አንድ ጓደኛችን የአእምሮ ሕመም ሲይዘው ምን ማድረግ እንዳለብን ግራ ሊገባን ይችላል። ሆኖም ጓደኛችን ያጋጠመውን አስጨናቂ የአእምሮ ሕመም እንዲቋቋም በመርዳት አሳቢነታችንን ልናሳየው እንችላለን። ታዲያ ልንረዳው የምንችለው እንዴት ነው?

“ሰው ሁሉ ለመስማት የፈጠነ . . . መሆን አለበት።”—ያዕቆብ 1:19

ጓደኛህን መርዳት ከምትችልባቸው ወሳኝ መንገዶች አንዱ ማውራት ሲፈልግ ማዳመጥ ነው። ለሚናገረው ነገር ሁሉ ምላሽ መስጠት እንዳለብህ አይሰማህ። እያዳመጥከው እንዳለ እንዲያውቅ አድርግ፤ እንዲሁም በርኅራኄ ያዘው። ስሜቱን ለመረዳት ጥረት አድርግ፤ እንዲሁም የራስህ መደምደሚያ ላይ ለመድረስ ወይም በእሱ ላይ ለመፍረድ አትቸኩል። ሳያስበው በኋላ የሚጸጽተውን ነገር ሊናገር እንደሚችል አስታውስ።—ኢዮብ 6:2, 3

“የተጨነቁትን አጽናኗቸው።”—1 ተሰሎንቄ 5:14

ጓደኛህ በጭንቀት ሊዋጥ ወይም የከንቱነት ስሜት ሊሰማው ይችላል። ምን ብለህ መናገር እንዳለብህ ግራ ቢገባህም እንኳ እንደምታስብለት መግለጽህ ብቻ ሊያጽናናውና ሊያበረታታው ይችላል።

“እውነተኛ ወዳጅ ምንጊዜም አፍቃሪ ነው።”—ምሳሌ 17:17

ተግባራዊ እርዳታ ስጠው። በመሰለህ መንገድ እርዳታ ከመስጠት ይልቅ ምን እንድታደርግለት እንደሚፈልግ ጠይቀው። ጓደኛህ ምን እንደሚያስፈልገው መናገር ከከበደው አብራችሁ በሆነ እንቅስቃሴ መካፈል እንደምትችሉ ንገረው፤ ለምሳሌ ‘በእግራችን ዞር ዞር እንበል’ ልትለው ትችላለህ።  አሊያም ደግሞ ገበያ በመውጣት፣ ቤት በማጽዳት ወይም በሌላ ሥራ ልታግዘው እንደምትችል ንገረው።—ገላትያ 6:2

‘በትዕግሥት ያዟቸው።’—1 ተሰሎንቄ 5:14

ጓደኛህ አንዳንድ ጊዜ ማውራት ላይፈልግ ይችላል። ስለዚህ ማውራት በሚፈልግበት ጊዜ ልታዳምጠው ፈቃደኛ እንደሆንክ ንገረው። ጓደኛህ በሕመሙ የተነሳ የሚጎዳህ ነገር ሊናገር ወይም ሊያደርግ ይችል ይሆናል። ቀጠሮ ሊሰርዝብህ ወይም በቀላሉ ሊበሳጭ ይችላል። የሚያስፈልገውን ድጋፍ በምትሰጥበት ወቅት ታጋሽ ለመሆንና ስሜቱን ለመረዳት ጥረት አድርግ።—ምሳሌ 18:24

“ጓደኛዬ በማንኛውም ጊዜ ላዳምጣት ፈቃደኛ እንደሆንኩ እንድትተማመን እፈልጋለሁ። ለችግሮቿ መፍትሔ መስጠት ባልችልም ስትናገር በጥሞና አዳምጣታለሁ። አንዳንድ ጊዜ ሰሚ ጆሮ ማግኘቷ ብቻውን ቀለል እንዲላት ይረዳታል።”—ከአመጋገብ ችግር፣ ከጭንቀትና ከድባቴ ጋር የምትታገል ጓደኛ ያለቻት ፋራህ a

“ጓደኛዬ በጣም ደግና አዎንታዊ ነች። ቤቷ ጣፋጭ ምግብ ጋበዘችኝ። ያሳየችኝ ፍቅር ስሜቴን አውጥቼ መግለጽ ቀላል እንዲሆንልኝ አድርጓል። ይህ ደግሞ በእጅጉ አበረታቶኛል።”—ከከባድ ድባቴ ጋር የምትታገለው ሃእን

“ትዕግሥት በጣም አስፈላጊ ነው። ባለቤቴ የሚያበሳጨኝ ነገር ስታደርግ ድርጊቷ የሕመሟ እንጂ የእውነተኛ ማንነቷ መገለጫ እንዳልሆነ ለማስታወስ እሞክራለሁ። ይህም እንዳልቆጣ እንዲሁም በአሳቢነት እንድይዛት ይረዳኛል።”—ከከባድ ድባቴ ጋር የምትታገል ሚስት ያለችው ጄኮብ

“ባለቤቴ በእጅጉ ትደግፈኛለች፤ እንዲሁም ታጽናናኛለች። በጭንቀት በምዋጥበት ጊዜ የማልፈልገውን ነገር እንዳደርግ አትጫነኝም። በዚህ የተነሳ የምትፈልገውን ነገር ማድረግ የማትችልባቸው ጊዜያት ይኖራሉ። የምታሳየው የራስን ጥቅም የመሠዋት መንፈስና ልግስና በእጅጉ ረድቶኛል።”—ከጭንቀት ጋር የሚታገለው ኤንሪኮ