ምናዳ እንቐርቦም ሰባት ኪሞቱ ኸለዉ፡ ስለምንታይ ሰባት ከም ዚሞቱ ምሕታት ባህርያዊ እዩ። መጽሓፍ ቅዱስ፡ “መንደፍ ሞትሲ ሓጢኣት እዩ” ይብል።—1 ቈረንቶስ 15:56።

ስለምንታይ እዮም ኵሎም ሰባት ዚሓጥኡን ዚሞቱን፧

 እቶም ቀዳሞት ሰባት ዝዀኑ ኣዳምን ሄዋንን፡ ኣብ ቅድሚ ኣምላኽ ስለ ዝሓጥኡ፡ ህይወቶም ስኢኖም እዮም። (ዘፍጥረት 3:17-19) ካብቲ “ምንጪ ህይወት” ዝዀነ ኣምላኽ ብምዕላዎም፡ እዚ ሞት ኣስዒቡሎም እዩ።—መዝሙር 36:9፣ ዘፍጥረት 2:17።

 ኣዳም ንዅሎም ዘርኡ ሓጢኣት ኣመሓላሊፉሎም እዩ። መጽሓፍ ቅዱስ፡ “ከምቲ ብሓደ ሰብ ሓጢኣት ናብ ዓለም ዝኣተወ፡ ብሓጢኣት እውን ሞት፡ ኵላቶም ስለ ዝሓጥኡ ድማ ሞት ናብ ኵሉ ሰብ ሓሊፉ ኣሎ” ይብል። (ሮሜ 5:12) እምበኣር፡ ኵሎም ሰባት ሓጥኣን ስለ ዝዀኑ እዮም ዚሞቱ።

ሞት ብኸመይ ይውገድ፧

 ኣምላኽ ‘ንሞት ንዘለኣለም ከም ዚውሕጦ’ ኣተስፍዩ እዩ። (ኢሳይያስ 25:8) ንሞት ንምውጋድ ከኣ፡ ነቲ ሱር ጠንቁ ዝዀነ ሓጢኣት ኬወግዶ እዩ። ነዚ ድማ በቲ “ሓጢኣት ዓለም ዜርሕቕ” እተባህለሉ የሱስ ክርስቶስ ኣቢሉ ኺገብሮ እዩ።—ዮሃንስ 1:29፣ 1 ዮሃንስ 1:7።