O nisi taimi e aogā ai le faamuta o se faigāuō. Seʻi iloilo se mea na tupu iā Jill. Ua ia faapea mai: “Na ou fiafia ona sa masani ona popole laʻu uō tama po o fea o oʻu i ai, o ā au mea o fai, ae po o ai foʻi o ma faatasi. Peitaʻi, na oo i le tulaga ua lē mafai ona matou faifai mea faatasi ma isi ae ua na o ia lava. E lotoleaga pe a matou faifai mea faatasi ma loʻu aiga, aemaise lava si oʻu tamā. Ina ua ou faamutaina la ma faigāuō na ou lagona e pei ua matuu ese atu se avega mamafa!”

 E faapena foʻi se mea na tupu iā Sarah. Na amata ona ia mātauina John, o se tama talavou o loo la faauō, e aamu, inainā ma lē mafaufau. Ua faapea mai Sarah: “I se tasi aso, e tolu itula na ia tuai mai ai! E leʻi ano i loʻu tinā lea na tatalaina atu le faitotoʻa, ae na ia faapea mai: ‘Ta ō loa ua tuai.’ E lē ona ua ‘ou tuai ae ua ta tuai.’ Sa tatau ona ia faatoese pe faamatala le māfuaaga o lona tuai mai . Ae sili atu i lenā, sa tatau ona ia faaaloalo i loʻu tinā!”

 E lē faapea o le a faamuta se faigāuō ona o se gaoioiga po o se amioga lē lelei. (Salamo 130:3) Peitaʻi, ina ua iloa e Sarah o le lē mafaufau o John e lē o se mea faatoʻā tupu ae o se uiga ua masani ai, o lea na ia filifili ai loa e faamuta la laʻua faigāuō.

 Ae faapefea pe afai e pei oe o Jill ma Sarah, ua e mautinoa o le tagata o loo lua feoaʻi e lē o se paaga faaipoipo talafeagai? I lenā tulaga, aua neʻi e lē amanaʻia ou faalogona! E ui e faigatā, ae atonu e sili ona lelei le faamuta o le faigāuō. Ua taʻua i le Faataoto 22:3: “O lē ua iai le utaga mamao e na te iloa atu le mala ma lafi ai.”

 E moni o le faamuta o se faigāuō e lē o se mea faigofie. Peitaʻi, o le faaipoipoga o le fusi e tumau. E sili atu ai le tigā mo sina taimi puupuu nai lo le mafatia i faalogona salamō i le olaga atoa!