Gatona yaa mannu koffi assannonke woyite, coye godowaho wodha agurre maare saˈˈate. Gatona yineemmo yaa miincanninke woyite lashshi assine saˈneemmo woy horo miincoonninkekkihu gede ikkineemmo yaa diˈˈikkino.

QULLAAWU MAXAAFI BIDDISHSHA: “Kiˈne kiˈneneewa koffi yitinoonni coye baala cincatenni agurre.”—Qolasiyaasi Sokka 3:13.

“Mitto mancho baxattoha ikkiro, guuntete xeˈnesi illachisha agurte hiittoo mancho ikkate sharramanni nooro hedatto.”—Aarooni.

Koma amaxxa adhamaˈne gawajjitannotano agurranna manninateˈnenna hedoˈneno gawajjitara dandiitanno.

“Mitte hige minaanniˈya lowo geeshsha koffi assinoe daafira maaro xaˈmiˈrie. Hakkawoyite isira gatona yaa qarra ikkitinoe. Gedensoonni gatona yoommasiha ikkirono, hakkawoyitenni gatona yaa hoogoommatera gaabboomma. Korkaatuno tini mimmitoho albi gede ikkineemmokki gede assitinonke.”—Juuliya.

ATENEETO LAYIˈRI

Galteˈne coyidhinori woy assitinori xissiisiˈnero kiˈneneeto togo yitine xaˈme:

• ‘Shiimare coye batisanni noommo ikka?’

• ‘Koffi yoommo coyi galteˈya maaro xaˈmiˈra hasiissannose geeshsha ikkinohonso, mulla lashshi asse agureemmo gedeereeti?’

AANTE NOO XAˈMUWA GALTEˈNE LEDO HASAABBE

• Duucha woyite, mimmitoho gatona yaate mageeshshi yanna keeshshineemmo?

• Coye godowaho amande keeshshineemmokki gede maa assa dandiineemmo?

KAAˈLITANNO AMAALE

• Koffi yitinanni gede assannori tuncu yiiˈnero, galteˈne kiˈne xissiisate affanni heedhenni assitinori gede assitine heddinoonte.

• “Ninke baalunku woˈmanka woyite [soˈneemmore]” ikkinoommota qaaggine galteˈnera gatona yitine saˈˈate woˈnaalle.—Yaiqoobi 3:2.

“Soˈnoommori lamenka ikkinummoro mimmito gatona yaa diqarrissannonke; ane soˈro diˈˈikkitino yine hendeemmo woyite kayi, gatona yaa roore qarra ikkitannonke. Maarie yiino mancho maare saˈˈate meessaneeto heeshshi assa hasiissanno.”—Kimberlii.

QULLAAWU MAXAAFI BIDDISHSHA: “Rakke araarami.”—Maatewoosi 5:25.