“Samtaem mi naf blong kontrolem tang blong mi. !Be plante taem i olsem se tang i gohed hem wan we bren i no givhan!”—Jemes.

 “Taem mi fraet, mi no tingting bifo we mi toktok, mo taem mi no fraet, mi toktok tumas. Taswe, oltaem mi stap toktok olbaot.”—Mari.

 Baebol i talem se: “Tang . . . i wan faea,” mo “!Wan smol faea nomo, be hem i save bonem wan bigfala bus we i finisim gud!” (Jemes 3:5, 6) ?Ol tok blong yu oli stap mekem trabol long yu? Sipos i olsem, ol save ya bambae i givhan long yu.

•  ?From wanem mi stap toktok olbaot?

•  Kontrolem tang

•  Sam yangfala oli talem wanem

 Yumi sinman. Baebol i talem se: “Yumi evriwan i mekem mastik plante taem. Sipos wan man i no mekem mastik samtaem long tok blong hem, man ya i stret gud olgeta.” (Jemes 3:2) From we yumi sinman i isi blong yumi foldaon taem yumi wokbaot, be yumi save mestem long toktok tu.

 “From we bren blong mi mo tang blong mi i no stret gud olgeta, mi no save kontrolem tufala long fasin we i stret gud.”—Ana.

 Toktok tumas. Baebol i talem se: “Taem man i stap toktok tumas, i isi nomo blong hem i mestem tok blong hem.” (Ol Proveb 10:19) Ol man we oli toktok tumas mo oli lesin smol nomo oli save spolem ol narafala.

 “Taem man i toktok plante, hemia i no min se hem i waes. Jisas i waes we i waes, be plante taem hem i stap kwaet nomo.”—Julia.

 Tok jik. Baebol i talem se: “Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem.” (Ol Proveb 12:18) Wan kaen tok nogud we man i sakem be i no tingbaot, hemia tok jik, o tok we i save spolem mo daonem narafala. Ol man we oli stap tok jik, maet oli talem se: “!Mi stap tok plei nomo!” Be taem man i talem wan samting we i mekem narafala i sem, hemia i no wan tok plei. Baebol i talem se yumi mas sakemaot “ol rabis tok, wetem evri samting we i blong spolem narafala.”—Efesas 4:31.

 “Plante taem mi ansa kwik tumas, mo tu, mi laekem blong tok fani. From samting ya, i isi blong jikim man mo kasem trabol.”—Oksana.

 Maet i no isi blong kontrolem tang blong yu, be ol advaes blong Baebol oli save givhan. Makem gud ol advaes ya.

 “I gud yufala i stap kwaet, yufala i tingting gud.”—Ol Sam 4:4.

 Samtaem rod we i beswan i blong stap kwaet. Laura i talem se: “Tingting blong mi taem mi kros i defren long tingting we mi gat biaen. Taem kros i godaon, plante taem mi glad se mi no talem samting we mi bin wantem talem.” Maet yu stap kwaet blong sam seken nomo, be hemia i save blokem yu blong yu no toktok olbaot.

 “?Sora i save skelem ol toktok olsem we tang i save testem ol kakae?”—Job 12:11, NW.

 Yu save blokem plante trabol sipos yu skelem ol toktok we yu wantem talem. Traem ansa long ol kwestin ya:

•   ?Samting ya i tru? ?I kaen? ?I impoten?—Rom 14:19.

•   ?Bambae mi harem olsem wanem sipos narafala i talem olsem long mi?—Matiu 7:12.

•   ?Mi stap soemaot se mi respektem tingting blong narafala?—Rom 12:10.

•   ?Hemia stret taem blong talem?—Prija 3:7.

 ‘Yu mas mekem tingting blong yu i stap daon mo luk ol narafala man se oli hae moa long yu.’—Filipae 2:3.

 Advaes ya bambae i givhan long yu blong yu gat gudfala tingting long narafala. Mo hemia bambae i halpem yu blong yu kontrolem tang blong yu, mo blong tingting bifo we yu toktok. !Sipos yu talem finis sam tok we i spolem narafala, tingting daon bambae i pulum yu blong yu kwik blong talem sore! (Matiu 5:23, 24) Afta, yu mas traehad moa blong kontrolem tang blong yu.