Ndakazyalilwa mudolopo liitwa kuti Mulhouse, kunyika lwaajwe mucisi ca France, mudolopo mukkala bantu babeleka milimo iinde-indene alimwi mujanika nkondo kapati. Zintu izyakali kucitika kubwana nzyondiyeeyede nkuzwangana kwakali akati kamikwasyi yamubusena mondakali kukkala. Mumukwasyi wesu, bamakaintu tiibakali kubikkilwa maano alimwi kanji-kanji bamaalumi tiibakali kubabuzya bamakaintu kujatikizya mbobayeeya. Ndakayiisyigwa kuti busena bwabamakaintu muuncikini buyo, kulanganya bamaalumi alimwi abana.

Buumi bwangu bwakubwana tiibwakali buuba-uba pe. Nindakali aamyaka yakuzyalwa iili kkumi, bataata bakafwa akaambo kakuciindizya kunywa bukoko. Nikwakainda myaka yosanwe, mupati wangu musankwa wakalijaya. Mwaka nguwenya ooyu, ndakalibonena munamukwasyi umwi iwakajaigwa akaambo kakuzwangana alimwi eeci cakandigambya kapati. Banamukwasyi bakandiyiisya mbokubelesyegwa manaifi antobolo alimwi akulwana ikuti naa bukkale bwazumizya kucita boobo. Akaambo kakunyongana, kandicili buyo mukubusi ndakaliganta mubili woonse alimwi akutalika kunywa bukoko.

Kandijisi myaka yakuzyalwa iili 16, ndakali kunywa mabbodela aabukoko aali 10 kusika ku 15 abuzuba, alimwi tiilyakalampa ndakatalika kubelesya misamu iikola. Kutegwa kandicikonzya kucita zintu eezyi, ndakali kusambala zibulo-bulo zyakaindi mpoonya akubba. Nindakakkwanya myaka yakuzyalwa iili 17, ndakalaangidwe kale muntolongo. Ndakaangwa ziindi zili 18 akaambo kakubba alimwi akulwana.

Nindakajisi myaka yakuzyalwa iili kuma 20, bukkale bwangu bwakaindila buya kubija. Ndakali kufweba misanga yalubanje iisika ku 20 abuzuba alimwi akubelesya misamu minji iikola mbuli wa heroin. Ziindi zinji, kwakali kucaala aasyoonto kuti ndifwe akaambo kakuciindizya kubelesya misamu eeyi. Ndakatalika kusambala misamu iikola, calo cakali kundipa kweenda aantobolo alimwi amanaifi. Cimwi ciindi, ndakali kuyanda kudubula mwaalumi umwi, pele mukuba aacoolwe musyonga wantobolo wakauma akabulo kalutambo lwamucibuno ndwaakasamide! Nondakali amyaka iili 24, bamaama bakafwa, alimwi eeci cakapa kuti bukali bwangu bwiindile buya. Basimweendanzila bakali kundiyoowa cakuti bandibona bakali kucinca nzila. Akaambo kakulwana, kanji-kanji mumawikkeendi ndakali kujanika kupolisi naa mucibbadela kusilikwa zilonda.

Nindakakkwanya myaka iili 28, ndakakwata. Mbubwenya mbomukonzya kuyeeyela, tiindakali kubalemeka bakaintu bangu. Ndakali kubatukila alimwi akubauma. Kunyina nitwakali kucitila antoomwe zintu mbuli banabukwetene. Ndakali kuyeeya kuti kufwumbwa kuti kandibapa ngale  zyakubba cakali buyo kabotu. Mpoonya, cintu catakali kuyeeyelwa cakacitika. Bakaintu bangu bakatalika kwiiya Bbaibbele a Bakamboni ba Jehova. Nobakamana kwiiya ciindi cakusaanguna, bakacileka kufweba akutalika kukaka kutambula mali aali woonse aakubba alimwi bakandipilusyila ngale nzindakabapede. Eeci cakandinyemya kapati. Ndakali kubakasya kwiiya Bbaibbele alimwi ndakali kubafwulida busi bwatombwe kumeso. Alimwi ndakali kubasampaula kubantu bamubusena motwakali kukkala.

Bumwi buzuba masiku, kandikoledwe kapati, ndakayuumpa mulilo ŋanda yesu. Bakaintu bangu bakandifwutula kuzwa mumulilo, amwaneesu musimbi iwakajisi myaka yosanwe yakuzyalwa. Nindakakololokwa, ndakatalika kulipa mulandu kapati. Ndakali kulimvwa kuti Leza kunyina nakonzya kundilekelela. Ndakayeeya bumwi buzuba nindakamvwa mupaizi wacikombelo kaamba kuti basizibi baunka kuhelo. Naba musilisi wabulwazi bwamumizeezo iwakali kundisilika wakandaambila kuti: “Yebo kunyina cako pe! Bulwazi bwako tabukonzyi kupona.”

Niyakamana kupya ŋanda yesu, twakalongela kubazyali babakaintu bangu. Ciindi Bakamboni nibakaswaya bakaintu bangu, ndakababuzya kuti: “Sena Leza inga wandilekelela zibi zyangu zyoonse?” Mpoonya bakandibalila mu Bbaibbele ilugwalo lwa 1 Bakorinto 6:9-11. Eeci cibalo cilabandauka micito njatayandi Leza, pele alimwi cilayungizya kuti: “Oobo mbobakabede bamwi akati kanu.” Aaya majwi akandikulwaizya kubona kuti kucinca kulakonzyeka. Kumane Bakamboni bakandigwasya kuzyiba kuti Leza ulandiyanda kwiinda mukunditondezya lugwalo lwa 1 Johane 4:8. Kandikkomene, ndakabalomba kuti kabandiyiisya Bbaibbele ziindi zyobilo ansondo, mpoonya ndakatalika akujanika kumiswaangano yabo ya Bunakristo. Ndakali kupaila kuli Jehova lyoonse.

Mumwezi buyo omwe, ndakacileka kubelesya misamu iikola akunywa bukoko. Alimwi mpoonya-mpoonya nkondo yakatalika mumubili wangu! Ndakapenga aziloto zibyaabi, kuciswa mutwe alimwi azicisa zimwi ziboola akaambo kakuleka micito eeyi. Nokuba boobo, aciindi nciconya eeco, ndakalimvwa kuti Jehova ulindijisi kujanza akundiyumya-yumya. Ndakalimvwa mbubwenya mbwaakalimvwide mwaapostolo Paulo. Kujatikizya lugwasyo ndwaakatambula kuzwa kuli Leza, Paulo wakalemba kuti: “Muzintu zyoonse ndilijisi nguzu kwiinda muli yooyo uundipa nguzu.” (Bafilipi 4:13) Mukuya kwaciindi, andime ndakacileka kufweba tombwe.—2 Bakorinto 7:1.

Kunze lyakundigwasya kucinca bukkale bwangu, mukwasyi wangu awalo wakagwasyigwa a Bbaibbele. Ndakacinca kujatikizya mbondakali kubabona bakaintu bangu. Ndakatalika kubalemeka alimwi ndakaiya akubelesya mabala aabulemu mbuli lyakuti “ndalumba.” Alimwi ndakaba usyi uuli kabotu kumwaneesu musimbi. Nikwakainda mwaka omwe kuzwa nindakatalika kwiiya Bbaibbele, ndakalyaaba kuli Jehova akubbapatizyigwa, kwiiya cikozyanyo cabakaintu bangu.

Ndilisinizyide kuti njiisyo zyamu Bbaibbele zyakafwutula buumi bwangu. Nobaba banamukwasyi ibatali Bakamboni balizyi kuti nindalifwide lino akaambo kakubelesya misamu iikola naa kulwana.

Bukkale bwangu bwamumukwasyi bwakacincila limwi kwiinda mukugwasyigwa anjiisyo zyamu Bbaibbele izyakatondezya mikuli njondeelede kuzuzikizya mbuli mulumi alimwi amuzyali. (Baefeso 5:25; 6:4) Twakatalika kucitila antoomwe zintu amukwasyi. Lino, muciindi cakuti bakaintu bangu kabajanika buyo muncikini, ndilakkomana kubagwasyilizya mumilimo yabo mbobali bapainiya baciindi coonse. Alimwi abalo balikkomene kundigwasyilizya kumukuli wangu wabwaalu mumbungano.

Luyando alimwi aluse lwa Jehova Leza lwandigwasya kapati mubuumi bwangu. Ndilayandisisya kapati kubandika bube bwa Jehova kuli baabo babonwa kuti tabakonzyi kucinca, mbwaanga andime mbobakali kundibona oobo bantu. Ndilizyi kuti Bbaibbele lilijisi nguzu zyakugwasya muntu uli woonse kupona buumi buli kabotu alimwi ibulaampindu. Ibbaibbele tiilyakandiyiisya buyo kuba aaluyando abulemu kuli bamaalumi alimwi abamakaintu, pele alimwi lyakandiyiisya akulilemeka.