మనం జీవించడానికి అవసరమైన ఎన్నో పనులు మన శరీరంలో జరుగుతుంటాయి. వాటిలో దెబ్బలు తగ్గిపోయి, పాడైన కణజాలాలు లేదా చర్మం మళ్లీ కొత్తగా రావడం ఒకటి. దెబ్బ తగిలిన వెంటనే దెబ్బను తగ్గించే పని శరీరంలో మొదలవుతుంది.

ఆలోచించండి: దెబ్బలు తగ్గేటప్పుడు మన జీవ కణాల్లో వరుసగా చాలా పనులు జరుగుతాయి:

• దెబ్బ చుట్టూ ఉన్న కణజాలానికి (టిష్యూకి) ప్లేట్‌లెట్‌లు అతుక్కుని రక్తం గడ్డ కట్టేలా చేసి పాడైన రక్త కణాలను అతికిస్తాయి.

• వాపు వల్ల ఇన్‌ఫెక్షన్‌ రాకుండా ఉంటుంది. దెబ్బ తగిలినప్పుడు అనవసర పదార్థాలు ఏర్పడితే అవి కూడా వాపు వల్ల పోతాయి.

• కొన్ని రోజుల్లోనే దెబ్బ తగిలిన కణజాలాల స్థానంలో మన శరీరం కొత్త కణజాలాలు వచ్చేలా చేస్తుంది. ఇంకా దెబ్బని తగ్గించి, పాడైన రక్త కణాలను బాగుచేస్తుంది.

• చివరగా, తంతు కణజాలం (స్కార్‌ టిష్యూ) దెబ్బ తగిలిన చోట మళ్లీ చర్మం వచ్చేలా చేసి ఆ ప్రాంతాన్ని గట్టి పడేలా చేస్తుంది.

ఇలా రక్తం గడ్డ కట్టడాన్ని చూసి పరిశోధకులు కొత్త రకమైన ప్లాస్టిక్‌ పదార్థాలను తయారు చేస్తున్నారు. అవి ఎక్కడైనా పాడైతే వాటంతట అవే మళ్లీ బాగైపోతాయి. ఈ ప్లాస్టిక్‌ పదార్థాల్లో పక్కపక్కన వెళ్లే రెండు చిన్న ట్యూబులు ఉంటాయి. ఈ ట్యూబుల్లో రెండు కెమికల్‌ పదార్థాలు ఉంటాయి. అవి ఆ ప్లాస్టిక్‌ పదార్థం పాడైనప్పుడు ట్యూబుల్లో నుండి బయటకు వస్తాయి. అవి కలిసినప్పుడు ఒక రకమైన జెల్‌ తయారౌతుంది. ఈ జెల్‌ పాడైన ఆ ప్రాంతమంతా వ్యాపించి చిల్లులను, పగుళ్లను మూసేస్తుంది. తర్వాత ఆ జెల్‌ గట్టిపడి ప్లాస్టిక్‌ పదార్థానికున్న బలం తిరిగి వస్తుంది. ఇలాంటి ప్రయత్నాలన్నీ సహజంగా ఉన్న వాటిని “చూసే” చేస్తున్నారని ఒక పరిశోధకుడు ఒప్పుకుంటున్నాడు.

మీరేమంటారు? దెబ్బలు తగ్గిపోయే శక్తి మన శరీరానికి దానికదే వచ్చిందా? లేదా ఎవరైనా అలా చేశారా? ◼ (g15-E 12)