsebenzi wokulungisa izakhiwo zokuhlala nokuvuselela ifenisha ukuze azisekele yena nomndeni wakhe. Uyakuthanda ukudlala ibhola

• Wabhapathizwa ngo-2016 eneminyaka engu-17. Eminyakeni emibili kamuva, wathutha ebandleni elisebenzisa isiRussia okuhlanganyela kulo umndeni wakubo wayosiza ensimini yolimi lwesiTajik

Ngo-2016, uMfoweth’ uRustamjon Norov wazisukela yena waya ehhovisi lendawo elibhalisa izinsizwa ebusosheni. Wachaza ukuma kwakhe kokungathathi hlangothi wabe esecela ukwenza umsebenzi owehlukile onikezwa izakhamuzi ezingewona amasosha. Ngonyaka olandelayo, waphinde wenza into efanayo. Isekela lomkhuzi wamasosha ehhovisi lokubhalisa izinsizwa lamhlonipha uMfoweth’ uNorov futhi lagculiseka ngencazelo yakhe. Eminyakeni emithathu eyalandela, uMfoweth’ uNorov akazange abizwe ukuba azongena ebusosheni okuyinto eyisibopho kuzo zonke izinsizwa.

Kodwa ngoSepthemba 24, 2020, uMfoweth’ uNorov wabizelwa ehhovisi lesifunda lokubhalisa izinsizwa ebusosheni. Izikhulu ezenza umsebenzi wokufaka abantu ebusosheni zamphenya ngemibuzo amahora amathathu, ngemva kwalokho zathi ufaneleka ngokugcwele ukuba angene ebusosheni. Lezi zikhulu zabe sezizama ukumphoqa ukuba ahlolwe isimo sakhe sempilo. Ubaba kaMfoweth’ uNorov wayekhona ngesikhathi kwenzeka lokhu, ngakho wacela ukuthi lezo zikhulu zidlulisele udaba lwendodana yakhe ehhovisi likamshushisi.

UMfoweth’ uNorov noyise babe sebeya ehhovisi likamshushisi ngo-Okthoba 1. Umshushisi wathumela iphoyisa lesifunda ukuba lihambe nabo libayise ehhovisi lesifunda lokubhalisa amasosha. Lapho befika, ubaba kaMfoweth’ uNorov akavunyelwanga ukungena ngaphakathi. UMfoweth’ uNorov wavalelwa esitokisini izinsuku ezimbili. Wayengabekwanga cala ngokuqondile noma amangalelwe ngobugebengu obuthile. Ngesikhathi esesitokisini, amaphoyisa amenqabela ukuba athintane nommeli wakhe.

Ngo-Okthoba 3, uMfoweth’ uNorov wathathwa wayiswa enkambeni yamasosha edolobheni laseKhujand, eqhele ngamakhilomitha angu-300 uma usuka lapho kuhlala khona umndeni wakhe eDushanbe. Ezinsukwini ezimbili ezalandela, wayelokhu ethathwa edluliselwa ezinkambini zamasosha ezihlukahlukene eKhujand.

Ngo-Okthoba 6, uMfoweth’ uNorov wavunyelwa ukuba ashayele umndeni wakhe ucingo nokuba avakashelwe ummeli wakhe. Nokho, ngo-Okthoba 17, inkantolo yezempi yaseTajikistan yayala ukuba avalelwe esitokisini ngaphambi kokuqulwa kwecala lakhe. Uzoqhubeka evalelwe esitokisini njengoba abashushisi besenza uphenyo kuze kube yilapho inkantolo ikhipha isinqumo. UMfoweth’ uNorov umangalelwe ngokuqamba amanga ngomlando wakhe wezempilo ukuze agweme ukufakwa ebusosheni.

Nakuba egqunywe esitokisini, uMfoweth’ uNorov akazizwa neze edikibele futhi wethembele ngokuphelele kuJehova. Uyambonga uJehova ngokumsiza akhe ukholo nesibindi abekudinga ukuze abhekane nalolu vivinyo. Uyabonga nangovivinyo olungalindelekile abhekana nalo ngo-2013. Ngalowo nyaka, iziphathimandla zendawo zaya esikoleni zathatha uMfoweth’ uNorov nomfowabo omncane uRavshan ngempoqo, zabayisa ehhovisi lokubhalisa izinsizwa ebusosheni ukuze bahlolwe isimo sabo sempilo. URustamjon wayeneminyaka engu-15 kuphela ubudala ngaleso sikhathi—esemncane kakhulu ukuba angafakwa ebusosheni—futhi wayesengummemezeli ongabhapathiziwe. Ngemva kwaleso sigameko, ubaba walaba bafana, uBatyr, wasebenzisa isikhathi esengeziwe phakathi nokukhulekela komkhaya esiza abafana bakhe ukuba bakuhlomele ukuvikela ukungathathi hlangothi kwabo kobuKristu. UMfoweth’ uBatyr wayevamile ukudlala indima yesiphathimandla esibhalisa izinsizwa ebusosheni bese abafana beprakthiza indlela yokuvikela ukholo lwabo.

URustamjon uthi: “Ngaphambi kokuba sibe nezikhathi zokuprakthiza njengomndeni ekhaya, ngangicabanga ukuthi ngikulungele ukuvikela ukholo lwami. Kodwa lapho ngidlala indima yami lapho siprakthiza, yangimangaza indlela engangethuka ngayo nengangesaba ngayo. Lokho kwangenza ngabona ukuthi kudingeka ngithandaze ngokwengeziwe futhi ngitadishe kakhudlwana ukuze ngiqinise ukholo lwami futhi ngime ngiqine esinqumweni sami sokungathathi hlangothi. Kancane kancane kwaphela ukwesaba. Entwasahlobo ka-2016, nganikela ukuphila kwami kuJehova ngase ngiyabhapathizwa.”

URustamjon ukhuthazwe nawukuchitha isikhathi nabafowethu asebekhulile nabavuthiwe abake baboshwa ngenxa yokholo lwabo. Uthi: “Ngiyiqonda ngokucacile imiphumela engingase ngibhekane nayo ngokungathathi kwami uhlangothi. Uma kwenzeka ngiboshwa, ngikubheka njengelungelo ukungcwelisa igama likaJehova ‘ensimini entsha’ eyijele.”

Ubaba kaRustamjon uthi, “Umndeni wami uyambonga uJehova ngelungelo elikhulu asinike lona lokwenza intando yakhe nelokuba amathuluzi ezandleni zakhe ezinothando. Emndenini wethu wesikholwa nabo, sithi, ‘siyaluzwa ngempela uthando lwenu, imithandazo yenu nokusekela kwenu—ngokomzwelo nangokomoya.’ Asikhathazekile nhlobo. Ukuthula kukaNkulunkulu kugcwalise izinhliziyo zethu, njengoba nje uJehova esiqinisekisa ngalokho eZwini lakhe!”—Filipi 4:6, 7.