Mulakonzya kuyeeya kuti ba Gail, ibaambwa kumatalikilo aazibalo eezyi, baladooneka naa kuli nobayooluluba lufwu lwabalumi babo, ba Rob. Nokuba boobo, balangila kuyoobabona alimwi munyika mpya njasyomezyede Leza. Bakaamba kuti: “Lugwalo lwa Ciyubunuzyo 21:3, 4, ndolugwalo ndondiyandisya kapati.” Lwaamba kuti: “Leza lwakwe uyooba ambabo. Eelyo uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”

Ba Gail bakaamba kuti: “Cisyomezyo eeci cilaumbulizya kapati. Ndilabafwida luzyalo bantu ibakafwidwa bayandwa babo pele ibatajisi bulangizi bwakuyoobabona alimwi.” Ba Gail bacita zintu kweelana anzyobasyoma kwiinda mukubeleka mulimo wakulisungula kabali bakambausi baciindi coonse, kwaambila beenzinyina kujatikizya cisyomezyo cakumbele eelyo ‘lufwu nolutakabi limbi.’

Mulakonzya kwaamba kuti: ‘Tacikonzyeki eeco!’ Pele amuyeeye cikozyanyo camwaalumi uutegwa Jobu. Wakaciswa bulwazi bucisa kapati. (Jobu 2:7) Nokuba kuti Jobu wakali kulombozya kufwa buyo, wakacili kusyoma munguzu zya Leza zyakumubusya kuti atalike kupona alimwi anyika. Calusyomo wakaamba kuti: “Eelo kaka inga cainda kubota kuti wandisisa mu Cuumbwe . . . Uyakwiita, eelyo mebo ndiyookuvwiila. Yebo uyooyandisya milimo yamaanza aako.” (Jobu 14:13, 15) Jobu wakali kusyoma kuti Leza wakwe wakali kunoomuyeeya lyoonse alimwi wakali kuyooyandisya kumubusya kubafwu.

Lino-lino, eeci Leza ncayoocitila Jobu alimwi abantu bambi batabaliki—ciindi nyika eeyi yaakusandulwa kuba paradaiso. (Luka 23:42, 43) Eeci Bbaibbele lilacisinizya mulugwalo lwa Milimo 24:15 noliti: “Kuyooba bubuke.” Jesu utusyomezya kuti: “Mutagambwi amakani aaya, nkaambo ciyoosika ciindi eelyo aabo boonse ibali muzyuumbwe nobayoomvwa ijwi lyakwe akuzwa mulinzizyo.” (Johane 5:28, 29) Jobu uyoolibonena cisyomezyo eeci kacizuzikizyigwa. Unoojisi bulangizi bwakuba ‘anguzu zyabukubusi’ alimwi, mubili wakwe ‘unooli muteteete kwiinda wamwana’ mane kukabe kutamani. (Jobu 33:24, 25) Eeci nceciyoocitika kuli baabo boonse ibatondezya kulumba kucipego ca Leza cabubuke anyika.

Ikuti naa mwakafwidwa muyandwa wanu, twaambo ootu ntotwabandika ambweni tatukonzyi kubumanina limwi buumba boonse mbomujisi. Pele kwiinda mukuzinzibala kuyeeya zisyomezyo zya Leza izijanika mu Bbaibbele, mulakonzya kuba abulangizi bwini-bwini alimwi akuyumizyigwa.—1 Batesalonika 4:13.

Sena inga mwayanda kwiiya zinji kujatikizya mbomukonzya kuliyumya ciindi nomuli mubuumba? Naa sena kuli mibuzyo iimbi njomujisi iiswaangene amakani aaya, mbuli wakuti, “Nkaambo nzi Leza ncalekelede bubi akupenga?” Twamulomba kuti mulange awebbusaiti yesu ya jw.org/toi, kutegwa mulibonene Bbaibbele mbolipa bwiinguzi buumbulizya alimwi bugwasya kapati.