POUR BANN ZENN
12: Lobzektif
KI I VEDIR
En lobzektif i pa parey en rev oubyen en keksoz ki ou zis anvi i arive. Ler ou annan bann bon lobzektif ou bezwen plàn, pare pour adapte e travay dir.
I annan lobzektif ki kapab pran en ptigin letan pour atenn. Serten i kapab pran plizyer mwan e lezot enn an oubyen plis. Pour kapab atenn en lobzektif ki pran bokou letan, i tre probab ou pou bezwen atenn bann ki ptipti avan.
AKOZ I ENPORTAN
Ler ou atenn ou bann lobzektif, sa i kapab fer ou vin pli konfidan, ranforsi ou lanmitye avek lezot e fer ou pli ere.
Pli konfidan: Ler ou reisi atenn ou bann pti lobzektif, ou pou annan sa konfidans pour travay lo bann lobzektif pli difisil. Ou pou osi pli konfidan ler ou rankontre problenm dan lavi toulezour, enkli ler lezot i met presyon lo ou pour fer sa ki mal.
Ranforsi lanmitye: Dimoun i kontan frekant lezot dimoun ki annan bann bon lobzektif, konnen ki zot anvi e pare pour travay dir pour atenn zot lobzektif. Deplis, pli bon fason ki ou kapab ranforsi en lanmitye, i ler ou travay ansanm avek sa dimoun pour atenn menm lobzektif.
Pli ere: Ler ou atenn ou bann lobzektif, ou ere e satisfe.
“Mon kontan annan bann lobzektif. Zot fer mwan reste okipe e fer mwan toultan annan keksoz pour travay lo la. Ler ou atenn en lobzektif, i toultan gou pour vwar sa ki ou’n fer e ki ou’n fini sa ki ou ti konmanse.”—Christopher.
PRENSIP LABIB: “Sa enn ki per divan, pa pou zanmen plante; sa enn ki per lapli, pa pou rekolte.”—Eklezyast 11:4.
SA KI OU KAPAB FER
Sa bann sizesyon swivan pou ed ou atenn ou bann lobzektif.
Fer en lalis. Ekri bann lobzektif ki ou annan e swazir lekel ki ou anvi atenn premye, dezyenm, trwazyenm e lezot ankor.
Plàn davans. Pour sak sa bann lobzektif:
-
Met en dat ki ou pou’n fini atenn sa lobzektif. Reste rezonnab.
-
Planifye ki mannyer ou pou atenn sa lobzektif.
-
Esey imazin bann lobstak e mazinen ki mannyer pour sirmont zot.
Pran aksyon. Pa esper ziska ki ou’n mazin tou pti detay pour konmanse. Demann ou lekor, ‘Ki premye keksoz mon kapab fer pour atenn mon lobzektif?’ Apre fer sanmenm. Ekri bann keksoz ki ou’n fer pour atenn ou lobzektif.
PRENSIP LABIB: “Plan sa enn ki aktif i fer li vin ris.”—Proverb 21:5.
