Аллаһы бездә «киләчәк һәм өмет» a булуын тели (Ирмия 29:11). Ул бит безгә Изге Язмаларны да «Язмалар аша бирелгән юаныч ярдәмендә бездә өмет булсын дип» биргән (Римлыларга 15:4). Бу мәкаләдән шуны күрербез: Изге Язмалардагы җитәкчелек көндәлек проблемаларны хәл итәргә булыша һәм киләчәктә гаҗәеп үзгәрешләр булачак дип вәгъдә итә.

Бу мәкаләдә

•  Изге Язмалар киләчәккә өмет белән карарга ничек булыша?

•  Изге Язмаларда кешелек өчен нинди өмет язылган?

•  Өметкә кагылышлы Изге Язмалардагы шигырьләр

 Тормышыбызны яхшыртыр өчен Изге Язмаларда гамәли киңәшләр бар. Ләкин бу китап шулай ук киләчәккә өмет белән карарга булыша. Моңа кайбер мисалларны карап чыгыйк.

•   Гамәли киңәшләрне Изге Язмалардан эзлә. Зәбур 119:105 тә болай диелә: «Синең сүзең аякларыма — яктырткыч, юлыма — яктылык». Яктылык ике яктан файда китерә. Төнлә барганда, ул аяк астында нәрсә бар икәнен күрсәтә һәм алдыбыздагы сукмакны яктырта. Изге Язмалардагы гамәли принциплар да «аяк астыбыздагы» проблемаларны хәл итәргә булыша. Шулай итеп ул һәр көн туып торган авырлыкларны чишә алуыбызга өмет бирә. Изге Язмаларда әйтелгән сүзләр көчебезне яңартып җибәрә, аның үгет-нәсыйхатьләре «йөрәкне шатландыра» (Зәбур 19:7, 8). Шул ук вакыт Изге Язмаларда Аллаһының кешелек өчен һәм җир өчен тиздән тормышка ашачак гаҗәеп ниятләре турында әйтелә. Шул өмет безне шатлык белән тутыра һәм канәгатьлек китерә.

•   Башкалардан ярдәм эзлә. Өметсезлеккә бирелгәндә, кеше гадәттә гаиләсеннән һәм дусларыннан читләшә башлый. Изге Язмалар алай эшләү дөрес булмас иде дип өйрәтә. Читләшү акылсыз карарларга һәм эшләргә китерә (Гыйбрәтле сүзләр 18:1). Яраткан туганнарыбыз һәм дусларыбыз безгә акыл белән эш итәргә булышыр. Алар туган хәлне чишәр өчен файдалы киңәшләр бирә ала (Гыйбрәтле сүзләр 11:14). Ким дигәндә алар юатучы һәм көч өстәүче сүзләр әйтер, хәл яхшырганчы безгә көч өстәп торыр (Гыйбрәтле сүзләр 12:25).

•   Аллаһыга дога кыл. Изге Язмаларда болай диелә: «Үз йөгеңне Йәһвәгә сал, һәм ул сиңа булышыр. Тәкъва кешегә ул беркайчан да егылырга бирмәс» b (Зәбур 55:22). Шуңа күрә Йәһвә «өмет бирүче Аллаһы» дип атала (Римлыларга 15:13). «Бар мәшәкатьләреңне» аңа йөклә һәм һич тә шикләнмә, ул синең турында кайгырта (1 Петер 5:7). Изге Язмаларда Аллаһы сезне «ныгытачак, көчле итәчәк, сезне нык нигезгә урнаштырачак» дип әйтелә (1 Петер 5:10).

•   Авырлыклар өметеңне ныгытсын. Изге Язмаларда мондый вәгъдә язылган: «Мине тыңлаучы иминлектә яшәячәк һәм бәла-казадан курыкмаячак» (Гыйбрәтле сүзләр 1:33). Австралиядә яшәүче Маргаретның йорты давыл аркасында зыян күргән булган һәм ул күп кенә әйберләрен югалткан. Ләкин ул өметсезлеккә бирелмәгән, ул үзе өчен мөһим сабак алган: материаль әйберләрне бер көн югалтуың да бар. Шуннан соң ул күпкә мөһимрәк нәрсәләргә күбрәк игътибар бирергә булган. Ул үз гаиләсе, дуслары, Аллаһы белән мөнәсәбәтләре һәм Изге Язмалардагы өмет турында күбрәк уйлана башлаган (Зәбур 37:34; Ягъкуб 4:8).

 Изге Язмаларда кешелекне һәм җирне якты киләчәк көтә дип әйтелә. Анда әйтелгәннәр тиздән үтәләчәк. Кешелек безнең көннәрдә кичергән проблемалар безнең бу дөньяның «соңгы көннәрендә» яшәгәнебезне күрсәтә (2 Тимутигә 3:1—5). Тиздән, Аллаһы җирдә зур үзгәрешләр ясаячак һәм гаделсезлек белән газапларны юк итәчәк. Ул моны Аллаһы Патшалыгы ярдәмендә, бөтен дөнья өстеннән куелган хөкүмәт ярдәмендә башкарачак (Даниял 2:44; Ачылыш 11:15). Гайсә нәкъ шул Патшалык турында өйрәткән дә. Ул болай дигән: «Синең Патшалыгың килсен... Җирдә дә синең ихтыярың үтәлсен» (Маттай 6:9, 10).

 Аллаһының кешелеккә карата нияте Изге Язмаларда ап-ачык язылган. Аллаһы Патшалыгы хәл итәчәк кайбер проблемаларга игътибар итегез.

•   Ачлык булмаячак. «Җир үз җимешен бирер» (Зәбур 67:6).

•   Авырулар булмаячак. «Анда яшәүчеләрнең берсе дә: „Мин авырыйм“,— дип әйтмәс» (Ишагыя 33:24).

•   Үлем булмаячак. «Аллаһы... аларның һәр күз яшен сөртәчәк, һәм үлем, кайгы, ачы тавыш, авырту инде булмаячак. Чөнки элеккегеләр үтеп китте» (Ачылыш 21:3, 4).