1-3. “Mai kudouna ibounai ida” Dirava hesiai henia karana ena anina be dahaka? Haheitalai gwauraia.

ITA BE goevadae lasi dainai, kerere ita karaia diba. To bema iseda kara kerere amo ita helalo-kerehai, Iesu ena mauri davalaia boubouna ita abidadama henia, bona mai manau ida Iehova ita guriguri henia, Ia ese iseda “kara dika ena bada hegeregerena” ita do ia kara henia lasi. (Sal. 103:10) To, Davida ese Solomona ia hamaoroa hegeregerena, Iehova ese iseda tomadiho karana do ia abia dae, bema ‘mai iseda kudouna ibounai’ ida iena hesiai gaukara ita karaia. (1 Siv. 28:9) Ita be goevadae lasi dainai, edena bamona unai ita karaia diba?

² Ita durua totona, mani King Asa bona King Amasaia ita laloa. Unai Iuda king rua be Iehova ena matanai idia kara maoromaoro, to Asa be mai kudouna ibounai ida unai ia karaia. (2 Siv. 15:16, 17; 25:1, 2; Aon. 17:3) Unai king rua be idia goevadae lasi bona idia kerere danu. To, Asa be Dirava ia badinaia noho, bona mai kudouna ibounai ida Dirava ia hesiai henia. (1 Siv. 28:9) To, Amasaia be mai kudouna ibounai ida Iehova ia hesiai henia lasi. Ia ese Dirava ena inai taudia ia halusidia murinai, edia kaivakuku  ia abidia giroa bona ia tomadiho henidia matamaia.—2 Siv. 25:11-16.

³ “Mai kudouna ibounai ida” Dirava hesiai henia karana ena anina be ta ese Iehova ia lalokau henia bona ia ura ia do ia tomadiho henia ela bona hanaihanai. Baibel ai, inai hereva “kudouna” be nega momo idia gaukaralaia ta ena ura, lalohadai, kara, diba, bona tahua gaudia idia herevalaia totona. Unai dainai mai kudouna ibounai ida Iehova ia hesiai henia tauna be mai momokani ida unai ia karaia. Ita be edena bamona? Ena be ita be goevadae lasi, to mai momokani ida Dirava ita tomadiho henia diba. Oibe, mai kudouna ibounai ida ia do ita hesiai henia.—2 Siv. 19:9, NWT.

4. Inai stadi ai dahaka do ita herevalaia?

⁴ Mai kudouna ibounai ida Dirava hesiai henia karana ena anina ita lalopararalaia namonamo totona, mani Asa bona Iuda ena king ma toi ita lalodia. Idia be Iehosapata, Hesekaia, bona Iosaia. Ena be unai king 4 be idia kerere, to Iehova ese idia ia lalonamo henia, badina ia itaia idia be mai kudouna ibounai ida ia idia hesiai henia. Dahaka dainai Dirava be unai ia karaia, bona edena dala ai idia ita tohotohoa diba?

5. Asa be dahaka ia karaia?

⁵ Israela ena not kahana ena iduhu 10 basileiana ia parara murinai, Asa be Iuda ena king ihatoina. Ia ese kaivakuku ibounai ia hadikaia ore bona dubu amo lebulebu karadia idia karaia tatau ia luludia. Danu, ena tubuna hahine Maka be “kwini dagi dekena amo ia kokia, badina be ia ese Asera ena kaivakuku, lebulebu gauna, ia haginia.” (1 Kin. 15:11-13) Ma danu, Asa ese Iuda taudia ia hamaoroa Iehova “do idia tahua, bona iena Taravatu bona oda do idia badinaia.” Oibe, ia ura bada taunimanima ese tomadiho momokani idia badinaia.—2 Siv. 14:4.

6. Etiopia taudia ese Iuda idia tuari henia neganai, Asa be dahaka ia karaia?

⁶ Iehova ese Asa ena lohia laganina 10 ia hanamoa dainai, Iuda Basileiana lalonai tuari ia vara lasi. Gabeai Etiopia tauna Sera be iena tuari tatau 1,000,000 bona kariota 300 ida ia mai Iuda taudia tuari henia totona. (2 Siv. 14:1, 6, 9, 10) Asa be dahaka ia karaia? Ia be Iehova ia abidadama henia momokani. (2 Sivarai 14:11 duahia.) Bona Iehova ese Asa ena guriguri ia kamonai henia, bona idia ese Etiopia ena tuari oreana idia halusia. (2 Siv. 14:12, 13) Ena be nega haida king taudia be Iehova idia badinaia lasi, to iena ladana dainai idia ia durua bona tuari lalonai idia kwalimu. (1 Kin. 20:13, 26-30) Asa be Dirava dekenai ia tabekau, bona Iehova ese iena guriguri ia kamonai henia. To gabeai, Asa be mai aonega ida ia kara lasi. Hegeregere, ia ese Iehova ena heduru ia noia lasi, to Suria ena king ena heduru ia noia. (1 Kin. 15:16-22) Ena be Asa be unai ia karaia, to iena “mauri dinadia ibounai lalonai mai kudouna ibounai ida Iehova ia badinaia.” Bona Iehova be unai ia itaia. Edena dala ai Asa ena kara ita tohotohoa diba?—1 Kin. 15:14, NWT.

7, 8. Iehova oi hesiai henia lalonai, edena dala ai Asa do oi tohotohoa?

⁷ Namona be sibona iseda kudouna ita sekea, unai amo do ita diba bema ita be mai kudouna ibounai ida Dirava ita hesiai henia noho eiava lasi. Sibona ita nanadaia, ‘Egu lalona lau hadaia Iehova do lau hamoalea, tomadiho momokani lau badinaia, bona kara gagevadia amo iena taunimanima lau gimaia totona, a?’ Mani oi laloa, Asa be mai lalogoada ida ena tubuna hahine, Maka, ena “kwini dagi” ia kokia! Reana hari ta be  Asa ena tubuna hahine bamona ia kara lasi, to Asa ena lalogoada karana oi tohotohoa diba. Hegeregere, bema emu ruma bese tauna ta eiava emu turana namona ta ia kara dika bona ia helalo-kerehai lasi dainai, kongrigeisen amo idia atoa siri be edena bamona? Ia do oi bamoa noho, a? Emui lalomamina ese oi do ia doria dahaka oi karaia totona?

⁸ Hekwakwanai momo oi davaria neganai, Dirava dekenai oi tabekau be namo, Asa hegeregerena, unai amo oi hahedinaraia oi be mai kudouna ibounai ida ia oi hesiai henia. Hegeregere, sikuli ai oi idia hevasehalaia, badina oi be Iehova ena Witnes tauna ta. Eiava gaukara taudia ese oi idia gwauraia dika, badina hebouhebou dekenai oi lao totona oi gaukara lasi, eiava ovataim gaukara oi karaia lasi. Unai bamona negadia, Dirava oi guriguri henia, Asa hegeregerena. Bona mai lalogoada ida Iehova dekenai oi tabekau, bona kara maorona oi karaia noho. Laloatao, Dirava ese Asa ia hagoadaia bona durua hegeregerena, Ia ese oi do ia hagoadaia danu.

9. Ita haroro neganai, edena bamona ita hahedinaraia ita be sibona iseda namo ita laloa lasi?

⁹ Dirava ena hesiai taudia be sibodia edia namo idia laloa lasi. Asa be ma haida ia durua tomadiho momokani idia badinaia totona. Unai hegeregerena, ita ura ma haida ita durua Iehova “idia tahua” totona. Iehova be ia moale, bema ia itaia iseda neiba bona ma haida dekenai Ia ita herevalaia, bona unai ita karaia badina ia ita lalokau henia bona taunimanima edia vaira nega ita laloa!

10, 11. Edena dala ai Iehosapata do oi tohotohoa?

¹⁰ Asa ena natuna Iehosapata be “iena tamana ena kara hegeregerena” ia kara. (2 Siv. 20:31, 32) Edena dala ai? Iena tamana hegeregerena, Iehosapata ese taunimanima ia hagoadaia Iehova idia tahua totona. Ia ese tatau haida ia siaia lao bona idia ese taunimanima dekenai “Lohiabada ena Taravatu Buka” idia hadibaia. (2 Siv. 17:7-10) Israela ena not kahana Basileiana bona Eparaima ena ororo gabudia dekenai ia lao danu, Iehova “dekenai edia lalodia ia hagiroa lou” totona. (2 Siv. 19:4) King Iehosapata be “mai ena kudouna ibounai danu Lohiabada ia tahua.”—2 Siv. 22:9.

¹¹ Hari danu, Iehova ia ura taunimanima be ia idia dibaia, bona ita ibounai be unai gaukara ita durua diba. Oi ura hua ta ta ai ma haida dekenai Dirava ena Hereva oi hadibaia, unai amo idia danu be Dirava idia hesiai henia diba, a? Bema oi hekwarahi, Dirava ese oi do ia hanamoa bona Baibel stadi ta do oi hamatamaia. Unai tahua gauna oi atoa bona gurigurilaia, a? Oi ura ta oi stadi henia, herevana unai be emu laga-ani negana, a? Iehosapata be Eparaima dekenai ia lao, badina ia ura taunimanima ia durua tomadiho momokani idia badinaia lou totona, ita danu ita ura idia manoka taudia ita durua. Danu, namona be elda taudia ese dala idia karaia orea amo idia atoa siri taudia idia vadivadi henia bona durua totona, bema idia be edia kara gunadia idia rakatania.

12, 13. (a) Tuari orea badana idia mai neganai, Iehosapata be dahaka ia karaia? (b) Edena dala ai Iehosapata ita tohotohoa diba?

¹² Tuari oreana badana be Iuda tuari henia totona idia mai neganai, Iehosapata be Dirava dekenai ia tabekau, iena tamana Asa hegeregerena. (2 Sivarai 20:2-4 duahia.) Ena be Iehosapata ia gari, to Dirava dekenai ia guriguri, idia “ia hakaua totona.” Iena guriguri lalonai, ia hahedinaraia ia bona ena taunimanima be hegeregere lasi unai “tuari orea bada herea” idia tuari henia totona, bona idia diba lasi dahaka do  idia karaia. Oibe, ia be Iehova dekenai ia tabekau, ia gwau: “Oi dekenai aiemai matana ai negea noho, oi ese ai do oi durua totona.”—2 Siv. 20:12.

¹³ Iehosapata hegeregerena, reana nega haida ita diba lasi dahaka do ita karaia, bona do ita gari danu. (2 Kor. 4:8, 9) To laloatao, Iehosapata ese taunimanima vairanai ia gwauraia gurigurina amo ia hahedinaraia ia bona ena taunimanima be idia manoka. (2 Siv. 20:5) Hekwakwanai negadiai, ruma bese kwaradia ese Iehosapata idia tohotohoa diba. Idia ese guriguri amo Iehova ena heduru idia noia diba, unai hekwakwanai idia haheaukalaia totona. Emu famili vairanai oi gwauraia gurigurina ai unai oi herevalaia diba, oi hemarai lasi. Unai amo do idia itaia oi be Iehova oi abidadama henia. Dirava ese Iehosapata ia durua, bona ia ese oi do ia durua danu.

14, 15. Edena dala ai Hesekaia ia hahedinaraia ia be Dirava dekenai ia tabekau?

¹⁴ Hesekaia danu be “Lohiabada ia badinaia namonamo,” herevana ena tamana be haheitalai namona lasi bona kaivakuku ia tomadiho henia. Hesekaia ese “dirava koikoi tomadiho ataiai gabudia bona nadidia ia hamakohia, Asera ena kaivakuku ia utua diho, bona guna Mose ia karaia auri gaigai ia hamakohia maragimaragi,” unai ia karaia badina Israela taudia ese idia tomadiho henia. Hesekaia be Iehova ia badinaia momokani, bona “Lohiabada ena Taravatu ibounai, Mose dekenai ia henia gaudia ibounai, ia badinaia namonamo.”—2 Kin. 18:1-6.

¹⁵ Asuria ena tuari orea goadana be Iuda tuari henia totona idia lao bona idia ura Ierusalema idia hadikaia ore neganai, Hesekaia be mai kudouna ibounai ida Iehova dekenai ia tabekau. Asuria ena king, Senakeriba, ese Iehova ia hevasehalaia bona Hesekaia ia hagaria danu. To, guriguri amo Hesekaia ia hahedinaraia ia abia dae momokani Iehova ese ena siahu badana amo iena taunimanima do ia hamauria. (Isaia 37:15-20 duahia.) Dirava ese iena guriguri ia kamonai bona aneru ta amo Asuria taudia 185,000 ia alaia mase.—Isa. 37:36, 37.

16, 17. Edena dala ai Hesekaia oi tohotohoa diba?

¹⁶ Gabeai Hesekaia ia gorere bona kahirakahira ia mase. Unai nega ai ia ese Iehova ia noia iena kara do ia laloatao. (2 King Taudia 20:1-3 duahia.) Baibel ese ita hadibaia hari Dirava be hoa dalanai iseda gorere do ia hanamoa lasi eiava iseda mauri laganidia do ia halataia lasi. To Hesekaia hegeregerena, guriguri amo ita ta ta be Iehova dekenai ita gwau diba: “Mai egu kudouna ibounai oiemu hesiai gaukara lau karaia, bona oiemu vairana dekenai lau kara maoromaoro.” Oi abia dae momokani Iehova be nega ibounai oi do ia durua, oi gorere negadiai danu, a?—Sal. 41:3.

¹⁷ Hesekaia ena haheitalai ita laloa dobu neganai, iseda hetura karana Dirava ida ia koua eiava tomadiho momokani amo ita ia hakaua siri gauna ta ita laloa diba. Oibe, tanobada taudia be Intanet gaukaralaia karana amo taunimanima be edia kaivakuku ai idia halaoa, to namo lasi edia kara ita tohotohoa. Momokani, Keristani taudia haida be Intanet amo edia famili o turadia idia hereva henidia. To tanobada taudia momo be Intanet amo idia diba lasi taudia idia tura henia. Eiava edia nega bada idia halusia unai taudia edia laulau idia itaia o sivarai idia duahia totona. Momokani, anina bada lasi gaudia dekenai iseda nega bada ita halusia be mai ena dika. Keristani tauna be ia hekokoroku diba, bema momo be  Intanet ai ia atodia laulau idia ura henia, eiava do ia badu bema unai idia karaia lasi. Mani aposetolo Paulo, eiava Akwila bona Prisikila ita laloa. Oi laloa dina ta ta ai idia be nega bada idia atoa Dirava idia hesiai henia lasi taudia edia sivarai idia duahia totona, a? Baibel ia gwau Paulo be “nega bada ia gaukaralaia Dirava ena hereva ia harorolaia totona.” Bona Prisikila bona Akwila ese edia nega idia gaukaralaia ma haida dekenai “Dirava ena dala” idia herevalaia totona. (Kara 18:4, 5, 26) Sibona ita nanadaia, ‘Ma haida laloa bada karana eiava anina bada lasi gaudia dekenai nega bada halusia karana lau dadaraia, a?’—Efeso 5:15, 16 duahia.

18, 19. Oi ura edena dala ai Iosaia oi tohotohoa?

¹⁸ King Iosaia, Hesekaia ena tubuna mero, be “mai ena kudouna ibounai” Iehova ena hahegani ia badinaia. (2 Siv. 34:31) Ia be do mero neganai, “ia ese iena sene tauna king Davida ena Dirava ia tahua hamatamaia,” bona ena mauri lagani be 20 neganai, Iuda amo kaivakuku ibounai ia hadikaia ore. (2 Sivarai 34:1-3 duahia.) Iosaia ia ura dikadika iena kara amo Dirava ia hamoalea, Iuda ena king ma haida be unai bamona lasi. To, Mose ena Taravatu bukana idia davaria bona Iosaia dekenai idia duahia neganai, ia laloparara gau ma haida ia karaia be namo Dirava ena ura ia hagugurua totona. Ma haida ia hagoadaia Iehova idia hesiai henia totona. Unai dainai, iena mauri dinadia ibounai lalonai, taunimanima be “Lohiabada . . . ena dala dekena amo idia raka siri lasi.”—2 Siv. 34:27, 33.

¹⁹ Iosaia hegeregerena, namona be matamata taudia ese Iehova idia tahua matamaia. Ia helalo-kerehai tauna, King Manase, ese reana Iosaia dekenai Dirava ena hebogahisi karana ia hadibaia. Matamata taudia e, emu famili eiava kongrigeisen ai idia noho abidadama buruka taudia oi tura henia bona Iehova ese idia ia durua dalana do oi dibaia. Laloatao danu, Toretore Helagadia duahia karana ese Iosaia ena kudouna ia hamarerea dainai, kara ia karaia. Unai hegeregerena, bema Baibel oi duahia, do oi ura emu moale oi habadaia bona emu hetura karana Dirava ida oi hagoadaia. Bona do oi ura ma haida oi durua Dirava idia dibaia totona. (2 Sivarai 34:18, 19 duahia.) Danu, Baibel stadilaia karana ese oi do ia durua emu hesiai gaukara Dirava dekenai oi hanamoa totona. Bema unai oi karaia, oi be Iosaia oi tohotohoa unai.

20, 21. (a) Ita herevalaia king 4 be edena dala ai idia hegeregere? (b) Stadi gabena ai dahaka do ita herevalaia?

²⁰ Ita herevalaia Iuda ena king 4 be mai kudouna ibounai ida Iehova idia hesiai henia. Idia amo dahaka ita dibaia? Idia be idia ura bada Dirava ena ura idia karaia bona idia gaukara goada unai idia hagugurua totona. Oibe, Dirava ena ura idia karaia noho, herevana tuari orea goadadia be idia tuari henia totona idia mai. Mai anina bada gauna be inai, idia be Iehova idia lalokau henia dainai ia idia hesiai henia.

²¹ Stadi gabena ai do ita itaia, ita herevalaia king 4 be idia kerere danu. To, iseda kudouna ia Tahua Tauna be idia ia tahua namonamo neganai, ia itaia idia be mai kudouna ibounai ida ia idia hesiai henia. Ita danu be goevadae lasi. To, Iehova ese ita ia tahua namonamo neganai, do ia itaia ita be mai kudouna ibounai ida ia ita hesiai henia, a? Stadi gabena ai unai do ita herevalaia.