1-3. ¿Baʼax u kʼáat u yaʼal k-meyajtik Jéeoba yéetel ‹tuláakal k-puksiʼikʼal›? Tsʼáa junpʼéel ejemplo.

TUMEN j-kʼebanoʼoneʼ yaʼab baʼaloʼob maʼ maʼalobtak k-beetkiʼ. K-tsʼáaik u graciasil tiʼ Jéeoba úuchik u túuxtik u Paal utiaʼal u perdonartikoʼon. Baʼaleʼ chéen jeʼel u perdonartikoʼon wa k-eʼesik kabal óolal, k-arrepentir yéetel k-kʼáat óoltik tiʼeʼ. Toʼoneʼ k-ojleʼ k-náajmatik k-castigartaʼal tumen Jéeoba yoʼolal k-kʼebanoʼob, chéen baʼaleʼ letiʼeʼ maʼatech u beetik (Sal. 103:10). Kex ku yeʼesiktoʼon u yutsil Jéeobaeʼ unaj k-meyajtik yéetel ‹tuláakal k-puksiʼikʼal› (1 Cró. 28:9). Wa tuláakloʼon j-kʼebanoʼoneʼ, ¿bix túun jeʼel k-meyajtik yéetel tuláakal k-puksiʼikʼaleʼ?

² Junpʼéel baʼax jeʼel u yáantkoʼoneʼ letiʼe k-ketik bix kuxlajik rey Asá yéetel rey Amasíasoʼ. Kex tu kaʼatúulal yaan baʼax maʼalob tu beetoʼobeʼ láayliʼ yaan baʼax kʼaas tu beetoʼobeʼ tumen j-kʼebanoʼob. Le Bibliaoʼ ku yaʼalikeʼ «Asaeʼ tu yoksaj u yóol tiʼ Yuumtsil» yéetel tuláakal u puksiʼikʼal (2 Cró. 15:16, 17; 25:1, 2; Pro. 17:3). Jeʼex k-ilkoʼ letiʼeʼ mantatsʼ tu yilaj u meyajtik Jéeoba yéetel tuláakal u puksiʼikʼal. Amasíaseʼ maʼ tu meyajtaj Jéeoba yéetel tuláakal u puksiʼikʼaliʼ. Ka tsʼoʼok u xuʼulsik le máaxoʼob pʼekmil u  kaajal Diosoʼ tu bisaj le diosoʼob ku adorartik le máakoʼobaʼ ka káaj u adorartik (2 Cró. 25:11-16).

³ Juntúul máax meyajtik Dios yéetel ‹tuláakal u puksiʼikʼaleʼ› jach u yaabiltmaj yéetel u kʼáat u adorart mantatsʼ chéen letiʼ. Teʼ Bibliaoʼ le tʼaan «puksiʼikʼaloʼ» ku meyaj utiaʼal u yaʼalaʼal jach bix máak. Táakaʼan le baʼax ku tuklikoʼ, le baʼax u yaabiltmoʼ, baʼax uts tu tʼaan u beetik yéetel baʼax péeksik u beet wa baʼax. Kex j-kʼebanoʼoneʼ jeʼel u páajtal k-meyajtik Jéeoba yéetel tuláakal k-puksiʼikʼaleʼ. Toʼoneʼ k-meyajtik Jéeoba tumen jach tu jaajil k-yaabiltmaj maʼ tumen bey u yaʼalaʼaltoʼonoʼ wa chéen tumen bey suukchajik toʼonoʼ (2 Cró. 19:9).

4. ¿Baʼax ken k-kan teʼ xookaʼ?

⁴ Utiaʼal k-naʼatik baʼax u kʼáat u yaʼal k-meyajtik Dios yéetel tuláakal k-puksiʼikʼaleʼ maʼalob ka kaanbalnakoʼon tiʼ bix kuxlajik rey Asá, Jehosafat, Ezequías yéetel Josías. Letiʼobeʼ reinarnajoʼob Judá yéetel kex yaan baʼax kʼaas tu beetoʼobeʼ lúuboʼob utsil tiʼ Jéeoba. Tu meyajtoʼob Jéeoba yéetel tuláakal u puksiʼikʼaloʼob. ¿Baʼaxten lúuboʼob utsil tiʼ Jéeoba? ¿Bix jeʼel k-kuxtal jeʼex letiʼobeʼ?

5. ¿Baʼax tu beetaj Asá ka káaj u reinar?

⁵ Ka tsʼoʼok u jóoʼsaʼal kaʼa jaats tiʼ u luʼumil Israeleʼ, anchaj u reinoil Judá yéetel Israel. U yóoxtúul rey anchaj Judaoʼ, Asá. Desde ka káaj u beetik u reyileʼ tu chʼaʼtuklaj u xuʼulsik le maʼ jaajil diosoʼoboʼ bey xan le núupkʼebanoʼ. Tu láaj xiixkuntaj le maʼ jaajil diosoʼoboʼ yéetel tu tojolchʼintaj le xiiboʼob ku núupkʼebankúuntkubaʼob teʼ templooʼ. Asaeʼ tu luʼsaj Maaka, u abuela, bey reinaileʼ «tumen tu túuxtaj beetbil kaʼach junpʼéel u yoochel Aserá» (1 Rey. 15:11-13). Ku tsʼoʼokoleʼ tu líiʼsaj u yóol le kaaj utiaʼal u kaʼa adorartik Jéeoba yéetel u «tsʼoʼokbeskoʼob le aʼalmajtʼaan[oʼ]». Jeʼex k-ilkoʼ Asaeʼ tu yilaj u yáantik u maasil u adorartoʼob Jéeoba (2 Cró. 14:4).

6. ¿Baʼax tu beetaj Asá le ka taal baʼateʼel Etiopía tu contra Judaoʼ?

⁶ Tu yáamil le diez años táan u beetik u reyil Asaoʼ mix junpʼéel kaaj baʼatelnaj tu contra Judá. Junpʼéel kʼiineʼ téek kʼuch junpʼéel millón u soldadoiloʼob Etiopía yéetel 300 u carroiloʼob baʼateʼel (2 Cró. 14:1, 6, 9, 10). ¿Baʼax tu beetaj Asá? Letiʼeʼ u yojel jach yaan u yáantaʼaloʼob tumen Jéeoba. Le beetkeʼ orarnaj tiʼ utiaʼal u kʼáatik ka áantaʼak u ganart le baʼateloʼ (xok 2 Crónicas 14:11). Yaan kʼiineʼ Jéeobaeʼ tu yáantaj u kaajal utiaʼal u ganartik u enemigoʼob, kex maʼ chúukaʼan u yóol le reyoʼob tiʼ letiʼoʼ. Lelaʼ tu beetaj utiaʼal u yeʼesik letiʼ u jaajil Dios (1 Rey. 20:13, 26-30). Chéen baʼaleʼ tu yáantaj Asá tumen tu kʼubaj u yóol tiʼ. Tu núukaj u oración, le oʼolal tu ganartaj le baʼateloʼ (2 Cró. 14:12, 13). Baʼaleʼ ka máan kʼiineʼ tu beetaj junpʼéel baʼax kʼaas, tu lugar u kʼáatik u yáantaj Jéeobaeʼ tu kaxtaj u yáantaj u reyil Siria (1 Rey. 15:16-22). Kex beyoʼ Jéeobaeʼ tu yilaj yaabiltaʼan tumen Asá, tumen letiʼeʼ tu meyajtaj yéetel tuláakal u puksiʼikʼal ichil le bukaʼaj kʼiinoʼob kuxlajoʼ. ¿Bix jeʼel u páajtal k-beetik jeʼex Asaeʼ? (1 Rey. 15:14.)

7, 8. ¿Bix jeʼel k-beetik jeʼex Asaeʼ?

⁷ ¿Bix jeʼel k-ojéeltik wa táan k-meyajtik Jéeoba yéetel tuláakal k-puksiʼikʼaleʼ? Maʼalob ka k-tukult lelaʼ: «¿Yaan wa in beetik baʼax ku yaʼalik Jéeoba kex ka in aktáant talamiloʼob? ¿In chʼaʼtukultmaj wa in wáantaj utiaʼal ka pʼáatak limpioil u kaajal?». Maʼalob ka k-kʼaʼajseʼ Asaeʼ chúukpaj u yóol u beet baʼax ku yaʼalik Jéeoba, maʼ sajakchaj u luʼs u abuela u beet u reinailiʼ. Yaan kʼiin xaneʼ ku kʼaʼabéettal k-eʼesik  chúukaʼan óolal jeʼex tu beetil Asaeʼ. Wa ka expulsartaʼak juntúul k-láakʼtsil wa k-amigo tumen maʼ tu arrepentir yoʼolal baʼax tu beeteʼ, ¿yaan wa xan u chúukpajal k-óol utiaʼal maʼ k-bisikba tu yéetel? ¿Baʼax ken u péeksoʼon k-beet k-puksiʼikʼal?

⁸ Jeʼex úuch tiʼ Asaeʼ, yaan kʼiineʼ toʼon xaneʼ k-aktáantik jejeláas baʼaloʼob. Maʼ xaaneʼ le paalaloʼob ku binoʼob xookoʼ ku yaʼalaʼal baʼal tiʼob tumen u yéet xookoʼob wa u maestroʼob ikil u meyajtikoʼob Jéeoba. Wa teʼ tuʼux k-meyajoʼ ku tuklaʼal minaʼan mix baʼal k-beet le ken k-kʼáat permiso utiaʼal k-bin asamblea wa tumen maʼ t-meyaj u maasil horaʼob. Le ken k-aktáant le baʼaloʼobaʼ unaj u chúukpajal k-óol tiʼ Dios jeʼex tu beetil Asaeʼ. Wa k-orar tiʼ Jéeobaeʼ yaan u tsʼáaiktoʼon u muukʼil utiaʼal k-beetik baʼax uts tu tʼaan. Kʼaʼajaktoʼoneʼ Jéeobaeʼ tu yáantaj Asá utiaʼal maʼ u chʼaʼik saajkil.

9. ¿Bix jeʼel k-beetik u kiʼimaktal u yóol Jéeoba ken kʼaʼaytajnakoʼon tiʼ u maasileʼ?

⁹ Asaeʼ maʼ tuukulnaj chéen tu yoʼolaliʼ, baʼaxeʼ tu yáantaj u maasil utiaʼal u kaʼa adorartikoʼob Jéeoba. Toʼon xaneʼ jeʼel u páajtal k-beetik beyoʼ. Maʼ u tuʼubultoʼoneʼ Jéeobaeʼ ku tsʼáaik cuenta ken kʼaʼaytajnakoʼon tiʼ u maasil. Ku kiʼimaktal u yóol ken u yil táan k-beetik tumen k-yaabiltmaj yéetel tumen ku yilik k-kʼáat ka xiʼik maʼalobil tiʼ u maasil máakoʼob.

10, 11. ¿Bix jeʼel k-beetik jeʼex Jehosafateʼ?

¹⁰ Jehosafat, u hijo Asaeʼ, tu meyajtaj Jéeoba yéetel tuláakal u puksiʼikʼal (2 Cró. 20:31, 32). Jeʼex tu beetil u taataeʼ letiʼ xaneʼ tu yaʼalaj tiʼ le kaaj ka seguernak u meyajtik Jéeobaoʼ. Tu túuxtaj jujuntúul máakoʼob tu kaajiloʼob Judá utiaʼal u kaʼanskoʼob «baʼax ku yaʼalik u yaʼalmajtʼaan Yuumtsil» (2 Cró. 17:7-10). Bin tak tu reinoil u diez chʼiʼibaloʼob Israel kajaʼanoʼob tu witsiloʼob Efraín utiaʼal u yaʼaliktiʼob ‹ka u kaxtoʼob Yuumtsil› tu kaʼatéen (2 Cró. 19:4). Jeʼex k-ilkoʼ rey Jehosafateʼ tu tsʼáaj u yóol u kaxt Jéeoba yéetel tuláakal u puksiʼikʼal (2 Cró. 22:9).

¹¹ Teʼ kʼiinoʼobaʼ Jéeobaeʼ táan u yáantik tuláakal máak utiaʼal ka kaanbalnakoʼob tiʼ letiʼ, toʼoneʼ jeʼel u páajtal k-áantajeʼ. ¿Táan wa a tsʼáaik a wóol kʼaʼaytaj cada mes? ¿Ka tsʼíiboltik wa a kaʼansik tiʼ u maasil bix jeʼel u káajal u meyajtikoʼob Jéeobaeʼ? Wa teech ka tsʼáaik a wóoleʼ Jéeobaeʼ jeʼel u yáantkech a kaxt juntúul máax taak u kaanbaleʼ. ¿Ka kʼáatik wa tiʼ Jéeoba ka u yáantech a beete? ¿Jeʼel wa a wóotik a tsʼáa xook tiʼ wa máax teʼ súutukil a jóoʼsmaj utiaʼal a jeʼeleloʼ? Jehosafateʼ tu yilaj u yáantik u maasil utiaʼal u kaʼa meyajtikoʼob Jéeoba, toʼon xaneʼ jeʼel u páajtal k-áantik le máaxoʼob tu xulaj u jóokʼloʼob kʼaʼaytajoʼ. Le ancianoʼob xanoʼ wa ku yojéeltikoʼob yaan máaxoʼob expulsartaʼan tu territorioil le múuchʼuliloʼ ku yilik u xíimbaltikoʼob yéetel u yáantkoʼob, maʼ xaaneʼ yaneʼ tsʼoʼok u xuʼulul u beetik baʼax kʼaas.

12, 13. 1) ¿Baʼax tu beetaj Jehosafat ka sajakchaji? 2) Wa k-sajaktaleʼ, ¿baʼaxten maʼalob ka k-beet jeʼex Jehosafateʼ?

¹² Jeʼex tu beetil u taataeʼ, Jehosafateʼ tu kʼubaj u yóol tiʼ Jéeoba le ka taal baʼateltbil u kaajil Judá tumen junpʼéel nojoch ejército (xok 2 Crónicas 20:2-4). Letiʼeʼ jach sajakchaji le oʼolal tu kʼáataj u yáantaj Jéeoba. Teʼ oración tu beetoʼ tu yaʼalajtiʼ maʼ tu páajtal u ganartik le nojoch ejercitoaʼ. Le beetik tu yaʼalaj: «¡Maʼ k-ojel baʼax unaj k-beetikiʼ; le oʼolal k-sutik paakat tiʼ teech!» (2 Cró. 20:12).

¹³ Jeʼex úuch tiʼ Jehosafateʼ maʼ xaaneʼ yaan kʼiineʼ maʼ t-kaxtik bix jeʼel k-aktáantik le problemaʼob yaantoʼonoʼ yéetel jeʼel tak  k-sajaktaleʼ (2 Cor. 4:8, 9). Le ken úuchuktoʼon beyaʼ maʼalob ka k-kʼaʼajs baʼax tu beetaj Jehosafat. Letiʼeʼ maʼ suʼlakchaj u yaʼal ich oración tu táan le kaaj maʼ u yojel baʼax ken u beetoʼ (2 Cró. 20:5). Le íichamtsiloʼoboʼ maʼalob ka u beetoʼob jeʼex Jehosafateʼ. Maʼalob ka u kʼáatoʼob ich oración tu táan u familiaʼob ka áantaʼak u yiloʼob baʼax ken u beetoʼob yéetel maʼ unaj u suʼlaktaloʼobiʼ. Wa ku beetkoʼob beyaʼ yaan u yilaʼal jach ku confiaroʼob tiʼ Jéeoba. Letiʼeʼ tu yáantaj Jehosafat yéetel yaan xan u yáantik le íichamtsiloʼoboʼ.

14, 15. ¿Bix tu yeʼesil Ezequías jach chúukaʼan u yóol tiʼ Jéeoba?

¹⁴ Rey Ezequíaseʼ «tu yoksaj u yóol tiʼ Yuumtsil» kex ku adorartaʼal yaanal diosoʼob tumen u taata. Ezequíaseʼ tu luʼsaj le tuʼuxoʼob ku yúuchul adoraroʼ, tu xiixkúuntaj le tuunichoʼob ku adorartaʼaloʼ, tu xeʼexetʼaj u yoocheloʼob Aserá bey xan tu kaʼakachaj le kaan de bronce tu beetaj Moisesoʼ. Ezequíaseʼ chúukpaj u yóol u meyajt Jéeoba. Letiʼeʼ «tu tsʼoʼokbesaj le aʼalmajtʼaanoʼob tu tsʼáaj Yuumtsil tiʼ Moise[soʼ]» (2 Rey. 18:1-6).

¹⁵ Le táan u beetik u reyil Ezequíasoʼ óotaʼab xuʼulsbil Judá yéetel Jerusalén tumen le asirioʼoboʼ. Senaquerib, u reyil Asiriaeʼ, tu yaʼalaj baʼal tiʼ Jéeoba yéetel tu yóotaj u yoks tu pool Ezequías ka u kʼububaʼob. Teʼ kʼiinoʼob jach talamtakoʼ Ezequíaseʼ orarnaj tiʼ Jéeoba utiaʼal u kʼáatik u yáantaj yéetel tu kʼubaj u yóol tiʼ. Letiʼeʼ u yojel maas yaan u muukʼ Jéeoba tiʼ u reyil Asiria, le oʼolal jeʼel u salvartik u kaajaleʼ (xok Isaías 37:15-20). Dioseʼ tu núukaj u oración, ka tu túuxtaj juntúul u ángel utiaʼal u kíimsik 185,000 u soldadoiloʼob Asiria (Isa. 37:36, 37).

16, 17. ¿Bix jeʼel k-beetik jeʼex Ezequíaseʼ?

¹⁶ Ka máan kʼiineʼ Ezequíaseʼ kʼojaʼanchaji yéetel jach óolak kíimik. Teʼ kʼiinoʼob jach talamtakoʼ utiaʼal ka áantaʼak tumen Jéeobaeʼ tu kʼáat óoltaj tiʼ maʼ u tuʼubsik le chúukaʼan óolal tu yeʼesoʼ (xok 2 Reyes 20:1-3, TNM). Jéeobaeʼ tu yuʼubaj u oracioneʼ, ka tu tsʼakaj. Teʼ kʼiinoʼobaʼ k-ojleʼ Jéeobaeʼ maʼ ken u beet junpʼéel milagro utiaʼal u tsʼakikoʼon wa utiaʼal u chowakkíintik k-kuxtal. Chéen baʼaleʼ jeʼex Ezequíaseʼ k-ojel maʼ ten u pʼatoʼon. Toʼoneʼ jeʼel u páajtal k-aʼalik tiʼ Jéeobaeʼ: «Yuumtsil, teneʼ kin kʼáat óoltik tiʼ teech, ka kʼaʼajak tiʼ teech bix tin meyajtilakech yéetel chúukaʼan óolal». Kux teech, ¿jach wa ka creertik yaan u yáantkech yéetel yaan u kanáantkech Jéeoba ken kʼojaʼanchajkech? (Sal. 41:3).

¹⁷ ¿Bix jeʼel k-beetik jeʼex Ezequíaseʼ? Maʼ xaaneʼ yaan baʼax táan u náachkuntkoʼon tiʼ Jéeoba yéetel táan u luʼsiktoʼon tiempo utiaʼal k-meyajtik jeʼex unajeʼ. Bejlaʼeʼ yaʼab máakeʼ ku yilkoʼob le artistaʼob bey diosoʼoboʼ, tsʼoʼoleʼ hasta mix u kʼaj óoloʼobiʼ. Yaʼab tiempo ku peʼertikoʼob ikil u yokol u xakʼaltoʼob le baʼaxoʼob ku tsʼáaik le artistaʼob teʼ redes socialesoʼ. Yaan máaxoʼob xaneʼ ku suut vicioil tiʼob le redes socialesoʼ, u túuxtikoʼob mensajeʼob tiʼ celular wa tiʼ computadora wa ku sen ilkoʼob baʼax ku yaʼalaʼal teʼ Internetoʼ. U jaajileʼ le baʼaloʼobaʼ maʼ kʼaas ka meyajnaktoʼon utiaʼal k-tsikbal yéetel k-amigoʼob wa k-láakʼtsiloʼobiʼ. Chéen baʼaleʼ unaj k-kanáantik bukaʼaj tiempo k-máansikiʼ. Yaan hora xaneʼ jeʼel u kaʼantal k-ich tumen yaʼab máax uts tu yich le baʼaxoʼob k-tsʼáaik Internetoʼ. Tsʼoʼoleʼ jeʼel tak k-kʼuuxil yéetel wa máax tumen ku xuʼulul u yilik baʼax k-tsʼáaikiʼ. Le oʼolaleʼ maʼalob ka k-beet jeʼex apóstol Pablo, Áquila yéetel Priscilaeʼ. Letiʼobeʼ ¿jeʼel wa u peʼertikoʼob tiempo ikil u sen ookloʼob Internet utiaʼal u yilkoʼob baʼax ku beetik  máakoʼob mix u kʼaj óoloʼob yéetel maʼatech u meyajtikoʼob Jéeobaeʼ?. Le Bibliaoʼ ku yaʼalikeʼ Pabloeʼ tu jach tsʼáaj «u yóol u kʼaʼayt u tʼaan Dios». Priscila yéetel Áquila xaneʼ yaʼab tiempo tu máansoʼob táan u tsolkoʼob «tubeel u bejil Dios tiʼ» uláakʼ máakoʼob (Bax. 18:4, 5, 26). Maʼalob ka k-tukult lelaʼ: «¿Kin kanáantik wa maʼ in tratartik wíinikoʼob bey diosoʼobeʼ? ¿Kin kanáantik wa maʼ in xupik in tiempo tiʼ baʼaloʼob maʼ kʼaʼanaʼantakiʼ?» (xok Efesoiloʼob 5:15, 16).

18, 19. ¿Bix jeʼel k-beetik jeʼex Josíaseʼ?

¹⁸ Josíaseʼ tu yuʼubaj u tʼaan Jéeoba yéetel tuláakal u puksiʼikʼal (2 Cró. 34:31). Letiʼeʼ u kaʼa áabil Ezequías, desde tu paalil «joʼopʼ u kaxtik u [Dios] David u máanjaʼan chʼiʼibal». Le ka tu chukaj 20 años tiʼeʼ káaj u luʼsik le maʼ jaajil diosoʼob yanoʼob Judaoʼ (xok 2 Crónicas 34:1-3). Josíaseʼ tu tsʼáaj u yóol u beet baʼax uts tu tʼaan Jéeoba, maʼ jeʼex uláakʼ reyoʼob anchaj Judaoʼ. Junpʼéel kʼiineʼ u nojchil le sacerdoteʼoboʼ tu kaxtaj u libroil u Ley Dios teʼ templooʼ, maʼ xaaneʼ letiʼe tsʼíibtaʼab tumen Moisesoʼ. Ka xoʼok tumen u secretarioeʼ tu tsʼáaj cuenta yaan baʼaxoʼob kʼaʼabéet u beetik utiaʼal u maas meyajtik Jéeoba. Tsʼoʼoleʼ tu yaʼalaj tiʼ le kaaj ka u beet xan beyoʼ. Le oʼolaleʼ mientras kuxaʼan Josíaseʼ, le kaajoʼ ‹maʼ tu pʼataj Yuumtsil u Diosoʼobiʼ› (2 Cró. 34:27, 33).

¹⁹ Wa táankelmecheʼ jeʼel u páajtal a beetik jeʼex Josíaseʼ, yéetel ilawil a maas kʼaj óoltik Jéeoba. Josíaseʼ maʼ xaaneʼ kaanbalnaj tiʼ rey Manasés, u abuelo, letiʼeʼ perdonartaʼab tumen Jéeoba úuchik u arrepentir. Teech xaneʼ yaʼab baʼaloʼob jeʼel a kanik tiʼ le máaxoʼob tsʼoʼok u yantal u jaʼabiloʼob yanoʼob ichil a familia bey xan teʼ múuchʼuliloʼ. Letiʼobeʼ jeʼel u tsikbaltikoʼobtech bix tsʼoʼok u sen áantaʼaloʼob tumen Jéeobaeʼ. Kʼaʼajak xan tech bix tu yuʼubiluba Josías le ka tu yojéeltaj baʼax ku yaʼalik u Ley Jéeoba. Letiʼeʼ taak kaʼach u beetik baʼax ku yaʼalik Jéeoba le oʼolal tu séebaʼanil tu kʼexaj u kuxtal. Utiaʼal a tsʼíiboltik a meyajtik Jéeobaeʼ kʼaʼabéet xan a xokik le Bibliaoʼ. Wa ka beetkeʼ yaan a maas natsʼkaba tiʼ letiʼ yéetel yaan u yantaltech kiʼimak óolal. Tsʼoʼoleʼ yaan u taaktal a tsikbaltik tiʼ uláakʼoʼob baʼax tsʼoʼok a kanik yoʼolal Jéeoba (xok 2 Crónicas 34:18, 19). Wa ka xakʼalxoktik le Bibliaoʼ yaan u yáantkech a wil wa yaan baʼaxoʼob kʼaʼabéet a maʼalobkíintik utiaʼal a maas meyajtik Jéeoba. Jeʼex Josíaseʼ ilawil a séeb kʼexik baʼax kʼaʼabéet ichil a kuxtal.

20, 21. 1) ¿Baʼaxten lúub utsil tiʼ Jéeoba le kantúul reyoʼob anchaj Judaoʼ? 2) ¿Baʼax ken k-il teʼ tuláakʼ xookoʼ?

²⁰ ¿Baʼax jeʼel k-kanik tiʼ le kantúul reyoʼob tu meyajtoʼob Jéeoba yéetel tuláakal u puksiʼikʼaloʼob yanchajoʼob Judaoʼ? Letiʼobeʼ tu chʼaʼtuklaj u beetkoʼob baʼax ku yaʼalik Jéeoba yéetel u adorartikoʼob chéen letiʼ ichil tuláakal u kuxtaloʼob. Tu kʼubaj xan u yóoloʼob tiʼ Jéeoba le ka líikʼ u enemigoʼob tu contraʼoboʼ. Chéen baʼaleʼ le baʼax maas maʼalob tu beetoʼoboʼ letiʼe u meyajtikoʼob Jéeoba tumen u yaabiltmoʼoboʼ.

²¹ Kex j-kʼebanoʼob yéetel tu beetoʼob baʼaloʼob maʼ maʼalobtakeʼ, kʼaʼamoʼob tumen Jéeoba. Letiʼeʼ tu yilaj jach baʼax yaan tu puksiʼikʼaloʼob yéetel u yojel jach u kʼubmaj u yóoloʼob tiʼ. Toʼon xaneʼ j-kʼebanoʼon yéetel k-beetik baʼaxoʼob maʼ maʼalobtakiʼ. Kex beyoʼ Jéeobaeʼ jeʼel u kʼamkoʼon wa ku yilik táan k-meyajtik yéetel tuláakal k-puksiʼikʼaleʼ. Teʼ tuláakʼ xookoʼ yaan k-ilik le baʼaloʼob maʼ maʼalobtak tu beetaj le reyoʼobaʼ.