•  Iloilo oe lava

•  Aiseā ou te manaʻomia ai fautuaga?

•  E faapefea ona ou talia fautuaga?

•  Manatu o au uō

 E iai taimi e tatou te manaʻomia ai fautuaga e fesoasoani e faaleleia atili ai a tatou galuega po o amioga. Mafaufau i faataʻitaʻiga nei.

1.  ● Ua taʻu atu e lou faiaʻoga iā te oe, e leʻi lava le taimi na faaalu e fai ai au meaaʻoga. E tatau ona e faaalu le tele o le taimi e faia ai au saʻiliʻiliga.

    O le ā le auala e te tali atu ai?

   1.  A. Tetee. (ʻE lē fiafia le faiaʻoga iā te aʻu.’)

   2.  E. Talia. (ʻO le a ou faatatauina lana fautuaga pe a fai le isi aʻu meaaʻoga.’)

2.  ● Ua taʻu atu e lou tinā e gasu lou potu, ae faatoʻa uma lava ona tapena.

    O le ā le auala e te tali atu ai?

   1.  A. Tetee. (ʻO lana amio a le la.’)

   2.  E. Talia. (ʻSa tatau ona tapena lelei loʻu potu.’)

3.  ● Ua faailoa atu e lou tei laʻititi lona lē fiafia i le auala fia pule e te faatonuina ai o ia.

    O le ā le auala e te tali atu ai?

   1.  A. Tetee. (ʻE leai sana aiā e faamasino ai aʻu gaoioiga.’)

   2.  E. Talia. (ʻE tatau ona ou feagai ma ia i se auala agalelei.’)

 E tai pei nisi talavou o ni ipu mataʻetaʻe. E vave ona lē fiafia pe a fautuaina i latou, e oo a i fautuaga lāiti. Po o lou tulaga lena? Pe afai o lea, ua e misia la se olaga lelei! Aiseā? Talu ai o le taliaina o fautuaga o se vala taua e mafai ona fesoasoani ia te oe i le taimi lenei, ma le lumanaʻi pe a avea oe ma tagata matua.

•   E te lē lelei atoatoa. Ua faapea mai le Tusi Paia: “E sesē i tatou uma i mea e tele.” (Iakopo 3:2) O lea e manaʻomia e tagata uma fautuaga.

   “Ou te taumafai e manatua o i tatou uma e lē lelei atoatoa, ma o le faia o mea sesē o se vala masani o le olaga. Pe a ou mauaina la faasaʻoga, ou te taumafai e aʻoaʻoina mai ai ni lesona, ma ʻalofia le toe faia o le mea sesē—David.

•   E mafai ona faaleleia atili. Ua faapea mai le Tusi Paia: “Ia avatu faatonuga i le tagata atamai, e atili atamai ai o ia.” (Faataoto 9:9) E mafai ona e maua aogā mai fautuaga pe a e taliaina.

   “Na sesē laʻu vaai i fautuaga i le taimi muamua. Na ou manatu ua pei ai aʻu o se tagata leaga. Ae o le taimi lenei ua mafai ona ou talia fautuaga ma saʻili atu i ai. Ou te fia iloa le auala e faaleleia atili ai.”—Selena

 O le mea moni, e mafai ona tatou saʻili mo ni fautuaga. Ae e ese foʻi le auala e tatou te mafaufau ai pe a maua ni fautuaga e leʻi faatalitalia. O le faamatalaga lenei a Natalie ina ua ia mauaina se tusi o loo avatu ai se fautuaga e leʻi fiafia ai: “Na ou lagona le lē fiafia ma le lotovaivai. Na ou manatu i ai o se aʻoaʻiga!”

 Pe na tupu se mea faapena iā te oe? Pe afai e tupu, e faapefea ona e fesagaʻia?

•   Faalogo.

   Ua faapea mai le Tusi Paia: “O lē ua pulea ana upu ua iā te ia le poto, a o le tagata ua iai le faautaga loloto ua toʻafilemu lona loto.” (Faataoto 17:27) Aua e te faasalavei pe a talanoa atu se isi iā te oe. Aua le vave ona tali atu ma fai atu se tala e te toe salamo mulimuli ane ai!

   “Pe a ou maua ni fautuaga, ou te le taumafai e faasao oʻu manatu. Nai lo lea, e tatau ona ou aʻoaʻo ni lesona mai le fautuaga ma faaleleia atili ai.”—Sara.

•   Ia uaʻi atu i le fautuaga, ae lē o le tagata e aumaia le fautuaga.

   E te ono uaʻi atu i mea sesē a le tagata o loo aumaia le fautuaga. Ae sili atu ona aogā, pe a e mulimuli i le fautuaga a le Tusi Paia ina ʻia faalogologo lelei, ae aua le vave ona tautala, ma aua foʻi le vave ona ita.’ (Iakopo 1:19) E masani lava ona iai se itu e lelei ai fautuaga. Aua nei misia se mea e tatau ona e faalogo i ai, ona e te lē manaʻo e te faalogo i ai.

   “Pe a ou maua faasaʻoga mai oʻu matua, e masani ona ou ita ma faapea atu, ʻO lea ou te iloa.’ Ae pe a ou faalogo lelei ma faatatau a la fautuaga, e tele iʻuga lelei ou te maua mai ai.”—Edward.

•   Ia iai se vaaiga paleni iā te oe lava.

   O lou mauaina o fautuaga, e lē faapea ai ua e lē taulau. Ae ona e iai foʻi taimi e te sesē ai pei o isi. E oo lava i le tagata lea o loo fautuaina oe, e na te manaʻomia foʻi fautuaga i nisi taimi. O le mea moni ua faapea mai le Tusi Paia: “E leai se tagata e amiotonu i le lalolagi e na te faia pea le mea lelei.”—Failauga 7:20.

   “Na aumaia e saʻu uō ni fautuaga ou te leʻi fiafia ai. Na ou faafetai ai i lona faamaoni, ae ou te leʻi fiafia ai. A o faagasolo taimi na ou iloa ai e saʻo lana fautuaga. Ou te faafetai i lana fautuaga, ona na ou iloa ai le mea e tatau ona ou galue ai, lea na semanū ou te lē iloaina.”—Sofia

•   Faataatia se sini e faaleleia.

   Ua faapea mai le Tusi Paia, “o lē e usiusitaʻi i le aʻoaʻiga, e iā te ia le utaga mamao.” (Faataoto 15:5) Pe a e talia le aʻoaʻiga, o le a e faagalo faalogona tigā ae uaʻi atu i vala ia e manaʻomia ona faaleleia. Ia fuafua lelei le auala o le a e taumafai e faaleleia ai, ma toe iloilo au taumafaiga pe a mavae ni masina.

   “O le auala e te vaai ai i aʻoaʻiga e fesootaʻi atu i le faamaoni. E tatau ona e faamaoni e iloa lou tulaga ina ia talia au mea sesē, faatoese atu, ma iloa le auala e faaleleia ai.”—Emma.

 O le manatu tāua: Ua faapea mai le Tusi Paia: “E faamaʻai le uʻamea i le uʻamea. E faapena foʻi ona faamaʻai e le tasi tagata foliga o le isi tagata.“ (Faataoto 27:17) O fautuaga o se meafaigaluega e faaleleia atili ai oe, i le taimi lenei ma pe a avea oe ma tagata matua.