BAQQI YIIYYE! Kiiro 2 2018 | Maate Seekkannoha 12 Qara Coye
Maate Seekkannoha 12 Qara Coye
Duucha woyite, maate seekkannokki gede assannori maatiro kullanna macciishshineemmo. Ikkina maate seekkanno gede assannori maatiyya?
Yunayitidi Isteetisete, 1990 nna 2015 mereero noo dirra giddo adhama diigannohu 50 diro ale ikkannonsa manni kiiro ero ikkitino; 65 diro ale ikkannonsa manni kiiro kayinni sase ero ikkitino.
Annuwahonna amuuwaho coyi gurchaawinonsa: Mitu egennaammi, ooso assiture assiturono insa naada hasiissanno yitanno; wolootu kayinni oosote godowa leellishiˈra dihasiissanno yitanno.
Wedellootu qinaabbino heeshsho heeˈrate kaaˈlitannonsa ogimmanna dandoo rossukki lophitanno.
Ikkirono, . . .
Adhanna adhama hagiirsiissannotanna geedonnita assiˈra dandiinanni.
Annuwunna amuuwu oosonsa baxillunni seejjitanno gara rosa dandiitanno.
Wedellootu jajjabba ikkitanno woyitira hasiissannonsa dandoonna ogimma rosa dandiitanno.
Kuni ikkannohu hiittoonniiti? Tini Baqqi Yiiyye! yinanni metseete maate seekkannoha 12 qara coye kultanno.
1: Ammaname Heeˈrate Murciˈra
Minaanninna minaama ammaname mitteenni heeˈrate assa dandaannoha sase coye.
2: Kaaˈlame Loosa
Galtekki ledo mulla ledo heeˈranno manni gede ikkitine heedhinoonniha lawannohe?
3: Mimmito Ayirrisa
Galtekki ayirrisattoseta affanno gede assannore coyiˈranna assa dandaattohu hiittoonniitiro rosi.
4: Gatona Yaa
Galtekkita guuntete xeˈne illachishattokki gede mayi kaaˈlannohe?
5: Hasaawa
Oosoˈnewa roore shiqate kaaˈlannoha sase qara coye.
6: Seejjo
Seejjo ooso hutissannoni?
7: Amanyootu Seerinni Heeˈra
Oosoˈnera rosiisa hasiissannoˈne seeri hiikkonneeti?
8: Lawishsha Ikka
Oosoˈne, coyidhinannire assitara hasidhiniro coyidhinanniri assitinanniri ledo sumuu yaannoha ikka hasiissannosi.
9: Ayimmakki Afa
Wedellootu ammantino coye seekkite cuˈmiˈra dandiitannohu hiittoonniiti?
10: Ammaˈninanniha Ikka
Lophitine miqichaamma ikkate anniˈnenna amaˈne ammaˈnitannoˈnere ikke.
11: Chaachaara Ikka
Wedellimmakkinni diinaggaabbe loosa rosa, heeshshokki woˈmate kaaˈlitannohe.
12: Mixo Fushshiˈra
Fushshiˈrootto mixo wonshiˈrittoro worba ikkatto, wolootu ledo noohe jaaloomi kaajjanno hattono hagiirraamo ikkatto.
Maatete Kaaˈlannore Wolere
Qullaawu Maxaafi amaale adhamaˈne seekkanno gedenna maatekki hagiirraame ikkitanno gede assitanno.