ದೇವರು ಎಲ್ಲ ಮಾನವರನ್ನು ಪಾಪ ಮರಣದಿಂದ ಬಿಡಿಸುವುದು, ರಕ್ಷಿಸುವುದು ಯೇಸುವಿನ ಬಲಿಯ ಮೂಲಕ. ಯೇಸು ಸುರಿಸಿದ ರಕ್ತಕ್ಕೆ ಬೈಬಲಲ್ಲಿ ಬಿಡುಗಡೆ ಬೆಲೆ ಅಂತ ಹೇಳಲಾಗಿದೆ. (ಎಫೆಸ 1:7; 1 ಪೇತ್ರ 1:18, 19) ಅದಕ್ಕೇ ಯೇಸು “ತುಂಬ ಜನ್ರಿಗಾಗಿ ತನ್ನ ಪ್ರಾಣವನ್ನ ಬಿಡುಗಡೆಯ ಬೆಲೆಯಾಗಿ ಕೊಡೋಕೆ” ಬಂದೆ ಅಂತ ಹೇಳಿದನು.—ಮತ್ತಾಯ 20:28.

“ಬಿಡುಗಡೆ ಬೆಲೆ” ಯಾಕೆ ಬೇಕು?

 ದೇವರು ಮೊದಲನೇ ಮನುಷ್ಯನಾದ ಆದಾಮನನ್ನು ಸೃಷ್ಟಿಮಾಡಿದಾಗ ಅವನಲ್ಲಿ ಪಾಪ ಇರಲಿಲ್ಲ, ಅವನು ಪರಿಪೂರ್ಣ ವ್ಯಕ್ತಿ ಆಗಿದ್ದ. ಶಾಶ್ವತವಾಗಿ ಜೀವಿಸುವ ಅವಕಾಶ ಅವನಿಗಿತ್ತು. ಆದರೆ ದೇವರ ಮಾತು ಕೇಳದೆ ಪಾಪ ಮಾಡಿದ್ರಿಂದ ಆ ಅವಕಾಶ ಕಳೆದುಕೊಂಡ. (ಆದಿಕಾಂಡ 3:17-19) ಅವನು ತನ್ನ ಮಕ್ಕಳಿಗೂ ಆ ಪಾಪವನ್ನು ದಾಟಿಸಿದನು. (ರೋಮನ್ನರಿಗೆ 5:12) ಹಾಗಾಗಿ ಆದಾಮ ತನ್ನನ್ನು ತನ್ನ ಮಕ್ಕಳನ್ನು ಪಾಪ ಮತ್ತು ಮರಣಕ್ಕೆ ದಾಸರನ್ನಾಗಿ ‘ಮಾರಿದನು’ ಎಂದು ಬೈಬಲ್‌ ಹೇಳುತ್ತದೆ. (ರೋಮನ್ನರಿಗೆ 7:14) ಎಲ್ಲರೂ ಅಪರಿಪೂರ್ಣರಾಗಿ ಇರುವುದರಿಂದ ಆದಾಮ ಕಳೆದುಕೊಂಡದ್ದನ್ನು ಮತ್ತೆ ಕೊಂಡುಕೊಳ್ಳಲು ಯಾರಿಂದನೂ ಆಗಲಿಲ್ಲ.—ಕೀರ್ತನೆ 49:7, 8.

 ಆದಾಮನ ವಂಶದವರು ಅವರಿಂದ ಏನೂ ಮಾಡಲಿಕ್ಕಾಗದೆ ನಿಸ್ಸಹಾಯಕ ಸ್ಥಿತಿಯಲ್ಲಿ ಇರುವುದನ್ನು ನೋಡಿ ದೇವರಿಗೆ ಕನಿಕರ ಹುಟ್ಟಿತು. (ಯೋಹಾನ 3:16) ದೇವರ ನ್ಯಾಯದ ಮಟ್ಟದ ಪ್ರಕಾರ ಆತನು ಅವರ ಪಾಪಗಳನ್ನು ಕ್ಷಮಿಸಬೇಕಾದರೆ ಏನಾದರೂ ಆಧಾರ ಬೇಕಿತ್ತು. ಆಧಾರ ಇಲ್ಲದೆ ಆ ಪಾಪಗಳನ್ನು ಬಿಟ್ಟುಬಿಡಲು, ಕ್ಷಮಿಸಲು ಆಗಲಿಲ್ಲ. (ಕೀರ್ತನೆ 89:14; ರೋಮನ್ನರಿಗೆ 3:23-26) ದೇವರು ಮನುಷ್ಯರನ್ನು ಪ್ರೀತಿಸುತ್ತಾನೆ. ಹಾಗಾಗಿ ಅವರು ಮಾಡಿದ ಪಾಪಗಳನ್ನು ಕ್ಷಮಿಸಲು ಮತ್ತು ಅದನ್ನು ತೆಗೆದುಹಾಕಲು ಏರ್ಪಾಡು ಮಾಡಿದ್ದಾನೆ. (ರೋಮನ್ನರಿಗೆ 5:6-8) ಬಿಡುಗಡೆಯ ಬೆಲೆಯೇ ಆ ಏರ್ಪಾಡು.

ಬಿಡುಗಡೆ ಬೆಲೆಯಿಂದ ಏನೆಲ್ಲಾ ಪ್ರಯೋಜನ?

 ಬೈಬಲಿನಲ್ಲಿರುವ “ಬಿಡುಗಡೆಯ ಬೆಲೆ” ಅನ್ನುವ ಪದದಲ್ಲಿ 3 ಅಂಶಗಳಿವೆ.

1.   ಇದು, ಒಂದನ್ನು ಕೊಂಡುಕೊಳ್ಳಲು ಕೊಡುವ ಬೆಲೆ.—ಅರಣ್ಯಕಾಂಡ 3:46, 47.

2.   ಇದರಿಂದ ಬಿಡುಗಡೆ ಮಾಡಲು, ಬಿಡಿಸಿಕೊಳ್ಳಲು ಆಗುತ್ತದೆ.—ವಿಮೋಚನಕಾಂಡ 21:30.

3.   ಇದು, ಕಳೆದುಕೊಂಡಿರುವ ಒಂದನ್ನು ಪುನಃ ಕೊಂಡುಕೊಳ್ಳಲು ಕೊಡುವ ಸರಿಸಮವಾದ ಬೆಲೆ. a

 ಯೇಸು ಕ್ರಿಸ್ತನು ತನ್ನ ಬಲಿಯ ಮೂಲಕ ಕೊಟ್ಟ ಬಿಡುಗಡೆ ಬೆಲೆಯಲ್ಲಿ ಈ ಮೂರು ಅಂಶಗಳಿವೆ. ಹೇಗೆಂದು ನೋಡಿ.

1.   ಕೊಂಡುಕೊಳ್ಳಲು ಕೊಡುವ ಬೆಲೆ. ಕ್ರೈಸ್ತರನ್ನು ದೇವರು “ಬೆಲೆಕೊಟ್ಟು ತಗೊಂಡಿದ್ದಾನೆ” ಅನ್ನುತ್ತದೆ ಬೈಬಲ್‌. (1 ಕೊರಿಂಥ 6:20; 7:23) ಆ ಬೆಲೆ ಯೇಸು ಸುರಿಸಿದ ರಕ್ತವಾಗಿದೆ. ಇದರಿಂದ ಆತನು ‘ಎಲ್ಲ ಭಾಷೆ, ಜಾತಿ, ದೇಶದಿಂದ ದೇವರಿಗೋಸ್ಕರ ಜನ್ರನ್ನ ಕೊಂಡ್ಕೊಂಡನು.’—ಪ್ರಕಟನೆ 5:8, 9.

2.   ಬಿಡುಗಡೆ. ಯೇಸುವಿನ ಬಲಿಯು “ಬಿಡುಗಡೆ ಬೆಲೆ” ಆಗಿದೆ. ಇದನ್ನು ಕೊಟ್ಟು ನಮ್ಮನ್ನು ಪಾಪದಿಂದ ಬಿಡಿಸಲಾಗಿದೆ.—1 ಕೊರಿಂಥ 1:30; ಕೊಲೊಸ್ಸೆ 1:14; ಇಬ್ರಿಯ 9:15.

3.   ಸರಿಸಮವಾದ ಬೆಲೆ. ಆದಾಮ ಪರಿಪೂರ್ಣ ಜೀವವನ್ನು ಕಳೆದುಕೊಂಡ. ಯೇಸು ಪರಿಪೂರ್ಣ ಜೀವವನ್ನೇ ಬಲಿಯಾಗಿ ಕೊಟ್ಟ. ಹೀಗೆ ಆದಾಮ ಏನು ಕಳೆದುಕೊಂಡನೋ, ಯೇಸು ಏನು ಬಲಿಯಾಗಿ ಕೊಟ್ಟನೋ ಇವೆರಡೂ ಸಮವಾಗಿದೆ. (1 ಕೊರಿಂಥ 15:21, 22, 45, 46) “ಒಬ್ಬ [ಆದಾಮ] ಮಾತು ಕೇಳದೆ ಇದ್ದಿದ್ರಿಂದ ತುಂಬ ಜನ ಪಾಪಿಗಳಾದ್ರು. ಹಾಗೇ ಒಬ್ಬ [ಯೇಸು] ಮಾತು ಕೇಳಿದ್ರಿಂದ ತುಂಬ ಜನ ನೀತಿವಂತರು ಆಗ್ತಾರೆ” ಅನ್ನುತ್ತದೆ ಬೈಬಲ್‌. (ರೋಮನ್ನರಿಗೆ 5:19) ಈ ವಚನ, ಒಬ್ಬ ಮನುಷ್ಯನ ಸಾವು ಹೇಗೆ ಅನೇಕ ಪಾಪಿಗಳನ್ನು ಬಿಡಿಸಲು ಕೊಡುವ ಬೆಲೆಯಾಗಿದೆ ಎಂದು ವಿವರಿಸುತ್ತದೆ. ನಿಜ ಹೇಳಬೇಕಂದೆರೆ ಯೇಸುವಿನ ಬಲಿಯು ‘ಎಲ್ರನ್ನ ಬಿಡಿಸಲಿಕ್ಕಾಗಿ ಕೊಟ್ಟ ಸರಿಸಮವಾದ ಬಿಡುಗಡೆ ಬೆಲೆ’ ಆಗಿದೆ. ಈ ಬಲಿಯಿಂದ ಪ್ರಯೋಜನ ಪಡೆಯಬೇಕೆಂದು ಯಾರೆಲ್ಲ ಹೆಜ್ಜೆ ತೆಗೆದುಕೊಳ್ಳುತ್ತಾರೋ ಅವರೆಲ್ಲರಿಗೂ ಪಾಪ ಮರಣದಿಂದ ಬಿಡುಗಡೆ ಸಿಗುತ್ತದೆ.—1 ತಿಮೊತಿ 2:5, 6.