1. Dahaka dainai ta dekenai hemataurai do ita hahedinaraia, bona inai stadi ai dahaka do ita herevalaia?

TA DEKENAI hemataurai ita hahedinaraia ena anina be ia ita laloa bada. Momokani, bema ta be ita dekenai gau namona ta ia karaia eiava ia be mai ena dagi, ia dekenai hemataurai do ita hahedinaraia bona ia do ita laloa bada. Vadaeni sibona ita nanadaia, ‘Daika dekenai hemataurai do ita hahedinaraia, bona dahaka dainai unai be mai anina bada?’

2, 3. (a) Dahaka dainai Iehova dekenai hemataurai do ita hahedinaraia? (Laulau ginigunana herevalaia.) (b) Apokalupo 5:13 ese ia herevalaia Mamoe Natuna be daika, bona dahaka dainai ia dekenai hemataurai do ita hahedinaraia?

² Apokalupo 5:13 ia gwau, “terona latanai ia helai Tauna bona Mamoe Natuna” dekenai hemataurai ita hahedinaraia be namo. Bona unai Baibel bukana ena karoa 4 ai, Iehova dekenai hemataurai ita hahedinaraia ena badina ia noho. Aneru be mai gado bada ida Iehova—“ia mauri noho ela bona hanaihanai Tauna”—idia hanamoa. Idia gwau: “Iehova, aiemai Dirava e, oi be hegeregere momokani, hairai, hemataurai, bona siahu oi abia totona,  badina oi ese gau ibounai oi havaraia bona oiemu ura dainai idia noho bona oi havaradia.”—Apok. 4:9-11.

³ Mamoe Natuna be Iesu Keriso, “Dirava ena Mamoe Natuna, ia be tanobada taudia edia kara dika kokia tauna.” (Ioa. 1:29) Baibel ia gwau ia ese idaunegai bona hari idia noho king ibounai ia hereaia momokani. Ia gwau: “Ia be king ibounai edia King bona lohia taudia ibounai edia Lohia. Ia sibona be ia mase diba lasi, ia be diari lalonai ia noho bona ta be ia kahirakahira ia lao diba lasi, guna taunimanima ta ese ia itaia lasi bona hari danu ta ese ia itaia diba lasi.” (1 Tim. 6:14-16) Momokani, edena king ma ta be iseda kara dika dainai mauri davalaia boubouna bamona ia mase, a? Unai dainai mai moale ida guba anerudia ibounai ida oi gwau: “Guna idia alaia mase Mamoe Natuna be ia hegeregere, siahu, taga, aonega, goada, hemataurai, hairai, bona hahenamo ia abia totona.”—Apok. 5:12.

4. Dahaka dainai Iehova bona Keriso dekenai hemataurai ita hahedinaraia be mai anina bada?

⁴ Iehova bona Keriso dekenai hemataurai ita hahedinaraia be mai anina bada. Bema unai ita karaia, mauri hanaihanai do ita abia. Iesu ena hereva Ioane 5:22, 23 ai ese unai ia hahedinaraia, ia gwau: “Tamana ese tau ta ia hahemaoro henia lasi, to hahemaoro gaukara ibounai be ena Natuna dekenai ia henia. Unai amo ibounai ese Natuna do idia matauraia, Tamana idia matauraia bamona. Natuna ia matauraia lasi tauna ese Tamana, natuna ia siaia tauna, ia matauraia lasi.”—Salamo 2:11, 12 duahia.

5. Dahaka dainai taunimanima dekenai hemataurai ita hahedinaraia be namo?

⁵ Dirava ese taunimanima be “ena toana hegeregerena ia karaia.” (Gen. 1:27) Unai dainai dala idauidau ai iena kara namodia idia hahedinaraia. Hegeregere, ta ta dekenai lalokau bona hebogahisi idia hahedinaraia diba. Danu, taunimanima ibounai be mai edia lalomamina dainai, idia diba dahaka be maoro o kerere eiava momokani o koikoi. (Roma 2:14, 15) Momo be goeva karana bona hairai gabudia idia ura henia. Bona idia ura ma haida ida maino ai idia noho. Herevana idia laloparara o lasi, idia ese Iehova ena hairai idia hahedinaraia, unai dainai idia dekenai hemataurai ita hahedinaraia danu be namo.—Sal. 8:5.

6, 7. Hemataurai hahedinaraia karana dekenai, Iehova ena Witnes taudia be edena dala ai taunimanima ma haida amo idia idau?

⁶ Hemataurai hahedinaraia karana dekenai lalohadai maorona ita abia be namo. Goevadae lasi taudia momo be Satani ena tanobada ena lalohadai ese ia veridia. Unai dainai tatau o hahine haida dekenai hemataurai idia hahedinaraia sibona lasi, to idia be edia kaivakuku ai idia halaoa. Idia ese tomadiho gunalaia taudia bona gavamani taudia, spot gadara taudia, ane abia taudia, bona unai bamona taudia ma haida idia laloa bada, bona edia dirava ai idia halaodia. Oibe, matamata bona buruka taudia danu ese edia haheitalai idia tohotohoa, hegeregere edia hereva dalana, dabua hahedokilaia dalana, o kara.

⁷ To, Keristani taudia momokanidia be unai bamona idia karaia lasi. Tanobada dekenai idia noho taudia ibounai amo Keriso sibona ena haheitalai namona ita tohotohoa be namo. (1 Pet. 2:21) Dirava be do ia moale lasi bema taunimanima dekenai hemataurai bada herea ita hahedinaraia. Inai ita laloatao be namo: “Taunimanima ibounai be idia kara dika vadaeni bona Dirava ena hairai idia reaia.” (Roma 3:23) Unai dainai taunimanima ta dekenai  hemataurai bada ita hahedinaraia be kerere.

8, 9. (a) Iehova ena Witnes taudia ese gavamani ena gaukara taudia be edena bamona idia laloa? (b) Gavamani ena gaukara taudia ita durua diba, to dahaka ita laloatao be namo?

⁸ Gaukara gabudiai, haida be mai edia dagi bada. Gavamani ena gaukara taudia haida edia gaukara be taravatu hegeregerena edia tano taudia idia gimaia, unai amo taunimanima do idia noho namonamo bona hekwakwanai neganai heduru idia henia diba. Bona unai ese namo ia havaraia. Unai dainai aposetolo Paulo ese Keristani taudia ia hamaoroa “gavamani henunai do idia noho.” Ia gwau: “Ibounai ta ta dekenai edia gaukara davana do umui henia. Takisi gogoa tauna dekenai takisi do umui henia . . . bona idia matauraia tauna do umui matauraia.”—Roma 13:1, 7.

⁹ Unai hegeregerena, Iehova ena Witnes taudia be mai moale ida gavamani ena gaukara taudia dekenai hemataurai idia hahedinaraia. Edia gaukara idia karaia neganai, idia ita durua. To, iseda heduru bona hemataurai karana be mai hetoana, bona unai be Baibel ese ia gwauraia. Oibe, ita ura lasi Dirava ita gwau-edeede henia o iseda Keristani gini siri karana ita hadikaia.—1 Petero 2:13-17 duahia.

10. Idaunegai, Iehova ena hesiai taudia ese gavamani bona ena gaukara taudia idia kara henia dalana amo dahaka ita dibaia?

¹⁰ Idaunegai, Iehova ena hesiai taudia ese gavamani bona ena gaukara taudia idia kara henia dalana amo diba ita abia. Roma Basileiana ese taunimanima duahia totona hereva ia siaia neganai, Iosepa bona Maria ese unai oda idia badinaia. Idia be Betelehema dekenai idia lao, herevana Maria be kahirakahira ena natuna ginigunana do ia havaraia. (Luka 2:1-5) Gabeai, Paulo idia gwauraia kerere neganai, mai hemataurai ida King Heroda Agripa bona Festo edia vairanai sibona ena maoro ia gwauraia hedinarai, Festo be Roma ena provinsi Iudea ena gavana.—Kara 25:1-12; 26:1-3.

11, 12. (a) Gavamani ena gaukara taudia bona tomadiho gunalaia taudia be edena bamona do ita kara henidia? (b) Austria tadikakana ese memba ta dekenai hemataurai ia hahedinaraia dainai, dahaka ia vara?

¹¹ Iehova ena Witnes taudia ese tomadiho gunalaia taudia idia matauraia bada lasi, herevana unai gunalaia taudia idia ura taunimanima ese unai dala ai idia kara henia. Tomadiho koikoi ese Dirava ia gwauraia kerere bona iena Hereva lalonai idia noho hahediba herevadia idia hagagevaia. Unai dainai taunimanima ma haida ita kara henia hegeregerena tomadiho gunalaia taudia do ita kara henia, to idia dekenai hemataurai bada ita hahedinaraia be anina lasi. Iesu ena negai, ia ese unai bamona tatau ia gwauraia koikoi bona matakepulu hakaua taudia. (Mat. 23:23, 24) To danu, gavamani ena gaukara taudia dekenai hemataurai ita hahedinaraia neganai, namo ita davaria diba.

¹² Leopold Engleitner be haroro goadagoada tadikakana. Ia be Austria amo bona guna Nazi taudia ese ia idia dogoatao bona trein amo Buchenwald ena dibura kamepa dekenai idia siaia. Tadikaka ia noho trein lalonai doketa Heinrich Gleissner ia noho danu. Ia be guna Austria gavamanina ena memba ta. To Nazi taudia ese ia idia lalonamo henia lasi. Dibura kamepa dekenai idia lao noho lalonai, Tadikaka Engleitner be mai hemataurai ida Gleissner ia haroro henia, bona ia kamonai namonamo. Tanobada tuarina iharuana murinai, Gleissner be nega momo ena siahu ia gaukaralaia Austria ai idia noho Witnes taudia ia durua totona. Oibe, Witnes taudia ese gavamani ena gaukara taudia dekenai hemataurai  idia hahedinaraia neganai, namo ia vara diba. Momokani, Baibel ese Keristani taudia ia haganidia unai idia karaia totona.

13. Daidia dekenai hemataurai do ita hahedinaraia, bona dahaka dainai?

¹³ Iseda abidadama tamona taudia dekenai hemataurai ita hahedinaraia danu be namo. Oibe, elda taudia dekenai hemataurai ita hahedinaraia be gau badana. (1 Timoteo 5:17 duahia.) Unai tadikaka do ita matauraidia, herevana edia bese, edukeisen, dagi be bada, o idia be taga o ogogami taudia. Baibel ia gwau idia be “harihari gaudia bamona,” bona Dirava ese idia ia gaukaralaia ena taunimanima idia naria totona. (Efe. 4:8) Mani kongrigeisen elda taudia, sekit naria taudia, Brens Komiti taudia, bona Hakaua Oreana taudia ita laloa. Aposetolo edia negai, tadikaka taihu be edia hakaua taudia idia laloa bada, bona hari danu unai bamona ita karaia be namo. Unai tadikakadia ida ita noho neganai, ita ura lasi idia be aneru ta bamona ita kara henidia. To edia hekwarahi bona manau karana dainai, ita hemataurai henidia be namo.—2 Korinto 1:24; Apokalupo 19:10 duahia.

14, 15. Edena dala ai Keristani mamoe naria taudia be tomadiho gunalaia taudia amo idia idau?

¹⁴ Unai elda taudia be mai manau ida mamoe idia naria. Unai dainai idia ura lasi edia tadikaka ese idia be ladana bada taudia bamona idia kara henia. Idia be hari bona Iesu ena negai idia noho tomadiho gunalaia taudia bamona lasi. Iesu ese idia ia gwauraia, ia gwau: “Aria negadiai idia ura gabu namona dekenai idia helai, bona sinagoga lalonai vaira kahanai idia helai. Bona taunimanima momo gabudiai, idia ura haida ese idia hanamodia.”—Mat. 23:6, 7.

¹⁵ Keristani elda taudia be mai manau ida Iesu ena hereva idia badinaia, ia gwau: “Namo lasi umui idia gwauraia Rabi, badina emui Hadibaia Tauna be tamona bona umui ibounai be tadikaka. Danu, tanobada ai tau ta umui gwauraia lasi emui tamana, badina emui Tamana be tamona, guba Tamana unai. Eiava umui idia gwauraia lasi hakaua taudia, badina emui Hakaua Tauna be tamona, Keriso unai. To namona be umui huanai ia bada tauna be emui hesiai tauna. Sibona ia abia isi tauna be do idia hamanaua, bona sibona ia hamanaua tauna be do idia abia isi.” (Mat. 23:8-12) Oibe, elda taudia be idia manau dainai, kongrigeisen taudia ibounai ese idia lalokau henidia bona matauraia.

16. Dahaka dainai do ita hekwarahi ma haida dekenai hemataurai ita hahedinaraia totona?

¹⁶ Nega ia hanaia lalonai, reana do ita  diba edena bamona ma haida dekenai hemataurai ita hahedinaraia diba. Keristani taudia ginigunadia dekenai unai ia vara danu. (Kara 10:22-26; 3 Ioa. 9, 10) To bema ita hekwarahi Baibel ena hereva hegeregerena ma haida dekenai hemataurai ita hahedinaraia, namo bada do ita davaria.

17. Mai edia dagi taudia dekenai hemataurai ita hahedinaraia ena namo be dahaka?

¹⁷ Bema gavamani henunai idia gaukara taudia dekenai hemataurai ita hahedinaraia, idia ese ita idia durua diba ita haroro noho totona. Reana idia ese iseda haroro gaukara idia laloa maoromaoro. Lagani haida gunanai, Germany ai ia noho painia ta, Birgit, be ena natuna kekeni ena sikuli gradueisen dekenai ia lao. Tisa taudia ese Birgit idia hamaoroa, idia hanaia laganidia lalonai, Witnes natudia ida idia gaukara hebou dainai idia moale. Idia gwau bema edia sikuli ai Witnes natudia be lasi, unai do ia vara lasi. Birgit ia gwau: “Emai natudia ai hadibaia Dirava ena kara maoromaoro taravatudia idia badinaia totona, unai dainai idia ese edia tisa taudia idia matauraia.” Tisa ta ia gwau: “Bema natudia ibounai be emui natudia bamona, emai hahediba gaukarana be mai moale ida do ai karaia.” Wiki haida murinai, tisa ta be Leipzig ena hebouhebou dekenai ia lao.

18, 19. Elda taudia dekenai hemataurai ita hahedinaraia neganai, dahaka ita laloatao be namo?

¹⁸ Dirava ena Hereva lalonai idia noho hakaua herevadia ese ita do idia durua dala maorona ai kongrigeisen elda taudia ita matauraidia totona. (Heberu 13:7, 17 duahia.) Idia karaia gaukara badana dainai idia do ita hanamoa bona idia henia hakaua herevadia ita badinaia be namo. Unai ita karaia neganai, idia be mai moale ida edia gaukara idia karaia diba. To namo lasi ita laloa, unai ena anina be ita ese elda ta ena dabua hahedokilaia dalana, ena tok henia dalana, eiava ena herevahereva dalana ita tohotohoa. Bema unai ita karaia, unai ese lalohadai kererena ia henia diba. Laloaboio lasi, ia danu be goevadae lasi tauna. Namona be Keriso sibona ita badinaia bona tohotohoa.

¹⁹ Elda taudia ita matauraia, to ladana bada taudia bamona ita kara henidia lasi neganai, unai ese idia do ia durua. Oibe, idia be do idia manau, bona do idia laloa lasi idia be ma haida idia hereaia eiava idia be kara maoromaoro taudia.

20. Ma haida dekenai hemataurai ita hahedinaraia karana ese edena bamona ita ia durua?

²⁰ Ma haida dekenai hemataurai ita hahedinaraia neganai, ita be sibona do ita laloa bada lasi. To, ma haida ese ita dekenai hemataurai idia hahedinaraia neganai, do ita hekokoroku lasi. Danu, hemataurai karana ese ita ia durua Iehova ena orea ida ita gaukara hebou totona, unai orea ese taunimanima ta—abidadama eiava abidadama lasi tauna—dekenai hemataurai bada ia hahedinaraia lasi. Momokani, unai be aonega dalana, badina ita ia durua unai amo ita matauraia tauna be iseda lalona ia hahisia neganai, do ita moru lasi.

21. Dahaka badina badana dainai ma haida dekenai hemataurai ita hahedinaraia be namo?

²¹ Momokani, ma haida dekenai hemataurai ita hahedinaraia be mai anina bada, badina unai ese Dirava ia hamoalea. Iena ura hegeregerena do ita kara bona ia do ita badinaia noho. Unai dala amo Iehova ese ia idia samania taudia ia halusia diba. (Aon. 27:11) Hari inai negai, taunimanima be dala maorona ai ma haida dekenai hemataurai idia hahedinaraia lasi. Ita moale badina ita be Iehova ena dala hegeregerena ma haida dekenai hemataurai ita hahedinaraia.