യുവജനങ്ങൾ ചോദിക്കുന്നു
സോഷ്യൽ മീഡിയയിൽ എങ്ങനെയും ഒരു ‘സംഭവമാകാൻ’ തോന്നുന്നെങ്കിൽ. . .
ഇലാൻ എന്ന പെൺകുട്ടി പറയുന്നു: “എന്റെ സ്കൂളിലെ കൂട്ടുകാർക്ക് ഓൺലൈനിൽ നൂറുകണക്കിനു ഫോളോവേഴ്സ് ഉണ്ട്. അവരൊക്കെ എന്തു ഫെയ്മസാ. സത്യം പറഞ്ഞാൽ എനിക്ക് അവരെപ്പോലെയാകാൻ കൊതി തോന്നിയിട്ടുണ്ട്.”
നിങ്ങൾക്ക് എപ്പോഴെങ്കിലും അങ്ങനെ തോന്നിയിട്ടുണ്ടോ? ഉണ്ടെങ്കിൽ ആ ആഗ്രഹത്തിനു പിന്നാലെ പോകുന്നതുകൊണ്ടുള്ള കുഴപ്പങ്ങൾ ഒഴിവാക്കാൻ ഈ ലേഖനം സഹായിക്കും.
എന്തൊക്കെയാണ് അപകടങ്ങൾ?
ബൈബിളിൽ സുഭാഷിതങ്ങൾ 22:1 പറയുന്നത് “സത്പേര് നേടുന്നതു സമ്പത്തിനെക്കാൾ പ്രധാനം” എന്നാണ്. അതുകൊണ്ട് നല്ലൊരു പേരുണ്ടായിരിക്കണമെന്നും മറ്റുള്ളവർ നിങ്ങളെ ഇഷ്ടപ്പെടണമെന്നും ഒക്കെ ചിന്തിക്കുന്നതു തെറ്റല്ല.
എന്നാൽ മറ്റുള്ളവർ തന്നെ അംഗീകരിക്കണം എന്ന ആഗ്രഹം കൂടിപ്പോയിട്ട് ഓൺലൈനിൽ താനൊരു തരംഗമായി മാറണം എന്നു ചിലപ്പോൾ നമ്മൾ ചിന്തിച്ചുപോയേക്കാം. അതിൽ എന്തെങ്കിലും അപകടം ഉണ്ടോ? ഉണ്ടെന്നു 16-കാരിയായ ഒനിയ പറയുന്നു:
“വൈറലാകാൻ വേണ്ടി സ്കൂളിന്റെ സൺഷെയ്ഡിൽനിന്നു താഴേക്കു ചാടുന്നതുപോലുള്ള ഭ്രാന്തു കാണിക്കുന്നവരെ എനിക്കറിയാം.”
ചിലർ ഒരു ചിന്തയുമില്ലാതെ പല മണ്ടത്തരങ്ങളും കാണിച്ച്, അത് ഷൂട്ട് ചെയ്ത് ഓൺലൈനിൽ പോസ്റ്റ് ചെയ്യുന്നു. എന്തു ചെയ്തിട്ടായാലും മറ്റുള്ളവർ തങ്ങളെ ശ്രദ്ധിക്കണമെന്നേ അവർക്കുള്ളൂ. ഉദാഹരണത്തിന്, അടുത്തിടെ കൗമാരപ്രായത്തിലുള്ള പല കുട്ടികളും ഡിറ്റർജന്റ് പോഡുകൾ കഴിക്കുന്ന വീഡിയോ പോസ്റ്റ് ചെയ്തു. ഡിറ്റർജന്റ് പോഡുകൾ എന്നു പറയുന്നത്, വാഷിങ് മെഷീനിൽ ഉപയോഗിക്കുന്ന സോപ്പിനെ ചെറിയ ക്യാപ്സ്യൂൾ രൂപത്തിൽ ആക്കിയതാണ്. ശരീരത്തിനു ദോഷം ചെയ്യുന്ന പല കാര്യങ്ങളും അതിൽ അടങ്ങിയിട്ടുണ്ട്. ഒരിക്കലും ചെയ്യരുതാത്ത ഈ കാര്യം അവർ ചെയ്തത് കൂട്ടുകാരുടെ ഇടയിൽ ഒരു ‘സംഭവമാകാൻ’ വേണ്ടിയാണ്.
ബൈബിൾ പറയുന്നു: “പൊങ്ങച്ചം കാണിക്കാനുള്ള തരംതാണ ആഗ്രഹത്തോടെ . . . ഒന്നും ചെയ്യാതിരിക്കുക.”—ഫിലിപ്പിയർ 2:3, ഗുഡ് ന്യൂസ് പരിഭാഷ.
ചിന്തിക്കാനായി:
ഓൺലൈനിൽ ഫെയ്മസ് ആകുന്നത് എത്രത്തോളം പ്രധാനമാണെന്നാണു നിങ്ങൾക്കു തോന്നുന്നത്?
കൂട്ടുകാരുടെ മുന്നിൽ ആളാകാൻ നിങ്ങൾ സ്വന്തം ആരോഗ്യവും ജീവനും അപകടപ്പെടുത്തുമോ?
“അതു വെറും പ്രഹസനമാണ്”
‘വൈറൽ’ ആകാൻവേണ്ടി ആളുകൾ എപ്പോഴും അപകടംപിടിച്ച കാര്യങ്ങൾ ചെയ്യണമെന്നില്ല. ചിലർ ഉപയോഗിക്കുന്ന ഒരു തന്ത്രത്തെക്കുറിച്ച് 22-കാരിയായ എറീക്ക പറയുന്നു:
“‘എനിക്ക് ഒരുപാടു കൂട്ടുകാരുണ്ട്, ഞാൻ എപ്പോഴും അവരുടെകൂടെ അടിച്ചുപൊളിക്കുകയാണ്’ എന്നൊക്കെ മറ്റുള്ളവർ ചിന്തിക്കാൻ ചിലർ ഇങ്ങനെ ഫോട്ടോകൾ ഇട്ടുകൊണ്ടേയിരിക്കും. അതു വെറും പ്രഹസനമാണ്.”
അതിനുവേണ്ടി ചിലർ തട്ടിപ്പു കാണിക്കാറുണ്ടെന്ന് 15 വയസ്സുള്ള കെയ്റ പറയുന്നു:
“ഒരു പാർട്ടിയിലാണ് എന്ന് മറ്റുള്ളവർക്കു തോന്നുന്ന വിധത്തിൽ ചിലർ ഫോട്ടോകളെടുത്ത് പോസ്റ്റ് ചെയ്യും. പക്ഷേ, അവർ ശരിക്കും വീട്ടിൽ ആയിരിക്കും.”
താൻ അങ്ങനെയൊരു കാര്യം ചെയ്തെന്ന് 22-കാരനായ മാത്യു സമ്മതിക്കുന്നു:
“ഒരിക്കൽ ഞാൻ ഒരു ഫോട്ടോ പോസ്റ്റ് ചെയ്തിട്ട് ലൊക്കേഷൻ ടാഗ് ചെയ്തത് എവറസ്റ്റ് പർവതം എന്നാണ്. പക്ഷേ, സത്യം പറഞ്ഞാൽ ഞാൻ ഏഷ്യയിലേ പോയിട്ടില്ല.”
ബൈബിൾ പറയുന്നു: “എല്ലാത്തിലും സത്യസന്ധരായിരിക്കാൻ ഞങ്ങൾ ആഗ്രഹിക്കുന്നു.”—എബ്രായർ 13:18.
ചിന്തിക്കാനായി:
നിങ്ങൾ സോഷ്യൽ മീഡിയ ഉപയോഗിക്കുന്ന ഒരാളാണെങ്കിൽ, ഓൺലൈനിൽ ഒരു താരമാകാൻവേണ്ടി സത്യമല്ലാത്ത കാര്യങ്ങൾ പോസ്റ്റ് ചെയ്യുമോ?
നിങ്ങൾ ഇടുന്ന ചിത്രങ്ങളും കമന്റുകളും ശരിക്കും നിങ്ങൾ ആരാണെന്നും നിങ്ങളുടെ വിശ്വാസങ്ങൾ എന്തൊക്കെയാണെന്നും കാണിക്കുന്നവയാണോ?
ഫോളോവേഴ്സിന്റെയും ലൈക്കുകളുടെയും എണ്ണം പ്രധാനമാണോ?
ഓൺലൈനിൽ ‘ട്രെന്റിങ്’ ആകാൻ ആഗ്രഹിക്കുന്ന പലരും ഫോളോവേഴ്സിന്റെയും ലൈക്കുകളുടെയും എണ്ണം കൂട്ടാൻ പലതും ചെയ്യുന്നു. താനും അങ്ങനെ ചെയ്തിട്ടുണ്ടെന്ന് നമ്മൾ മുമ്പ് കണ്ട മാത്യു പറയുന്നു:
“‘നിങ്ങൾക്ക് എത്ര ഫോളോവേഴ്സ് ഉണ്ട്?’ ‘എത്ര ലൈക്ക് വരെ കിട്ടിയിട്ടുണ്ട്?’ എന്നൊക്കെ ഞാൻ മറ്റുള്ളവരോടു ചോദിക്കാറുണ്ട്. ഫോളോവേഴ്സിന്റെ എണ്ണം കൂട്ടാൻ, എനിക്ക് അറിയാത്തവരെപ്പോലും ഞാൻ ഫോളോ ചെയ്യും. അപ്പോൾ അവർ തിരിച്ചും ചെയ്യുമല്ലോ. എങ്ങനെയും ഫെയ്മസ് ആകണമെന്നൊരു ചിന്ത എനിക്കു പണ്ടേ ഉണ്ടായിരുന്നു. സോഷ്യൽ മീഡിയ ഉപയോഗിക്കാൻ തുടങ്ങിയപ്പോൾ പിന്നെ പറയുകയും വേണ്ടാ.”
ചില ആളുകൾ അവരുടെ ഫോളോവേഴ്സിന്റെയും കിട്ടുന്ന ലൈക്കുകളുടെയും എണ്ണം വെച്ചാണ് തങ്ങളെത്തന്നെ വിലയിരുത്തുന്നതെന്ന് 25 വയസ്സുള്ള മരിയ പറയുന്നു:
“ഒരു പെൺകുട്ടി സെൽഫി പോസ്റ്റ് ചെയ്തിട്ട് അതിന് ആവശ്യത്തിന് ലൈക്ക് കിട്ടിയില്ലെങ്കിൽ പിന്നെ ആകെ സങ്കടമായി. തന്നെ കാണാൻ കൊള്ളില്ലെന്നാണ് അവൾ ചിന്തിക്കുന്നത്. പക്ഷേ അതല്ലല്ലോ സത്യം. എങ്കിലും പലർക്കും അങ്ങനെതന്നെയാണ് തോന്നുക. ഒരു തരത്തിൽ പറഞ്ഞാൽ അവർ അവർക്ക് എതിരെതന്നെ സൈബർ ആക്രമണം നടത്തുകയാണ്.”
ബൈബിൾ പറയുന്നു: “നമുക്കു ദുരഭിമാനികളാകാതിരിക്കാം. പരസ്പരം മത്സരിക്കുന്നതും അസൂയപ്പെടുന്നതും ഒഴിവാക്കാം.”—ഗലാത്യർ 5:26.
ചിന്തിക്കാനായി:
സോഷ്യൽ മീഡിയ ഉപയോഗിക്കുമ്പോൾ നിങ്ങളെ മറ്റുള്ളവരുമായി താരതമ്യം ചെയ്യാൻ തോന്നാറുണ്ടോ?
ആത്മാർഥതയുള്ള കൂട്ടുകാരെ നേടുന്നതാണോ അതോ ഫോളോവേഴ്സിന്റെ എണ്ണം കൂട്ടുന്നതാണോ നിങ്ങൾക്കു പ്രധാനം?