Apóstolu Paulo hakerek: “Bainhira haʼu hakarak halo buat neʼebé loos, buat neʼebé aat mós hamutuk ho haʼu.” (Roma 7:​21) Ita mós sente hanesan neʼe ka lae? Informasaun neʼe sei ajuda Ita hadook an husi tentasaun atu halo sala.

•  Buat neʼebé Ita presiza hatene

•  Buat neʼebé Ita bele halo

•  Ita-nia kolega sira hanoin saida

 Influénsia husi kolega bele halo susar atu hadook an husi tentasaun. Tuir loloos, Bíblia hatete katak, “ransu hamutuk ho ema aat sei estraga morál neʼebé diʼak”. (1 Korinto 15:33, nota-rodapé) Influénsia husi kolega ka filme no programa sira iha televizaun bele haburas hakarak neʼebé sala iha Ita-nia laran. Neʼe bele lori Ita ba tentasaun atu halo buat neʼebé sala no karik Ita sei “tuir deʼit ema-lubun hodi halo aat”.​—Éxodo 23:2.

 “Tanba ita hakarak kolega sira gosta ita, ikusmai ita mós halo tuir deʼit buat neʼebé sira halo.”​—Jeremy.

 Hanoin toʼok: Tanbasá mak kuandu Ita hanoin demais kona-ba oinsá ema haree Ita, halo Ita susar atu hadook an husi tentasaun?​—Provérbios 29:25.

 Buat neʼebé importante: Labele husik kolega sira halo Ita atu laran-rua kona-ba Ita-nia desizaun.

 Kaer metin ba buat neʼebé Ita fiar. Se ita la kaer metin ba buat neʼebé Ita fiar, Ita hanesan boneka neʼebé ema seluk mak kontrola. Diʼak liu Ita tuir Bíblia nia konsellu: “Buka-hatene uluk buat hotu se neʼe mak loos ka lae, no kaer metin ba buat neʼebé diʼak.” (1 Tesalónika 5:​21) Se Ita hatene razaun tanbasá Ita fiar buat ruma, neʼe sei sai fasil liu atu kaer metin buat neʼebé Ita fiar, no Ita sei la monu lalais ba tentasaun.

 Hanoin toʼok: Saida mak halo Ita fiar katak Maromak nia morál sira lori benefísiu ba Ita?

 “Kuandu haʼu kaer metin ba buat neʼebé haʼu fiar no la monu ba tentasaun, neʼe halo ema respeitu liu haʼu.”​—Kimberly.

 Ezemplu husi Bíblia: Daniel. Bainhira Daniel sei joven nia “deside ona iha ninia laran” atu halo tuir Maromak nia ukun-fuan.​—Daniel 1:8.

 Hatene saida mak Ita-nia fraku. Bíblia koʼalia kona-ba “hakarak joven nian” neʼebé makaʼas tebes bainhira Ita sei joven. (2 Timóteo 2:22) Neʼe laʼós kona-ba hakarak seksuál deʼit, maibé mós kona-ba hakarak atu kolega sira gosta Ita no hakarak livre husi inan-aman nia ukun-fuan sira maski seidauk prontu.

 Hanoin toʼok: Bíblia hatete katak “ema ida-idak hetan koko liuhusi ninia hakarak rasik neʼebé dada nia no tenta nia”. (Tiago 1:14) Tentasaun saida mak susar tebes ba Ita atu hadook an?

 “Koʼalia loos ba Ita-nia an, tentasaun ida neʼebé mak susar tebes ba Ita. Halo riset kona-ba oinsá atu kontra tentasaun neʼe, depois hakerek pontu sira neʼebé Ita bele halo tuir. Nuneʼe bainhira tentasaun mosu, Ita hatene kedas oinsá atu hasees an.”​—Sylvia.

 Bíblia nia ezemplu: David. Nia mós hetan tentasaun atu halo sala tanba ema seluk influénsia nia, no mós tanba ninia hakarak rasik. Maibé, nia aprende husi ninia sala no hakaʼas an atu hadiʼa. Nia halo orasaun ba Jeová, “Oh Maromak, fó laran neʼebé moos ba haʼu, no fó espíritu foun no neon metin ba haʼu.”​—Salmo 51:10.

 Kontrola an. Bíblia hatete: “Keta husik buat aat manán imi.” (Roma 12:21) Neʼe katak Ita la presiza sai vítima ba tentasaun. Ita bele hili atu halo buat neʼebé loos.

 Hanoin toʼok: Saida mak Ita bele halo hodi tahan hasoru tentasaun atu la halo sala?

 “Dala ruma haʼu hanoin saida mak haʼu sei sente bainhira haʼu rende an deʼit ba tentasaun. Haʼu sei kontente ka lae? Karik kontente ba tempu uitoan. Maibé depois neʼe saida mak haʼu sei sente? Haʼu sei sente la diʼak. Entaun, rende an deʼit ba tentasaun lori benefísiu saida? La iha!”​—Sophia.

 Bíblia nia ezemplu: Paulo. Nia hatete katak uluk nia mós iha hakarak neʼebé sala. Maibé nia kontrola an. Nia hakerek: “Haʼu dixiplina makaʼas haʼu-nia isin no ukun haʼu-nia an hanesan atan.”​—1 Korinto 9:​27, nota-rodapé.

 Buat neʼebé importante: Kuandu hasoru tentasaun, desizaun iha Ita-nia liman. Ita mak sei kontrola.

 Hanoin-hetan, tentasaun mak temporáriu deʼit. Melissa neʼebé tinan 20 konta: “Tentasaun barak neʼebé uluk haʼu hanoin mak tentasaun boot bainhira haʼu sei iha eskola sekundária agora haʼu sente neʼe buat kiʼik deʼit.” Nia hatutan: “Tan neʼe haʼu fiar katak tentasaun naran deʼit neʼebé iha agora sei lakon. Loron ida haʼu sei agradese tanba la monu ba tentasaun neʼebé haʼu hasoru agora.”