Sena kuli nomwakacisidwe kapati kwaciindi cisyoonto buyo? Ambweni mwakafwambaana kupona cakuti mwakaluba ambocakabede. Pesi, kwalo kulila takuli boobo pe. Mubbuku litegwa Healing a Spouse’s Grieving Heart ndyobakalemba ba Dr. Alan Wolfelt, bakaamba kuti, ‘buumba tabukonzyi kumana.’ Nokuba boobo, bakayungizya kwaamba kuti: “Mukuya kwaciindi kwiinda mukugwasyigwa abamwi, buumba bwanu bunooyaabuceya-ceya.”

Mucikozyanyo, amulange-lange mbwaakacita syaanene Abrahamu ciindi mukaintu wakwe naakafwa. Ibbaibbele lyaamba kuti: “Abrahamu wakoomoka akumulila Sara.” Ibbala lyakuti “wakoomoka” lipa muzeezo wakuti wakatola ciindi cili mbocibede kutegwa aliyumye kukusweekelwa ooku. * Cikozyanyo acimwi nca Jakobo, walo iwakacengwa kuti mwanaakwe Josefa wajaigwa amunyama wamusyokwe. Wakamulila mwanaakwe “mazuba manji” alimwi banamukwasyi bakaalilwa kumuumbulizya. Nokwakainda myaka iili mbwiibede, lufwu lwamwanaakwe Josefa lwakacili kumucisa kapati.—Matalikilo 23:2; 37:34, 35; 42:36; 45:28.

Mbocibede amazuba aano kubantu banji ibalila akaambo kalufwu lwabayandwa babo. Amulange-lange zikozyanyo zitobela.

• “Balumi bangu ba Robert, bakafwa mu July 9, 2008. Mafwumofwumo kaitanacitika ntenda, oobu buzuba bwakali buyo mbuli mazuba aamwi oonse. Mbubwenya mbuli cilengwa cesu, twamanizya kulya mafwumofwumo kabatanaunka kumulimo, twakali kumyontana, kukumbatana akwaambilana kuti ‘Ndilakuyanda.’ Nokuba kuti kwainda myaka iili cisambomwe, moyo wangu ucicisa. Tandisyomi naa ndiyoobaluba balumi bangu ba Rob.”—Ba Gail, ibajisi myaka yakuzyalwa iili 60.

• “Nokuba kuti kwainda myaka iinda ku 18 kuzwa ciindi nobakafwa bakaintu bangu, ndilabayeeya kapati alimwi ndicuuside kujatikizya lufwu lwabo. Kufwumbwa ciindi ndabona cintu cikkomanisya, ndilabayeeya, alimwi cindipa kuyeeyela mbocakali kunoobakkomanisya cintu eeco.”—Ba Etienne, ibajisi myaka yakuzyalwa iili 84.

Cakutadooneka, kuusa alimwi akucisigwa moyo kwaciindi cilamfwu mbube bwakuzyalwa aambubo. Muntu uuli woonse ulalila munzila iindene abamwi, aboobo inga tiicaba camaano kubeteka bamwi akaambo kambobalila ciindi nokwacitika ntenda. Alimwi tatweelede kulipa mulandu ikuti naa katulimvwa kuti tulaciindizya kulila notwafwidwa. Mbuti mbotukonzya kuliyumya mubuumba?