En dimoun ki diny konfyans i ganny konfyans son paran, zanmi ek anplwayer. I respekte bann lareg, gard son promes e toultan dir laverite.

Laplipar ditan, kantite liberte ou gannyen i relye avek kantite konfyans ki dimoun i annan dan ou.

“Pour ki ou paran i annan konfyans dan ou, i pli bon demontre ki ou matir e responsab pa zis ler ou avek zot me osi ler zot pa la.”​—Sarahi.

PRENSIP LABIB: “Kontinyen fer sir ki kalite dimoun zot ete.”​—2 Korentyen 13:5.

Ki swa ou oule ganny plis konfyans oubyen reganny konfyans ki ou’n perdi, sa bann sizesyon i kapab ed ou.

Ou bezwen onnet. Dimoun pou deswit aret annan konfyans dan ou si ou koz manti. Ler ou onnet e pare pour admet ou fot, ou kapab ganny konfyans lezot.

“I fasil pour onnet ler keksoz pe al byen. Menm ler nou fer fot, si nou onnet e admet, dimoun pou pli annan konfyans dan nou.”​—Caiman.

PRENSIP LABIB: “Nou anvi konport nou onnetman dan tou keksoz.”​—Ebre 13:18.

Ou bezwen responsab. En resers Lanmerik i montre ki 78 poursan lakonpannyen pou anploy en dimoun ki zot kapab depan lo la. Ler ou responsab depi byen zenn, sa pou benefisye ou konman en adilt pli tar.

“Mon paran i remarke ler mon responsab e fer mon louvraz kot lakour san ki zot bezwen dir mwan tou lazournen. Pli mon montre ki mon responsab, pli mon ganny zot konfyans.”​—Sarah.

PRENSIP LABIB: “Mon annan konfyans ki ou pou fer sa ki mon’n demande e menm plis ki sa ankor.”​—Filemon 21.

Ou bezwen annan pasyans. Menm si i fasil pour lezot vwar ki en zenn pe grandi, i pran letan pour vwar zot vin matir e responsab. Alor, bann zenn i bezwen annan pasyans e espere ziska ki lezot i remark sa.

“Ou pa kapab ekspekte ou paran i annan konfyans dan ou zis akoz ou’n montre ki ou responsab enn fwa. Ou bezwen kontinyelman montre ki ou responsab pour ganny zot konfyans.”​—Brandon.

PRENSIP LABIB: “Demontre . . . pasyans.”​—Kolosyen 3:12.