Библийы цы хорз хабары кой цӕуы, уый у Йегъовӕйӕ. Йегъовӕ у амондджын Хуыцау, ӕмӕ йӕ фӕнды, цӕмӕй бинонтӕ дӕр амондджын уой (1 Тимофеймӕ 1:11). Бинонты цардӕн бындур Хуыцау ӕрӕвӕрдта. Лӕг ӕмӕ усы ӕнӕмӕнг хъӕуы сӕ къухтӕ ӕрфыссын, уымӕн ӕмӕ уӕд ныййарджытӕ дӕр ӕмӕ сывӕллӕттӕ дӕр уыдзысты амондджын ӕмӕ сӕ алчидӕр зондзӕн, йӕ бинонтӕ кӕрӕдзийы кӕй уарзынц. Чырыстӕттӕ хъуамӕ аргъ кӕной, бинонтӕ скӕныны фӕдыл сӕ бӕстӕйы цы закъӕттӕ ис, уыдонӕн. Бакӕс Лукайы 2:1, 4, 5.

Хуыцауы фӕнды, цӕмӕй лӕг ӕмӕ ус цӕрӕнбонты уой иумӕ. Нӕлгоймаг ӕмӕ сылгоймаг сӕ цард хъуамӕ баиу кӕной закъонмӕ гӕсгӕ (Лукайы 2:1, 4, 5). Йегъовӕйы фӕнды, цӕмӕй лӕг ӕмӕ ус кӕрӕдзийыл ӕнувыд уой (Дзуттӕгтӕм 13:4). Уый йе «сӕфт уыны хицӕн кӕнынӕй» (Малахи 2:16). Фӕлӕ йӕ цардӕмбал гадзрахатӕй кӕуыл рацӕуа, уыцы адӕймагӕн Хуыцау уый бар дӕтты, цӕмӕй дзы ахицӕн уа ӕмӕ ногӕй бинонтӕ скӕна. Бакӕс Матфейы 19:3–6, 9.

Йегъовӕ нӕлгоймаг ӕмӕ сылгоймаджы афтӕ скодта, ӕмӕ дзы бинонты царды алкӕмӕн дӕр ис йӕхи бынат (Райдиан 2:18). Нӕлгоймаг бинонты хистӕр кӕй у, уымӕ гӕсгӕ хъуамӕ йӕ бинонты дара ӕмӕ, Хуыцауы Ныхасы цы фыст ис, уый сын амона. Стӕй хъуамӕ йӕ усы удуӕлдай уарзтӕй уарза. Уӕвгӕ, лӕг дӕр ӕмӕ ус дӕр хъуамӕ сӕ кӕрӕдзи уарзой ӕмӕ кӕрӕдзийӕн аргъ кӕной. Иу адӕймаг дӕр ӕнӕрӕдийгӕ нӕу, ӕмӕ уымӕ гӕсгӕ лӕг ӕмӕ ус хъуамӕ сахуыр уой кӕрӕдзийӕн барын. Уый фӕрцы иумӕ амондджынӕй цӕрдзысты. Бакӕс Ефесӕгтӕм 4:31, 32; 5:22–25, 33; 1 Петры 3:7.

Лӕг ӕмӕ ус кӕрӕдзи куы не ’мбарой, уӕд сӕ дыууӕ дӕр хъуамӕ сӕхиуыл кусой ӕмӕ сӕ уарзондзинад хъуыддагӕй  ӕвдисой (1 Коринфӕгтӕм 13:4, 5). Хуыцауы Ныхас афтӕ нӕ дзуры, ӕмӕ бинонтӕ куы нӕ фидауой, уӕд хъуамӕ хицӕнтӕй цӕрой, ома ус йӕ цӕгатмӕ алидза кӕнӕ лӕг йӕ усы ныууадза. Бакӕс 1 Коринфӕгтӕм 7:10–13.

Йегъовӕйы фӕнды, цӕмӕй сывӕллӕттӕ амондджын уой. Ӕмӕ сын уымӕ гӕсгӕ амоны царды ӕппӕты хуыздӕр фӕндаг. Сӕ ныййарджытӕ фылдӕр кӕй зонынц ӕмӕ царды фылдӕр кӕй федтой, уымӕ гӕсгӕ Хуыцауы фӕнды, цӕмӕй сӕ зондмӕ хъусой (Колоссӕгтӕм 3:20). Стӕй Йегъовӕйы фӕнды, цӕмӕй йын сывӕллӕттӕ йӕхи зӕрдӕ дӕр ӕмӕ йӕ Фырт Йесойы зӕрдӕ дӕр рухс кӕной, уымӕн ӕмӕ йӕ зоны, уый сын стыр циндзинад кӕй хӕсдзӕн. Бакӕс Екклесиаст 11:9–12:1; Матфейы 19:13–15; 21:15, 16.

Цӕмӕй сывӕллӕттӕн хӕринаг, уӕлӕдарӕс ӕмӕ, кӕм цӕрой, уый уа, уый тыххӕй ныййарджыты хъӕуы бирӕ фыдӕбон кӕнын (1 Тимофеймӕ 5:8). Фӕлӕ цӕмӕй сывӕллӕттӕ амондджын уой, уый тыххӕй ма сӕ хъӕуы ахуыр кӕнын Хуыцауы уарзын ӕмӕ йӕ уынаффӕтӕм хъусын дӕр (Ефесӕгтӕм 6:4). Ныййарджытӕ Хуыцауы кӕй уарзынц, уый сывӕллон куы уына, уӕд ӕй йӕхӕдӕг дӕр бауарздзӕн. Сывӕллонӕн зонд Хуыцауы Ныхасӕй куы амоной, уӕд ӕй афтӕмӕй раст фӕндагыл сараздзысты. Бакӕс Дыккаг закъон 6:4–7; Ӕмбисӕндтӕ 22:6.

Сывӕллӕтты хъӕуы рӕвдауын ӕмӕ сӕ ӕппӕлын, уымӕн ӕмӕ сыл уӕд базыртӕ базайы. Фӕлӕ сын хатт фӕхъӕуы бауайдзӕф кӕнын ӕмӕ зонд бацамонын дӕр. Уый сӕ бахъахъхъӕндзӕн ӕнӕзонд митӕй ӕмӕ уӕд фӕсмойнаг никуы фӕуыдзысты (Ӕмбисӕндтӕ 22:15). Ӕцӕг, сывӕллоны бафхӕрын куы хъӕуа, уӕд ныййарджытӕ хъуамӕ ӕгӕр карз кӕнӕ ӕгъатыр ма уой. Бакӕс Колоссӕгтӕм 3:21.

Йегъовӕйы Ӕвдисӕнтӕ мыхуыры рауагътой, ныййарджытӕн ӕмӕ сывӕллӕттӕн стыр ӕххуыс чи у, цалдӕр ахӕм чиныджы. Цы уынаффӕтӕ дзы ис, уыдон ист сты Библийӕ. Бакӕс Псалом 19:7, 11.