•  O le ā le faatafai?

•  Aiseā e faatafai ai nisi?

•  O ā lamatiaga?

•  Tala a isi talavou

 E manatu nisi o le faatafai o se auala e faailoa atu ai lou tosina i se tasi o le isi itupā, e ala i faamatalaga ma gaoioiga. Pe e sesē le faailoa atu o lou tosina i se isi? E leai. Ua faapea mai se talavou e igoa iā Ann: “Pe afai ua lava lou matua e faia ai se tuugātala ma ua e tosina i se tasi, o le ā la se isi auala e te iloa ai po o tosina mai foʻi lenā tagata iā te oe?

 I lenei mataupu, o le a tatou talanoaina ai le ituaiga faatafai lea e faafoliga atu ai e te tosina i se tasi, ae e te lē o manaʻo moni ai.

 “E mafai ona e uaʻi faapitoa atu i se tasi ona e te manaʻo e atiaʻe se faiā fetosinaaʻi ma ia. Ae e mafai foʻi ona e faasesēina se tasi e manatu o loo e tosina atu iā te ia ona o au gaoioiga, ae mulimuli ane faatigā ai i lenā tagata, ona e leʻi iai moni ni ou faalogona fetosinaaʻi mo ia.”​—Deanna.

 E faatafai nisi ina ia faauaʻi mai ai isi iā i latou. Ua faapea mai se talavou e igoa iā Hailey: “Pe a e iloa o loo uaʻi mai ai isi iā te oe ona o au gaoioiga, o le a faaauau pea la ona e faia.”

 Ae pe afai e te faafoliga atu e te tosina i se tasi ae e lē o ou faalogona moni na, ua faailoa atu ai la lou lē amanaʻia o faalogona o le isi tagata. E fesiligia ai foʻi le auala e fai ai faaiʻuga. Ua faapea mai le Tusi Paia: “O le valea, o le mea lea e olioli ai lē ua leai sona mafaufau.”​—Faataoto 15:21.

 Na faaiʻu mai le faamatalaga a Hailey e faapea, “Atonu e lē afāina le faatafai i le amataga, ae e masani lava ona matuiā iʻuga e oo i ai.”

•   O le faatafai e faaleagaina ai lou talaaga.

   “O se tagata e faatafai e faailoa mai ai lona lē mautonu ma le laʻitiiti o lona mafaufau. E lē faamaoni, ae o loo ia faaaogāina oe ina ia maua ai se mea o loo manaʻo ai.”​—Jeremy.

   Ua faapea mai le Tusi Paia: O le alofa “e lē saʻili mo lona lava lelei.”​—1 Korinito 13:​4, 5.

   Manatu e mafaufau ai: O ā ituaiga upu ma gaoioiga e ono avea ai oe o sē e faatafai i le vaaiga a tagata?

•   O le faatafai e faatigā ai i le tagata o loo e faatafai i ai.

   “Pe a ou iloa se tasi e faatafai, ou te lē fia faifaimea faatasi ma lenā tagata. E pei e na o le pau a le māfuaaga e talanoa mai ai iā te aʻu ona o aʻu o se teine. E latou te lē manatu mamafa moni iā te aʻu; e pau lava le mea e latou te manatu mamafa ai o le faatāua o i latou.”​—Jaqueline.

   Ua faapea mai le Tusi Paia: “Aua neʻi saʻilia e se tasi lona lava lelei, ae ia faaauau ona saʻili le lelei o isi.”​—1 Korinito 10:24.

   Manatu e mafaufau i ai: Pe e iai se taimi na e manatu ai o loo tosina mai se tasi iā te oe, ae e iloa mulimuli ane e leai? Afai na iai, o ā ni ou faalogona ina ua e iloa? E faapefea ona e ʻalofia le faatigā i se tasi i lenā auala?

•   O le faatafai e te lē maua ai ni faauōga fetosinaaʻi moni.

   “E lē tatau ona faaipoipo pe faauō i se tagata faatafai. E faapefea ona ou iloa lelei pe maufaatuatuaina se tasi pe afai e faafoliga ana gaoioiga?”​—Olivia.

   O loo taʻua e le faisalamo o Tavita i le Tusi Paia: “Ou te ʻalofia tagata taufaaʻoleʻole.”​—Salamo 26:4.

   Manatu e mafaufau i ai: O le ā le ituaiga tagata e tosina i se tagata faatafai? Po o le ituaiga tagata lenā e te manaʻo ai?