అంతం
అంతం
“లోకమును దాని ఆశయు గతించిపోవుచున్నవి,” అని 1 యోహాను 2:17లో ఉంది. ఇక్కడ చెప్పిన ‘లోకం’ అంటే ఏంటి? అది ఎప్పుడు, ఎలా గతించిపోతుంది లేదా అంతమౌతుంది?
అంతం అయ్యే ‘లోకం’ ఏంటి?
దేవుడు ఏమంటున్నాడు . . .
దేవునికి ఇష్టంలేని ఆశలు ఈ లోకంలో ఉన్నాయి. భూమికి ఆశలు ఉండవు. కాబట్టి లోకం అంటే దేవున్ని పట్టించుకోకుండా ఆయన శత్రువులుగా మారుతున్న మనుషులు. (యాకోబు 4:4) ఆ లోకం లేదా ఆ మనుషులు “నిత్యనాశనమను దండన” పొందుతారు. (2 థెస్సలొనీకయులు 1:7-9) అయితే యేసు చెప్పిన మాటలకు లోబడుతూ ‘లోకసంబంధులుగా’ ఉండనివాళ్లు నిత్యజీవం పొందుతారు.—యోహాను 15:19.
ఈ విషయం గురించి 1 యోహాను 2:17 చివర్లో ఇలా ఉంది, “దేవుని చిత్తమును జరిగించువాడు నిరంతరమును నిలుచును.” అలాంటివాళ్లే ఈ భూమ్మీద నిత్యం జీవిస్తారు. దీని గురించి కీర్తన 37:29లో ఇలా ఉంది: “నీతిమంతులు భూమిని స్వతంత్రించుకొందురు వారు దానిలో నిత్యము నివసించెదరు.”
“ఈ లోకమునైనను లోకములో ఉన్నవాటినైనను ప్రేమింపకుడి. ఎవడైనను లోకమును ప్రేమించినయెడల తండ్రి ప్రేమ వానిలో నుండదు.”—1 యోహాను 2:15.
ఈ లోకం ఎలా అంతమౌతుంది?
దేవుడు ఏమంటున్నాడు . . .
అంతం రెండు ముఖ్యమైన దశల్లో వస్తుంది. మొదటి దశలో దేవుడు అబద్ధ మతాలన్నిటినీ నాశనం చేస్తాడు. వాటిని “మహా బబులోను” అనే పేరున్న వేశ్యతో పోల్చారు. (ప్రకటన 17:1-5; 18:8) దేవుని మీద భక్తి ఉందని చెప్పుకుంటూనే ఆ వేశ్య ఈ ప్రపంచంలో ఉన్న రాజకీయ నాయకులతో సంబంధాలు పెట్టుకుంది. కానీ, ఈ నాయకులే ఆమె మీద తిరగబడతారు. వాళ్లు “ఆ వేశ్యను ద్వేషించి, దానిని దిక్కులేనిదానిగాను దిగంబరిగాను చేసి, దాని మాంసము భక్షించి అగ్నిచేత దానిని బొత్తిగా కాల్చివేతురు.”—ప్రకటన 17:16.
తర్వాత, దేవుడు ఆ రాజకీయ నాయకులపై అంటే “లోకమంతట ఉన్న” రాజులపై దృష్టి పెడతాడు. వీళ్లతోపాటు చెడ్డ ప్రజలందరు “హార్‌మెగిద్దోను” లేదా “సర్వాధికారియైన దేవుని మహాదినమున జరుగు యుద్ధము” ద్వారా నాశనం అవుతారు.—ప్రకటన 16:14,16.
‘దేశములో సాత్వికులైన . . . సమస్త దీనులారా, యెహోవాను వెదకుడి; . . . నీతిని అనుసరించినయెడల ఒకవేళ ఆయన ఉగ్రత దినమున మీరు దాచబడుదురు.’—జెఫన్యా 2:3.
ఈ లోకం ఎప్పుడు అంతమౌతుంది?
దేవుడు ఏమంటున్నాడు . . .
ప్రపంచంలో ఉన్న ప్రభుత్వాలకు బదులుగా దేవుని ప్రభుత్వం వస్తుంది. దాని గురించి అందరూ తెలుసుకునేలా దేవుడు సమయాన్ని ఇస్తాడు. (దానియేలు 7:13, 14) యేసు క్రీస్తు ఇలా అన్నాడు: “మరియు ఈ రాజ్య సువార్త సకల జనములకు సాక్ష్యార్థమై లోకమందంతటను ప్రకటింపబడును; అటుతరువాత అంతము వచ్చును.” (మత్తయి 24:14) ఈ ప్రకటన పని వెనుక దేవుని న్యాయం, దయ కనిపిస్తాయి. దేవుడు ఆపేయమని చెప్పేంత వరకు ఈ పని జరుగుతుంది. అప్పుడు అంతం వస్తుంది. అంతే కాకుండా అంతం రాబోయే ముందు పెద్దపెద్ద యుద్ధాలు, భూకంపాలు, కరువులు, రోగాలు లాంటివి కూడా ఉంటాయని యేసు చెప్పాడు.—మత్తయి 24:3; లూకా 21:10, 11.
ప్రపంచంలో జరిగే పెద్దపెద్ద సంఘటనలు గురించే కాకుండా అప్పుడు మనుషులు ఎలా ఉంటారో కూడా బైబిల్లో ఉంది. “అపాయకరమైన కాలములు వచ్చునని తెలిసికొనుము. ఏలాగనగా మనుష్యులు స్వార్థప్రియులు ధనాపేక్షులు, . . . తలిదండ్రులకు అవిధేయులు, . . . అజితేంద్రియులు క్రూరులు సజ్జనద్వేషులు, . . . దేవునికంటే సుఖానుభవము నెక్కువగా ప్రేమించువారు,” అని ఉంది. a—2 తిమోతి 3:1-5.
ఇప్పుడున్న చెడ్డ లోకం త్వరలో అంతమౌతుంది లేదా ‘గతించిపోతుంది.’—1 యోహాను 2:17
1914లో మొదటి ప్రపంచ యుద్ధ సమయంలో ఈ పరిస్థితులు కనిపించడం మొదలయ్యాయి. ఆ సంవత్సరం నుండి దేవుని రాజ్యం గురించిన వార్త ప్రపంచ నలు దిక్కులకు వ్యాపించింది. ఇలా ప్రకటిస్తున్నారనే పేరు ఉన్నందుకు యెహోవాసాక్షులు ఎంతో గర్విస్తున్నారు. వాళ్ల ముఖ్య పత్రిక పేరు కూడా ఇదే: కావలికోట యెహోవా రాజ్యాన్ని ప్రకటిస్తోంది. “ఆ దినమైనను గడియయైనను మీకు తెలియదు గనుక మెలకువగా ఉండుడి.”—మత్తయి 25:13.◼ (g15-E 11)
a ఎక్కువ సమాచారం కోసం, యెహోవాసాక్షులు ప్రచురించిన బైబిలు నిజంగా ఏమి బోధిస్తోంది? పుస్తకంలో 9వ అధ్యాయం చూడండి. ఈ పుస్తకం www.mt711.com/te వెబ్‌సైట్‌లో కూడా ఉంది.
మీకు ఇవి కూడా నచ్చవచ్చు
కావలికోట
లోకాంతం—భయపడుతున్నారా? ఎదురుచూస్తున్నారా? విసిగిపోయారా?
అంతం గురించి బైబిలు ఏమి చెప్తుందో తెలుసుకుంటే మీరు ఆశ్చర్యపోతారు?
బైబిలు ప్రశ్నలకు జవాబులు
హార్‌మెగిద్దోను యుద్ధం అంటే ఏమిటి?
హార్‌మెగిద్దోను అనే పదం బైబిల్లో ఒక్కసారే ఉంది కానీ ఆ యుద్ధం గురించి చాలా లేఖనాలు ప్రస్తావిస్తున్నాయి.
కావలికోట
అంతాన్ని చాలామంది తప్పించుకుంటారు—మీరూ తప్పించుకోవచ్చు
కానీ ఎలా తప్పించుకోవచ్చు? ఆహారం, ఇతర అవసరమైన వస్తువులు కూడపెట్టుకోవడం వల్లనా?
కావలికోట
“లోకాంతం”—అంటే ఏంటి?
మీకు తెలుసా? అంతం గురించి దేవుడు చెప్తున్నది మంచివార్తే కాని చెడువార్త కాదు.
