Oosoˈne ledo dancha gede hasaabbinoonni yaa dandiinannihu mimmitoho giddoˈneta fantine kultinanniha ikkirooti.

Roorenkanni wedella ikkitino oosoˈne ledo hasaawa qarra ikkitaˈnera dandiitanno. Oosoˈne shiimmaaddu noo waro baalankare kultannoˈne. Wedelloota ikkitanno woyite kayinni garire dihasaabbannoˈne; hakko daafira hedonsanna giddonsata afa didandiitinanni. Mittu lowo lagira kawaanna kaˈaanni uurritinoonnihu gedeeti. Tenne yannara oosoˈne kiˈne ledo hasaawa hasidhannokkiha lawara dandaanno; ikkirono, oosoˈne albinni roore hasaawisa hasiissannoˈne yanna tenneeti!

Oosoˈne hasaawa hasidhanno yannara hasaawate maahoyye yiiyye. Oosoˈne hashsha yanna yannitino woyite hasaawissaˈnera hasidhuro nafa macciishsha gibbinoonte.

“‘Barra diledo honsummo! Xa kaˈe hasaambo yaatto?’ yaate hendeemmoha ikkara dandaanno. Kayinni, oosonke hasaawissankera hasidhuro caaccaawa dihasiissannonke. Kuni di-annuwunna amuuwu baalu hasidhanno coyeeti?”—Liisa.

“Yannante goxa baxeemmoha ikkirono, roore woyite wedellu oosoˈya ledo dancha gede hasaambeemmohu hashshu taalooti gedensaanniiti.”—Herberti.

QULLAAWU MAXAAFI BIDDISHSHA: “Ayino wolu qiniite ikkinnina umisi qiniite hasiˈroonke.”—1 Qorontoosi 10:24.

Seekkitine macciishshe. Mittu anni togo yiino: “Mito woyite oosoˈya hasaawissanni heedheennae ani wolere hedeemmo. Hakkawote insa, macciishsha agure wolere hedanni noommota affanno!”

Aterano hedokki bebbeehantannoha ikkiro, televizhiine cufi woy silke worte aguri. Oosoˈne coyidhanno woyite seekkitine macciishshe; insara huluullinori hakkeeshshi geeshsha dhiwinore lawa hoogiˈnero nafa hixamanyitine macciishshe.

“Oosonke huluullinonsa coye mulluri gede assine laˈneemmokkita affanno gede assa hasiissannonke. Hatto ikka hoogiro, dhiwinonsare ninkera dihasaaphitanno woy kaaˈlo afiˈrate wolu manniwa hadhanno.”—Maaranda.

“Oosoˈne heddinori gara lawa hoogiˈnero nafa hanqitinoonte.”—Antooni.

QULLAAWU MAXAAFI BIDDISHSHA: “Ma garinni macciishshitinanniro seekkitine wodanche.”—Luqaasi 8:18.

Hasaawa dandiitinanni faro hasidhe. Mito woyite ooso giddonsata roore fushshite coyidhannohu anninsanna amansa ledo ofolte hasaabbanno woyite ikkikkinni insa ledo mitteenni mitore loossanno woyiteeti.

“Qaaqqoˈya ledo makeenunni haˈneemmo woyite hasaambeemmo. Ofolline alba alba hinge hasaawantenni makeenu giddo qote qoteho ofolline haˈra hasaawate roore faro fantinonke.”—Nikooli.

Sagalete yannano hasaawate dancha faro fantanno.

“Hashsha hurbaatu yannara baalunku hakko barra tuncu yiinonkeha bushano ikko dancha coye kayinse hasaambeemmo. Kuni rosichi mittimma heedhannonke gede assinonke; qoleno qarrinke yannara kaaˈlannonkehu noota huwanteemmo gede assinonke.”—Roobini.

QULLAAWU MAXAAFI BIDDISHSHA: “Mannu baalu macciishshate rahinoha, coyiˈrate . . . muddamannokkiha ikko.”—Yaiqoobi 1:19.