O nisi tagata, o le mea e sili ona leaga iā i latou o le nofo i le fale i se aso timuga, e leai se mea e fai ma lē iloa po o fea a alu i ai. Ua faapea mai se talavou e igoa iā Robert: “O taimi faapena, e na o loʻu nofo lava i le fale e lē iloa po o le ā le mea e fai.”

 Po ua tupu iā te oe lenā mea? Afai o lea, e fesoasoani lenei mataupu iā te oe.

•  Mea e tatau ona e iloa

•  Mea e mafai ona e faia

•  Tala a isi talavou

•   E lē fesoasoani le faaaogāina o le tekinolosi.

   O le faaaogāina o le Initaneti e faapasi ai le taimi, e lē ola ai lou mafaufau ma atili ai ona leai ni au mea e fai. Ua faapea mai Jeremy e 21 ona tausaga: “E na o le pau le mea e maua o lou faatausisila i lau masini, ae lē o gaoioi lou mafaufau.”

   E ioe se teine talavou e igoa iā Elena i le manatu lenā. Na ia faapea mai: “E itiiti mea e mafai ona e faia e faaaogā ai le tekinolosi. E faatosina ese i tatou e le tekinolosi mai i le olaga moni o loo tatou feola ai, ma o le māfuaaga lenā e atili ai ona tatou lē iloa le mea e fai i le olaga pe a lē faaaogāina le tekinolosi.”

•   Vaaiga saʻo.

   Po o le tele o au mea e fai o le a faapisi ai lou olaga? E faalagolago lava i le tele o lou fiafia i mea o loo e faia. O se faataʻitaʻiga, ua faapea mai se teine talavou e igoa iā Karen: “O le alu i le aʻoga, e pei lava e leai ni mea e faia e ui e tele mea e fai i le aʻoga i le aso atoa. E tatau ona uaʻi lou mafaufau i mea o loo e faia, ina ia lagona ai e tele mea o loo e faia.”

 Pe e te iloa? O le “leai o se mea e faia,” e lē o se faafitauli ae o se avanoa lelei lenā e atiaʻe ai ou tomai.

 Ia faalautele lou fiafia i le tele o mea. Ia saʻili ni uō fou. Ia amata se masaniga fou. Ia suʻesuʻe ni mataupu fou. O tagata e tele mea e fiafia i ai, e seāseā ona latou lagonaina le leai o ni mea e fai pe a na o i latou pe faatasi foʻi ma isi.

 Mataupu silisili o le Tusi Paia: “O mea uma ua e iloa e faia e ou lima, inā faia ia ma lou malosi.”​—Failauga 9:​10.

 “Talu ai nei lava, na amata ai ona ou aʻoaʻoina le gagana Saina, ma o le aʻoaʻoina pea i aso uma na ou iloa ai ua matuā ou misia lava lenā ituaiga toleniga. E matuā manaia lava le iai o se mea ou te galue ai. E fesoasoani e faagaoioi ai loʻu mafaufau ma faaaogā tatau ai loʻu taimi.”​—Melinda.

 Ia uaʻi i lou sini. Pe a e iloa le māfuaaga e te faia ai se mea, o le a faateleina la lou fiafia i lenā mea. O le a atili ona e fiafia e fai au meaaʻoga pe a e iloa le māfuaaga e faia ai.

 Mataupu silisili o le Tusi Paia: ʻE leai se mea e sili i le tagata nai lo o lona iloa o mea lelei ona o lana galuega mamafa.’​—Failauga 2:​24.

 “Ina ua lata ina uma aʻu aʻoga, na ou faaaluina le valu itula i aso taʻitasi e fai ai aʻu meaaʻoga, ona ou te leʻi toʻaga e fai aʻu meaaʻoga i le amataga. Po o lona uiga la ua leai se uunaʻiga iā te aʻu ou te faia ai lenā mea? E leai, ona o lea na tuu uma i ai loʻu mafaufau. Na ou taulaʻi atu pea i le sini, o le taimi ou te faauu ai ma o le mea lenā na uunaʻia ai aʻu.”​—Hannah.

 Ia talia mea e lē mafai ona e suia. E tusa lava po o se galuega e sili ona e fiafia i ai, e iai lava ona vaega e te lē fiafia ai. E oo lava i sau uō mamae, e iai lava taimi e na te toe faalēaogāina ai lua fuafuaga ua uma ona fai, ma e lē iloa ai le mea e fai. Aua neʻi aafia oe i mea e tutupu ma e lē fiafia ai, ae ia taumafai e maua le vaaiga saʻo.

 Mataupu silisili o le Tusi Paia: “O lē ua lelei lona loto, e fai e lē aunoa lana faigaʻai.”​—Faataoto 15:15.

 “Na fai mai saʻu uō, ia ou taumafai e fiafia i taimi e tuua ai na o aʻu. Na fai mai o ia o le iai o se vaaiga paleni pe a faatasi ma isi pe tuua foʻi na o oe, o se tomai aogā tele e ao ona aʻoaʻoina e tagata uma.”​—Ivy.