1, 2. Dahaka dainai Iuda ena king 4 edia kara do ita herevalaia?

BEMA oi itaia ta be ia raka noho lalonai ia dedi bona moru, ia badinaia dalana ai oi raka neganai, do oi naria namonamo, ani? Unai hegeregerena, ma haida edia kerere ita laloa neganai, unai ese ita do ia durua idia karaia kererena ita dadaraia totona. Iseda Dirava badinaia karana dekenai unai be momokani. Hegeregere, Baibel ese ia sivarailaia taudia edia kerere amo diba ita abia.

² Vanegai stadi ai ita herevalaia king 4 be mai kudouna ibounai ida Iehova idia hesiai henia. To, kerere badadia haida idia karaia danu. Edia kara amo dahaka ita dibaia, bona unai ese edena dala ai ita ia durua edia kara ita tohotohoa lasi totona? Edia kerere ita laloa dobu neganai, Baibel lalonai ita hadibaia totona idia torea gaudia amo namo ita davaria diba.—Roma 15:4 duahia.

3-5. (a) Ena be Asa be mai kudouna ibounai ida Iehova ia hesiai henia, to dahaka ia vara? (b) Basa be Iuda ia tuari henia gwauraia neganai, dahaka dainai Asa be taunimanima dekenai ia tabekau?

³ Mani Asa ita herevalaia guna. Etiopia taudia milioni ta be Iuda tuari henia totona idia mai neganai, Asa be Iehova dekenai  ia tabekau. To, Israela ena king, Basa, ese Iuda ena boda ai ia noho taoni, Rama, ena magu ia haginia matamaia neganai, Asa be Iehova ena heduru ia tahua lasi. (2 Siv. 16:1-3) Ia be sibona ena aonega dekenai ia tabekau bona Suria ena king, Benehadada, ia noia Basa ia tuari henia totona. Asa ena palani ia guguru, a? Baibel ia gwau: “King Basa be inai sivarai ia kamonai, vadaeni Rama hagoadaia gaukara ia hadokoa, bona unai gabu ia rakatania.” (2 Siv. 16:5) Matamanai, Asa ia laloa ia be abia hidi maorona ia karaia!

⁴ To, Iehova ese Asa ena kara be edena bamona ia laloa? Asa be Iehova dekenai ia tabekau lasi dainai, ia ese ena gwaukau tauna, Hanani, ia siaia Asa ia sisiba henia totona. (2 Sivarai 16:7-9 duahia.) Hanani ia gwau: “Hari ia lao, tuari be nega ibounai do idia vara oi dekenai.” Basa ese ena haginia gaukarana ia rakatania, to Asa ena lohia dinadia ibounai lalonai, ia bona ena taunimanima be tuari momo lalonai idia vareai.

⁵ Vanegai stadi ai ita itaia bamona, Dirava ese Asa ena kudouna ia tahua bona ia davaria Asa be Ia ia badinaia momokani. (1 Kin. 15:14) Oibe, Dirava ena matanai, Asa be mai kudouna ibounai ida Ia ia tomadiho henia. To, ia karaia abia hidi kererena dainai dika ia davaria. Dahaka dainai Asa be ia sibona bona ma haida dekenai ia tabekau, to Iehova dekenai ia tabekau lasi? Reana Asa ia laloa ia ese tuari dala ma haida do ia gaukara ia kwalimu totona. Eiava sisiba kererena ia kamonai dainai unai ia karaia.

6. Asa ena kerere amo dahaka ita dibaia? Haheitalai gwauraia.

⁶ Asa ena kerere amo dahaka ita dibaia? Nega ibounai Iehova dekenai do ita tabekau, sibona iseda aonega dekenai ita tabekau lasi. Hekwakwanai badadia ita davaria neganai, Iehova ena heduru ita noia. To dina ta ta ai ita davaria hekwakwanai maragidia be edena bamona? Sibona iseda lalohadai hegeregerena unai hekwakwanai do ita hamaoromaorodia, a? Eiava Baibel ena hakaua herevadia do ita tahua bona badinaia? Bema unai ita karaia, ita hahedinaraia ita ura Iehova ena dala ita badinaia. Hegeregere, kongrigeisen heboudia eiava hebouhebou badadia oi lao henia dainai, emu famili ese oi idia dagedage henia neganai, Iehova ena heduru oi noia, unai amo dala maorona ai unai hekwakwanai oi hamaoromaoroa diba. Eiava bema emu moni gaukara oi haboioa, bona ia auka gaukara ma ta oi davaria be edena bamona? Gaukara biaguna ida oi herevahereva neganai, ia do oi hadibaia oi be wiki ta ta ena hebou dekenai do oi lao, a? Herevana iseda hekwakwanai be dahaka, to salamo torea tauna ena hereva do ita badinaia, ia gwau: “Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.”—Sal. 37:5.

7, 8. Iehosapata be dahaka kerere ia karaia, bona dahaka ia vara? (Laulau ginigunana herevalaia.)

⁷ Hari mani Asa ena natuna, Iehosapata, ita laloa. Iena kara namodia be momo. Ia be Iehova dekenai ia tabekau dainai, gau namodia momo ia karaia. To, abia hidi kereredia ia karaia danu. Hegeregere, dala ia karaia ena natuna ta ese King Ahaba ena natuna ia adavaia totona. Bona ena be peroveta tauna Mikaia ese ia sisiba henia, to Iehosapata ese Ahaba ia bamoa bona Suria taudia idia tuari henia. Unai tuari lalonai, Iehosapata be kahirakahira ena mauri ia haboioa. Bena Ierusalema dekenai ia giroa lou. (2 Siv. 18:1-32) Vadaeni peroveta tauna Iehu ese ia nanadaia: “Kara dika taudia oi durua noho, bona Lohiabada idia badu  henia taudia oi ura henia noho, be maoro, a?”—2 Sivarai 19:1-3 duahia.

⁸ Iehosapata be ia dekenai ia vara gauna bona Ahaba ena sisiba amo gau ta ia dibaia, a? Lasi. Ena be ia ura bada Dirava ia hamoalea, to ia ese Dirava ia inai henia tauna ma ta ia bamoa lou. Unai be Ahaba ena natuna, King Ahasaia. Idia ruaosi ese sisima badadia idia karaia, to unai sisima idia do gaukaralaia lasi neganai, idia dika.—2 Siv. 20:35-37.

9. Tura kereredia bamoa karana ena dika be dahaka?

⁹ Iehosapata ena sivarai amo dahaka ita dibaia? Iehosapata be king namona. Ia be kara maorona ia karaia bona “mai ena kudouna ibounai danu Lohiabada ia tahua.” (2 Siv. 22:9) To, tura kereredia ia bamoa dainai, hekwakwanai idauidau ia davaria. Momokani, kahirakahira ena mauri ia haboioa. Inai aonega hereva mani ita laloa: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” (Aon. 13:20) Ita ura kamonai taudia ita durua hereva momokani idia dibaia totona. To, Iehova idia hesiai henia lasi taudia ita tura henia be aonega karana lasi.

10. (a) Bema ita ura ita headava, Iehosapata amo dahaka ita dibaia? (b) Tura kereredia bamoa karana dekenai dahaka ita laloatao be namo?

¹⁰ Bema ita ura headava, Iehosapata amo dahaka ita dibaia? Reana Keristani tauna ta be Witnes lasi tauna ta ia ura henia matamaia, badina ia laloa Keristani taudia momokani huanai ia bamona tauna ta ia noho lasi. Eiava Keristani tauna ena Witnes lasi varavara ese ia idia doria ia headava haraga totona, idia gwau, ‘dika ia buruka bona ta do ia davaria lasi.’ To ma haida edia lalohadai be inai taihu ena bamona, ia gwau: “Emai lalona ai hadaia ta do ai lalokau henia eiava tura henia lasi.” Keristani tauna be dahaka do ia karaia? Iehosapata dekenai ia vara gauna laloa dobu karana ese ita ia durua diba. Ia be hanaihanai Dirava ena hakaua dalana ia tahua. (2 Siv. 18:4-6) To Ahaba, Iehova ia lalokau henia lasi tauna, ia tura henia neganai, dahaka ia vara? Iehosapata be inai ia diba be namo, Iehova ese mai kudouna ibounai ida  ia idia hesiai henia taudia ia tahua noho. Hari danu, Dirava ena matana be “tanobada ena kahana ibounai idia itaia noho,” bona ia be ia noho hegaegae ita ia “hagoadaia totona.” (2 Siv. 16:9) Ita dekenai idia vara gaudia ia lalopararalaia bona ita ia lalokau henia. Oi abia dae momokani, Dirava ese oi dekenai adavana namona ta do ia henia, a? Namona be oi abia dae ia be unai ia karaia diba!

11, 12. (a) Hesekaia ese edena dala ai iena kudouna ai ia noho gauna ia hahedinaraia? (b) Dahaka dainai Dirava ese Hesekaia ia badu henia noho lasi?

¹¹ Hesekaia amo dahaka ita dibaia? Iehova ese Hesekaia ia durua iena kudouna ai ia noho gauna ia diba totona. (2 Sivarai 32:31 duahia.) Hesekaia ia gorere bada neganai, Dirava ese ia dekenai toa ta ia hahedinaraia, unai amo ia hamomokania ia be do ia namo. Ia hahedinaraia toa ai, dina ena laulau be aena atoa gabuna 10 ia diho. Gabeai, Babulonia ena lohia taudia be idia ura unai toa ena anina idia diba dainai, Hesekaia dekenai tatau haida idia siaia. (2 Kin. 20:8-13; 2 Siv. 32:24) Baibel ia gwau, “Dirava ese Hesekaia ia rakatania” neganai, iena kudouna ai ia noho gauna ia hedinarai. Oibe, Hesekaia ese Babulonia taudia dekenai “iena kohu namo herea” ia hahedinaraia. Unai kavakava karana amo iena kudouna ai ia noho gauna ia hahedinaraia.

¹² Hesekaia ia hekokoroku ena badina be Baibel ese ia gwauraia lasi. Ia hekokoroku badina Asuria taudia ia halusia eiava Dirava ese hoa dalanai ena gorere ia hanamoa, a? Eiava badina “ena kohu be momo, bona taunimanima ibounai ese ia idia matauraia”? Herevana ena badina be dahaka, to Hesekaia ia hekokoroku dainai, “ia ese Lohiabada ena bogahisihisi totona ia tanikiu henia lasi.” Madi! Ena be Hesekaia be mai kudouna ibounai ida Dirava ia hesiai henia, to ia hekokoroku dainai, Iehova be ia dekenai ia moale lasi. To gabeai, “Hesekaia ese iena hekokoroku ia negea, bona ia manau lou,” unai dainai Dirava ese ia bona ena taunimanima ia badu henia lasi.—2 Siv. 32:25-27; Sal. 138:6.

13, 14. (a) Edena nega ai Iehova ese ita do ‘ia rakatania, ia tohoa’ totona? (b) Ma haida ese ita idia hanamoa neganai, dahaka do ita karaia?

¹³ Hesekaia ena sivarai ita duahia bona laloa dobu karana ena namo be dahaka? Laloatao, Iehova ese Senakeriba ia halusia bona Hesekaia be ena gorere dikana amo ia hanamoa murinai, Hesekaia ena hekokoroku karana ia hedinarai. Unai hegeregerena, bema ita be kara namona ta ita karaia, reana Iehova ese ita do “ia rakatania, ia tohoa” totona, ‘badina ia ura diba iseda lalona be edena bamona,’ unai amo iseda kudouna ai ia noho gauna ia hedinarai diba. Hegeregere, reana tadikaka ta be ia hegaegae bona gaukara goada hutuma vairanai tok ia henia totona. Tok ia karaia namonamo dainai momo ese ia idia hanamoa. Ia idia hanamoa dainai ia be dahaka do ia karaia?

¹⁴ Haida ese ita idia hanamoa neganai, namona be Iesu ena hereva ita laloa, ia gwau: “Umui dekenai idia henia gaukara ibounai umui haorea neganai, umui gwau, ‘Ai be anina lasi igui hesiai taudia. Ai karaia be maoro gaukarana be ai karaia haorea unai.’” (Luka 17:10) Hesekaia dekenai ia vara gauna amo gau ta ita dibaia. Hesekaia ia hekokoroku, badina “ia ese Lohiabada ena bogahisihisi totona ia tanikiu henia lasi.” Dirava ese ita totona ia karaia gau namodia ibounai ita laloa dobu neganai, Iehova ese ia inai henia karana do ita dadaraia. Mai moale ida ma haida dekenai ita ia  durua dalana do ita herevalaia. Iena taunimanima durua totona, ia ese Toretore Helagadia bona lauma helaga ia henia.

15, 16. Iosaia be dahaka ia karaia dainai, ena mauri ia haboioa?

¹⁵ Bona King Iosaia amo dahaka ita dibaia? Ena be ia be king namona, to ia karaia kererena dainai ena mauri ia haboioa. (2 Sivarai 35:20-22 duahia.) Dahaka ia vara? Iosaia be King Neko “tuari henia totona ia toreisi, ia lao,” ena be unai king ese Iosaia ia hamaoroa ia be ia tuari henia totona ia lao lasi. Baibel ia gwau Neko ese ia gwauraia herevadia be “Dirava ena hereva.” To, dahaka dainai Iosaia be Neko tuari henia totona ia lao? Baibel be unai ia gwauraia lasi.

¹⁶ Iosaia be edena bamona do ia diba Neko ese ia gwauraia herevadia be Iehova amo? Abidadama peroveta tauna ta, Ieremia, ia nanadaia diba. (2 Siv. 35:23, 25) To Baibel ia gwau lasi ia be unai ia karaia. Danu, Neko be Karakemisi dekenai ia lao bese ma ta ia tuari henia totona, to Ierusalema tuari henia totona lasi. Bona danu, ia ese Dirava ena ladana eiava ena taunimanima ia hadikaia lasi. Unai dainai Iosaia ese Neko ia tuari henia be kerere. Unai sivarai amo dahaka ita dibaia? Hekwakwanai ta ia vara neganai, namona be Iehova ena lalohadai ita tahua guna.

17. Hekwakwanai ta ia vara neganai, edena dala ai Iosaia ena kara do ita tohotohoa lasi?

¹⁷ Bema hekwakwanai ta ia vara, namona be Baibel ena hakaua herevadia ita laloa bona ita badinaia. Nega ma haida ai, elda edia heduru ita noia diba. Reana unai hekwakwanai hanaia daladia haida ita diba bona iseda pablikeisen ai tahua karana ita karaia vadaeni. Danu, elda ta ese ita ia durua diba Baibel ena hakaua hereva ma haida ita laloa totona. Hegeregere, taihu ta ia diba sivarai namona harorolaia gaukarana be iena maduna. (Kara 4:20) Bema dina ta ia abia hidi ia haroro totona, to iena Witnes lasi adavana ia ura unai dina ai ia be ruma ai do ia noho. Ia ura idia ia hamoalea gaukarana idia karaia hebou, badina nega daudau unai idia karaia lasi. Reana taihu be Baibel siri haida do ia laloa, hegeregere Dirava do ia kamonai henia bona taunimanima be hahediba taudia ai halaoa gaukarana ena hahegani. (Mat. 28:19, 20; Kara 5:29) To namona be ia laloatao, iena tau be ena kwarana, unai dainai do ia laloa maoromaoro. (Efe. 5:22-24; Fili. 4:5) Iena adavana ese haroro gaukara amo ia ia koua, eiava ia noia unai dina tamona ai gau ma ta do idia karaia hebou? Dirava ena ura ita karaia neganai, namona be ita laloa maoromaoro bona lalomamina namona ita dogoatao.

18. Inai stadi ai ita herevalaia king 4 edia sivarai ese edena dala ai oi ia durua?

¹⁸ Ita be goevadae lasi dainai, ita herevalaia king 4 ese idia karaia kerere ita karaia diba. Reana (1) taunimanima edia aonega dekenai ita tabekau diba, (2) tura kereredia ita bamoa, (3) ita hekokoroku, eiava (4) Dirava ena ura ita laloa guna lasi bena abia hidi ita karaia. To ita moale badina Iehova be ita dekenai gau namona ta ia itaia, unai king 4 dekenai ia itaia bamona! Danu, Iehova ia diba ita be ia ita lalokau henia bona ita ura bada ia ita hesiai henia. Unai dainai ita hadibaia totona, Baibel lalonai unai sivarai ia toredia, unai amo idia karaia kerere do ita karaia lasi. Namona be unai Baibel sivaraidia ita laloa dobu bona unai sivaraidia dainai Iehova ita tanikiu henia!