Wil, we i gat 18 yia, i talem se: “Sipos yu no save stret rod blong ridim Baebol, yu save les blong ridim.”

 ?Yu wantem save olsem wanem blong laekem blong ridim Baebol? Haf ya bambae i givhan long yu.

•  Mekem ol tok blong Baebol i laef

•  !Faenemaot moa!

•  Sam yangfala oli talem wanem

 Mekem olsem se yu stap insaed long stori we yu ridim. Traem hemia:

1.   Jusum wan haf blong Baebol we yu wantem stadi long hem. Yu save jusum wan stori long ol Gospel o wan narafala samting we Baebol i tokbaot, o haf blong wan Baebol riding long jw.org.

2.   Ridim haf ya. Yu save ridim yu wan, o ridim laod wetem ol fren o famle. Wan long yufala i save mekem man blong ridim stori, mo ol narawan oli save mekem ol narafala man long stori ya.

3.   Traem sam samting olsem:

   •   Droem ol pija blong stori ya, o droem plante pija we oli eksplenem ol defdefren haf blong stori ya. Yu raetem smol save klosap long ol pija.

   •   Taem yu ridim stori blong wan gudfala man long Baebol, raetemdaon ol gudfala fasin mo aksen blong hem, mo ol blesing we hem i kasem.

   •   Mekem stori ya i kam olsem wan nius ripot. Yu talem stori ya long plante defren rod. Mo tu, yu “askem kwestin” long ol impoten man long stori ya, mo ol narafala tu we oli luk samting we i hapen.

   •   Taem wan man i mekem samting we i no stret, traem tingbaot wanem bambae i hapen sipos hem i bin mekem i stret. Wan eksampol, hemia taem we Pita i talem se hem i no save Jisas. (Mak 14:66-72) ?Wanem samting we Pita i save mekem blong i no foldaon?

   •   Sipos yu wantem mekem moa, yu raetem prapa stori blong yu we i stanap long wan stori long Baebol, mo yu talem wanem lesen we yu lanem.—Rom 15:4.

 Sipos yu stadi gud long ol smosmol samting long wan stori, yu save faenemaot sam samting we i haed. Blong talem stret, samtaem wan o tu toktok nomo i save talemaot plante samting.

 Traem skelem Matiu 28:7 wetem Mak 16:7.

•    ?From wanem Mak i talem se Jisas bambae i kamtru long ol disaepol “mo Pita”?

•  Blong halpem yu: Mak i no stap long taem ya. Pita nao i talem stori ya long hem.

•  Samting we i haed: ?From wanem Pita i mas glad taem i harem se Jisas i wantem luk hem bakegen? (Mak 14:66-72) ?Olsem wanem Jisas i soemaot se hem i wan trufala fren blong Pita? ?Olsem wanem yu save folem fasin blong Jisas blong stap olsem wan trufala fren?

 !Taem yu mekem Baebol i laef, mo yu traem faenemaot moa, bambae yu laekem blong ridim Baebol!