Insizwa okuthiwa nguWill ithi, “Ngezinye izikhathi ukufunda iBhayibheli kungabukeka kubhora uma ungazi ukuthi iyiphi indlela ekahle yokulifunda.”

 Ungathanda yini ukwazi izinto ezingakusiza ukujabulele ukufunda iBhayibheli? Lesi sihloko sizokusiza.

•  Yenza iBhayibheli liphile

•  Cwaninga!

•  Okushiwo ontanga yakho

 Zifake kulokho okufundayo. Ungenza lokhu okulandelayo:

1.   Khetha indaba ethile eBhayibhelini ongathanda ukuyifunda. Ungakhetha indaba ethile noma isahluko esithile ezincwadini zeBhayibheli ezilandisa ngokuphila kukaJesu noma ulalele ukufundwa kweBhayibheli okusadrama okukuyi-jw.org/zu.

2.   Yifunde leyo ndaba. Ungayifunda uwedwa noma uyifunde nabangane noma amalungu omndeni. Ningahlukaniselana, omunye afunde ingxenye elandisayo abanye bafunde izingxenye zabalingiswa abahlukahlukene kuleyo ndaba.

3.   Zama okunye kwalokhu okungezansi:

   •   Dweba izithombe zendaba ofunda ngayo. Noma udwebe izithombe ezilandelanayo ezibonisa lokho okwenzekayo kuleyo ndaba kusukela ekuqaleni kuze kube sekugcineni. Ngaphansi kwesithombe ngasinye, bhala umusho ochaza okwenzekayo.

   •   Dweba ibhokisi, kulo ubhale igama lomuntu othembekile ofunde ngaye eBhayibhelini, emaceleni alelo bhokisi bhala ukuthi wayenobuntu obunjani nokuthi iziphi izibusiso azithola.

   •   Yenza sengathi ubika ezindabeni kuthelevishini ngendaba oyifunde eBhayibhelini. Veza izinhlangothi ezihlukahlukene zaleyo ndaba, bese wenza sengathi uxoxa nabalingiswa noma ofakazi abakubona lokho okwakwenzeka.

   •   Uma othile kuleyo ndaba enza isinqumo esibi, zama ukucabanga ukuthi yini eyayingenzeka ukuba wayekhethe kahle. Ngokwesibonelo, cabanga ngoPetru lapho ephika uJesu. (Marku 14:66-​72) Kwakufanele abaphendule kanjani uPetru labo ababemcindezela?

   •   Uma ukwazi, zama ukuzibhalela eyakho idrama uyithathela endabeni ethile eseBhayibhelini. Bonisa nokuthi yiziphi izifundo esingazifunda kuleyo ndaba.​—Roma 15:4.

 Uma ucwaninga ungathola amagugu obukade ungawanakile. Empeleni, ngezinye izikhathi ngisho negama elilodwa noma amabili angakunika ulwazi olubalulekile.

 Ngokwesibonelo, qhathanisa uMathewu 28:7 noMarku 16:7.

•    Kungani uMarku athi uJesu wayeyobonakala kubafundi bakhe “noPetru”?

•  Okungakusiza: UMarku wayengekho ngesikhathi kwenzeka lokhu, ngakho kusobala ukuthi akubhala wakutshelwa uPetru.

•  Igugu elicashile: Kungani kwamduduza uPetru ukuzwa ukuthi uJesu wayefuna ukumbona? (Marku 14:66-​72) UJesu wabonisa kanjani ukuthi wayengumngane kaPetru weqiniso? Ungamlingisa kanjani uJesu ngokuba umngane weqiniso kwabanye?

 Uma wenza iBhayibheli liphile futhi ucwaninga, uzokujabulela kakhulu ukulifunda!